TLAPOUALISTLI 15

Isiua Lot otlachixki tlakuitlapan

LOT uan ichanejkauan ochantiayaj iuan Abrahán itech tlali Canaán. Se tonal Abrahán okilui Lot: ‘Nikan ayakmo onka tlen kikuaskej toyolkauan. Okachi kuali ma timoxelokan, nimitstlatlaujtia. Tla te tias ik nikan, ne nias ik nepa’.

Lot otlachixki uan okitak sekan itech tlali tlen okachi kuali okatka, okipiaya atl uan miak xiuitl kanin tlakuaskiaj iyolkauan. Tlali omokauaya kanin yetok Jordán. Ik non, Lot ompa okinuikak ichanejkauan uan iyolkauan. Saiktlami, okichijchijkej se kali itech altepetl Sodoma.

Tlaltikpaktlakamej tlen ochantiayaj Sodoma sapanoa amo yolkualmej okatkaj. Nin amo okipaktiaya Lot, pampa ye okatka yolkuali. ToTajtsin Dios noijki amo okipaktiaya. Saiktlami, toTajtsin Dios okintitlanki ome ángeles pampa kiluiskiaj Lot ken Jehová kixpoloskia altepetl Sodoma uan noijki Gomorra, pampa okichiuayaj miak tlamantli tlen amo kuali.

Ángeles okiluijkej Lot: ‘¡Totoka! ¡Xikinkixti mosiua uan moichpokauan itech nin altepetl!’. Lot uan ichanejkauan otlajkajtilijtokaj, ik non, ángeles okinmatilankej uan okinkixtijkej itech altepetl. Ijkuakon, se ángel okijto: ‘¡Ximotlalokan pampa amo nanmikiskej! Amo xitlachiakan tlakuitlapan. Ximotlalokan itech tepemej pampa nanmomakixtiskej’.

Lot uan ichpokauan otetlakamatkej uan omotlalojkej pampa kisaskiaj itech Sodoma. Amo omoketskej nion achitsin nion otlachixkej tlakuitlapan. Maski ijkon, isiua Lot amo otetlakamatki. Ijkuak ayamo uejka okatkaj itech Sodoma, isiua Lot omoketski uan otlachixki tlakuitlapan. Ijkuakon, isiua Lot omokuepki istatl. ¿Tikita itech tlaixkopinal?

Itech tlen okipanok isiua Lot tikitaj se kuali tlamachtil: toTajtsin Dios kinmakixtia akinmej kitlakamatij, uan akinmej amo kitlakamatij mikij.

Génesis 13:5-13; 18:20-33; 19:1-29; Lucas 17:28-32; 2 Pedro 2:6-8.