TLAPOUALISTLI 68

Ome chokotsitsintin okinyolitijkej

TLA te timikiskia, ¿ken momachiliskia monantsin tla oksepa mitsyolitiskiaj? ¡Yolpakiskia miak! Maski ijkon, ¿uelis oksepa kiyolitiskej akin yomikik? ¿Ijkon yopanok achto?

Xikita tlakatl, siuatl uan chokotsin tlen moitaj itech tlaixkopinal. Tlakatl okatka teotlajtojki Elías. Nin siuatl okatka iknosiuatl uan ochantiaya itech altepetl Sarepta, uan chokotsin okatka ikone. Se tonal, chokotsin omokoko. Omokoko miak uan omikik. Ijkuakon, Elías okilui siuatl: ‘Xinechmaka mokone’.

Elías okiuikak mikatl tlakpak uan okitlali ipan tlapechtli. Ijkuakon, omotlatlaujti: ‘Oh Jehová, xikyoliti nin chokotsin’. ¡Uan chokotsin opejki mijyotia! Ijkuakon, Elías okitemoui uan okilui siuatl: ‘¡Xikita, mokone yoltok!’. Nin okichi ma yolpaki miak.

Okse iteotlajtojki Jehová tlen noijki oueyititoka omotokayotiaya Eliseo. Ye okipaleuiaya teotlajtojki Elías. Maski ijkon, ijkuak opanok kauitl Jehová okikauili Eliseo noijki ma kichiua milagros. Se tonal, oyajki itech altepetl Sunem, uan se siuatsintli kuali okiseli. Nin siuatsintli satepan okipixki se ikone.

Se kualkan, ijkuak chokotsin okachi yomoskalti, okitato itajtsin itech itlala kanin otekitiaya. San niman otsajtsik: ‘¡Nechkokoa notsonteko!’. Ijkuak okiuikakej ikalijtik, omikik. ¡Inantsin omoyolkoko miak! San niman okitemoto Eliseo.

Ijkuak Eliseo oualajsik, okalak itech cuarto iuan chokotsin tlen yomikik. Omotlatlaujti inauak Jehová, uan omotekak ipan chokotsin tlen yomikik. San niman, inakayo chokotsin ototonik, uan oekxo chikometipan. ¡Inantsin oyolpakik miak ijkuak okalak uan okitak ikone yoltok!

Sapanoa miakej tlaltikpaktlakamej yomikej. Nin kinyolkokoaj miak inchanejkauan uan inyolikniuan. Tejuan amo tiuelitij tikinyolitiaj akinmej yomikej. Maski ijkon, Jehová kema ueliti. Satepan tikitaskej ken kichiuas Jehová pampa kinyolitis miakej tlaltikpaktlakamej.

1 Reyes 17:8-24; 2 Reyes 4:8-37.