TLAPOUALISTLI 7

Se tlakatl yolchikauak

IJKUAK momiaktiliaj tlaltikpaktlakamej itech Tlaltikpak, miakej kichiuaj tlen amo kuali ken Caín. Maski ijkon, se tlakatl amo ijkon kichiua. Itoka Enoc. Ye se tlakatl yolchikauak. Tlaltikpaktlakamej tlen kiyaualoaj Enoc kichiuaj tlen amo kuali, maski ijkon, Enoc kitekichiuilia toTajtsin Dios.

¿Tikmati tleka tlaltikpaktlakamej okichiuayaj tlen amo kuali? Ximokuayejyeko: ¿Akin okichi Adán uan Eva amo ma kitlakamatikan toTajtsin Dios uan ma kikuakan tlakilotl tlen toTajtsin Dios okijto amo ma kikuakan? Se ángel tlen amo yolkuali. Biblia kitokayotia Satanás. Uan ye kineki tinochtin ma timochiuakan amo tiyolkualmej.

Se tonal, Jehová okichi Enoc ma kinmilui tlaltikpaktlakamej itlaj tlen yejuan amo kinekiaj kikakiskej. Okinmilui: ‘Se tonal toTajtsin Dios kinmixpolos nochtin akinmej amo yolkualmej’. Uelis tlen okinmilui okinkualani miak tlaltikpaktlakamej. Uelis kinekiaj kimiktiskej Enoc. Ik non, Enoc monekia yetos yolchikauak pampa uelis kinmiluiskia nochtin tlaltikpaktlakamej tlen toTajtsin Dios kichiuaskia.

ToTajtsin Dios amo okika Enoc ma yolto miak kauitl iuan tlaltikpaktlakamej tlen amo yolkualmej. Okajxiti san 365 xiuitl. ¿Tleka tikijtoaj “san 365 xiuitl”? Pampa itech non tonalmej, tlaltikpaktlakamej okachi okipiayaj chikaualistli uan okajxitiayaj 800 noso 900 xiuitl, amo ken axkan. ¡Kema; Matusalén ikone Enoc okajxiti 969 xiuitl!

Satepan omikik Enoc, tlaltikpaktlakamej okachi okichiuayaj tlamantli tlen amo kuali. Biblia kijtoa: ‘Yejuan nochipa omokuayejyekoayaj tlen amo kuali’, uan ‘itech nochi Tlaltikpak omochiuaya tlamantli tlen amo kuali’.

¿Tikmati tleka okatka miak ouijkayotl itech non tonalmej? Satanás oksepa okichi tlaltikpaktlakamej ma kichiuakan tlen amo kuali. Ma tikitakan ken opanok.

Génesis 5:21-24, 27; 6:5, 11-13; Hebreos 11:5; Judas 14, 15.