TLAPOUALISTLI 71

ToTajtsin Dios okitemakak itlajtol kichiuas se xochitlali

NIN se tlaixkopinal tlen uelis toTajtsin Dios okititi teotlajtojki Isaías itech ken yetos xochitlali. Isaías onemik seki kauitl satepan omikik Jonás.

Nin xochitlali moita kuajkualtsin, ¿amo melauak? ¿Mitsilnamiktia itlaj tlen yotikitak itech nin amochtli? Kema, kuajkualtsin xochitlali tlen toTajtsin Dios okichijchi pampa Adán uan Eva, ¿amo melauak? Maski ijkon, ¿mochiuas nin itech nochi Tlaltikpak?

Jehová okilui iteotlajtojki Isaías ma tlajkuilo itech yankuik xochitlali tlen satepan mochiuas pampa ialtepetl toTajtsin Dios. Okijto: ‘Koyomej uan ichkamej, san sekan yetoskej. Torojtsitsintin uan leontsitsintin san sekan tlakuaskej, uan konemej kinmaluiskej. Nion konetsintli tlen mauiltis kanin kajki se koatl amo itlaj kipanos’.

Miakej uelis kijtoskej: ‘Non amo keman mochiuas. Nochipa onka tlajyouilistli itech Tlaltikpak, uan nochipa yetos’. Maski ijkon, ximokuayejyeko, ¿kanin okintlalijkej Adán uan Eva pampa chantiskiaj?

ToTajtsin Dios okintlali Adán uan Eva itech se xochitlali. Uan ken amo okitlakamatkej toTajtsin Dios okinkixtijkej itech nin kuajkualtsin xochitlali, uan satepan okokoxkatikej noso oueuejtijkej uan omikej. ToTajtsin Dios kinmaka itlajtol akinmej kitlasojtlaj kinmakas tlamantli tlen Adán uan Eva okipolojkej.

Itech nin yankuik xochitlali amo itlaj tetlajyouiltis nion itlaj tlaxixinis. Melauak yetos yolseuilistli. Nochtin tlaltikpaktlakamej chikajtoskej uan yolpakiskej ijkon ken achto okinekiaya toTajtsin Dios. Maski ijkon, satepan timomachtiskej ken ijkon kichiuas toTajtsin Dios.

Isaías 11:6-9; Apocalipsis 21:3, 4.