TLAPOUALISTLI 8

Tlakamej tlen sapanoa uejkapantikej

TLA tikitaskia akaj uejkapantik uan tlen amo akiskia itech mokalijtik, ¿tlen timokuayejyekoskia? ¡Tikijtoskia okatka se tlakatl tlen sapanoa uejkapantik! Yiuejkika itech Tlaltikpak okatkaj tlakamej tlen sapanoa uejkapantikej. Biblia kijtoa intatajuan okatkaj ángeles tlen okatkaj iluikak. ¿Ken opanok nin?

Xikilnamiki, ye Satanás ángel tlen amo yolkuali akin okichiuaya ma yeto ouijkayotl. Noijki omochijchikauaya pampa iángeles toTajtsin Dios kichiuaskiaj tlen amo kuali. Satepan, sekimej ángeles okikakilijkej Satanás. Okikajtejkej tekitl tlen toTajtsin Dios okinmakak itech iluikak. Oualajkej Tlaltikpak uan omochijkej tlaltikpaktlakamej. ¿Tikmati tleka?

Biblia kijtoa yejuan okinmitakej siuamej okatkaj kuajkualtsitsintin uan kinekiaj imiuan yetoskiaj. Ik non, oualajkej nikan ipan Tlaltikpak uan omonamiktijkej iuan siuamej. Biblia kijtoa amo kuali tlen okichijkej, pampa toTajtsin Dios okinchijchi ángeles pampa ma nemikan itech iluikak.

Ijkuak ángeles uan insiuauan okipixkej inkoneuan, ninmej amo okatkaj ken oksekimej konemej. Achto uelis omoitayaj ijkon ken oksekimej konemej. Maski ijkon, opejkej moskaltiaj uan moskaltiaj, uan omochijkej okachi chikauakej uan ijkon omochijkej tlakamej tlen sapanoa uejkapantikej.

Ninmej tlakamej uejkapantikej okatkaj amo yolkualmej. Uan ken yejuan okatkaj uejkapantikej uan okipiayaj miak chikaualistli, okintlajyouiltijkej oksekimej tlaltikpaktlakamej. Kinekiaj oksekimej ma kichiuakan tlen amo kuali ijkon ken yejuan okichiuayaj.

Enoc yomikik, maski ijkon, okatka okse tlakatl yolkuali itech Tlaltikpak. Omotokayotiaya Noé. Ye nochipa okichiuaya tlen toTajtsin Dios kinekia ma kichiua.

Se tonal, toTajtsin Dios okilui Noé kinmixpoloskia nochtin tlen amo yolkualmej. ToTajtsin Dios kinmakixtiskia Noé uan ichanejkauan uan miakej yolkamej. Ma tikitakan ken okichi.

Génesis 6:1-8; Judas 6.