TLAPOUALISTLI 58

David uan Goliat

FILISTEOS oksepa uitsej pampa moteuiskej iuan Israel. Eyi ikniuan David akinmej tlayekanaj axkan katej iuan isoldados Saúl. Ik non, se tonal Jesé kiluia David: ‘Xikinuikili mokniuan tlakuali uan pan. Uan xikinmitati ken katej’.

Ijkuak David oajsito kanin okatkaj soldados, omotlalo pampa kintemoskia ikniuan. Se filisteo uejkapantik tlen omotokayotiaya Goliat okiski pampa kinpijpinatiskia israelitas. Ijkon yokichijtoka itech 40 tonalmej, kualkan uan yoak. Chikauak okijtoaya: ‘Xikpejpenakan akin iuan nimoteuis. Tla ye tlatlanis uan nechmiktis, tejuan timochiuaskej namotlakeualuan. Uan tla ne nitlatlanis uan nikmiktis, namejuan nanmochiuaskej totlakeualuan. Namechiluia xikpejpenakan se pampa iuan nimoteuis’.

David okintlajtlani sekimej soldados: ‘¿Tlen kimakaskej akin kimiktis nin filisteo uan kimakixtis altepetl Israel itech nin tlamantli tlen tepinati?’.

Se soldado okijto: ‘Saúl kimakas miak tomin. Uan noijki kimakas ichpoch pampa iuan ma monamikti’.

Maski ijkon, nochtin israelitas omomojtiayaj pampa Goliat okatka uejkapantik. Okipiaya kanaj eyi metro, uan okse soldado okiuikiliaya iescudo.

Ken David okinekiaya moteuis iuan Goliat, sekimej soldados oyajkej uan okiluitoj ueyi tekiua Saúl. Maski ijkon, Saúl okilui David: ‘Amo tiuelis. Pampa titelpochtli uan ye kipia miak xiuitl ken soldado’. David okijto: ‘Ne onikmikti se oso uan se león tlen okinekiayaj kikuaskej se ichka notajtsin. Axkan nin filisteo kipanos ijkon ken yolkamej. Jehová nechpaleuis’. Ik non, Saúl okijto: ‘Xio, uan Jehová ma mitspaleui’.

David oyajki kanin okatka se aueyatl uan okinpejpenki makuili tetl tlen okatka petstikej uan okinkalaki itech ipoxa. Ijkuakon, ika imatemeka omoteuito iuan uejkapantik. Goliat amo ueli okineltokaya. Okitaya amo oui kimiktiskia David.

Goliat okijto: ‘Nikan xiuiki, uan monakayo nikinmakas totomej uan yolkamej pampa ma kikuakan’. Maski ijkon, David okijto: ‘Te tiuits ika se espada uan se lanza, uan ne nio moixpan ika itoka Jehová. Axkan Jehová kichiuas ma nimitstlani uan ne nimitsmiktis’.

Axkan David omotlalo kanin okatka Goliat. Uan okikixti itech ipoxa se tetl uan okitlali itech imatemeka uan okikajkauili Goliat ika nochi ichikaualis. ¡Tetl okalak itech itsonteko Goliat, uan omikik! Ijkuak filisteos okitakej tlakatl tlen uejkapantik yomikik, ocholojkej. Israelitas okintokakej uan otlatlankej.

1 Samuel 17:1-54.