TLAPOUALISTLI 20

Dina otlajyoui

¿TIKITA akinmej kintlajpaloti Dina? Kintlajpaloti sekimej ichpokamej tlen chantij Canaán. ¿Kipaktiskia itajtsin Jacob? Itlaj tlen mitspaleuis tiknankilis nin tlajtlanilistli, ye tikilnamikis ken omokuayejyekoayaj Abrahán uan Isaac itech siuamej tlen ochantiayaj Canaán.

¿Okinekiaya Abrahán ma monamikti ikone Isaac iuan se ichpochtli tlen ochantiaya Canaán? Amo. ¿Okinekiayaj Isaac uan Rebeca ma monamikti Jacob iuan se siuatl cananea? Amo. ¿Tikmati tleka?

Pampa tlaltikpaktlakamej tlen ochantiayaj Canaán okinueyichiuayaj teotsitsintin. Amo okatkaj yolkualmej pampa iuan monamiktiskiaj, nion okatkaj yolkualmej pampa mochiuaskiaj inyolikniuan. Ik non, uelis tikijtoskej Jacob amo kipaktiskia ichpoch ma mouika iuan ichpokamej cananeas.

Dina okimotemoli ouijkayotl. ¿Tikita itech tlaixkopinal cananeo tlen kita Dina? Itoka Siquem. Se tonal, ijkuak Dina okintlajpaloto ichpokamej, Siquem okichiualti Dina ma moteka iuan. Nin amo kuali, pampa san tlakamej uan siuamej tlen yomonamiktijkej uelis motekaskej san sekan. Tlen Siquem okichiuili Dina amo kuali okatka, uan okichi ma yeto miak tlajyouilistli.

Ijkuak ikniuan Dina okimatkej tlen opanok, okualankej miak. Ome ikniuan, Simeón uan Leví, sapanoa okualankej uan okikitskijkej inespadas, uan okalakej ichtaka itech altepetl. Yejuan uan ikniuan okinmiktijkej Siquem uan oksekimej tlakamej. Nin tlamantli amo kuali tlen okichijkej ikoneuan Jacob, okikualani miak.

¿Ken opejki nochi nin ouijkayotl? Pampa Dina omouikayaj iuan akinmej amo okitlakamatiayaj itlanauatiluan Jehová. Tejuan noijki amo ma timouikakan iuan akinmej amo kitlakamatij Jehová, ¿amo melauak?

Génesis 34:1-31.