TLAPOUALISTLI 2

Se kualtsin xochitlali

¡XIKITA Tlaltikpak! ¡Melauak kuajkualtsin nochi! Xikita xiuitl uan kuajmej, xochimej uan nochtin yolkamej. ¿Tikitaj kanin katej elefante uan leones?

¿Akin okichijchi nin kuajkualtsin xochitlali? Ma tikitakan ken toTajtsin Dios okiyektlali Tlaltikpak pampa tejuan.

Achto, toTajtsin Dios okiskalti xiuitl uan ijkon uelis tlaxoxouijtoskia nochi tlali. Noijki okichijchi tlatlamantli xiuitl uan kuajmej. Nochi nin kichiua kualtsin ma moita Tlaltikpak. Uan amo san non. Miakej noijki techmakaj tlakuali tlen uelik.

Satepan, toTajtsin Dios okinchijchi michimej pampa ma nemikan ijtik atl uan totomej pampa ma patlanikan itech iluikak. Okinchijchi itskuintin, mistomej uan caballos; yolkamej uejueyij uan tsitsikimej. ¿Katej yolkamej kanin tichanti? ¡Melauak yolkuali toTajtsin Dios pampa otechchijchiuili miak tlamantli!

Satepan, toTajtsin Dios okichijchi sekan itech Tlaltikpak okachi kuajkualtsin. Okitokayoti xochitlali Edén. Nochi okatka ken toTajtsin Dios kinekia. Nochi kualtsin omoitaya. Uan ye kinekia nochi Tlaltikpak ma yeto ken nin kualtsin xochitlali tlen okichijchi.

Oksepa xikita tlaixkopinal. ¿Tikmati tlen okitak toTajtsin Dios opoliuia itech nin xochitlali? Ma tikitakan.

Génesis 1:11-25; 2:8, 9.