TLAPOUALISTLI 66

Jezabel siuatl ueyi tekiua amo yolkuali

SATEPAN omikik ueyi tekiua Jeroboán, nochtin ueyi tekiuajkej tlen satepan tlanauatiaj itech tekiuajkayotl tlen kipia majtlaktli nechikolmej itech altepetl Israel, amo yolkualmej. Akin okachi amo yolkuali ye ueyi tekiua Acab. ¿Tikmati tleka? Pampa isiua Jezabel, siuatl ueyi tekiua tlen amo yolkuali.

Jezabel amo okatka israelita. Ye okatka ichpoch ueyi tekiua itech Sidón. Okiueyichiuaya dios Baal, uan okichi Acab uan oksekimej israelitas noijki ma kiueyichiuakan Baal. Jezabel okikokoliaya Jehová uan okinmikti miakej iteotlajtojkej. Oksekimej omonekiaya motlatiskej itech koyoktli itech tepetl pampa amo kinmiktiskiaj. Tla Jezabel itlaj okinekiaya, otemiktiaya pampa kipiaskia tlen ye okinekiaya.

Se tonal ueyi tekiua Acab omoyolkokoaya miak. Ik non, Jezabel okitlajtlani: ‘¿Tleka timoyolkokoa axan?’.

Acab okinankili: ‘Pampa tlen onechilui Nabot. Ne oniknekiaya nikouilis itlal kanin kitoka uvas. Maski ijkon, onechilui amo uelis nechnemakiltis’.

Jezabel okilui: ‘Amo ximotekipacho. Ne nimitsmakas’.

Ijkuakon, Jezabel okintlajkuilili sekimej tlayekankej itech altepetl kanin ochantiaya Nabot. Okijto: ‘Xikintemokan sekimej tlakamej tlen amo yolkualmej pampa ma kijtokan Nabot okiuijuikalti Dios uan ueyi tekiua. Xikixtikan itech altepetl uan xikmojmotlakan ika tetl pampa ma miki’.

San niman ijkuak Jezabel okimatki yomikik Nabot, okilui Acab: ‘Axkan xio uan xikmoaxkati tlali kanin Nabot okitokaya uvas’. ¿Amo melauak omonekiaya ma kitlajyouiltikan Jezabel pampa okichi itlaj tlen sapanoa amo kuali?

Ik non, satepan, Jehová okititlanki Jehú pampa ma kitlajyouilti. Ijkuak Jezabel okimatki Jehú oualaya, okintlapalui ixtololouan pampa uelis kuajkualtsin moitaskia. Maski ijkon, ijkuak Jehú oajsik uan okitak Jezabel itech ventana, okinmilui tlakamej tlen okatkaj itech kali kanin otlanauatiaya ueyi tekiua: ‘¡Xiktlamotlakan!’. Yejuan okitlakamatkej ijkon ken tikita itech tlaixkopinal. Okitlamotlakej Jezabel uan ye omikik. Ijkon omikik Jezabel, siuatl ueyi tekiua amo yolkuali.

1 Reyes 16:29-33; 18:1-4; 21:1-16; 2 Reyes 9:30-37.