TLAPOUALISTLI 19

Jacob okipixki se ueyi kalchanejkej

XIKITA nin ueyi kalchanejkej. Ninmej 12 itelpokauan Jacob. Uan noijki okinpixki sekimej ichpokauan. ¿Tikmati intoka sekimej ikoneuan? Ma timomachtikan sekimej.

Lea okinpixki Rubén, Simeón, Leví uan Judá. Ijkuak Raquel okitak amo ueli okipiaya ikoneuan, omoyolkoko miak. Ik non, okilui Jacob ma moteka iuan itlakeual Bilha, uan Bilha okinpixki ome ikoneuan, Dan uan Neftalí. Ijkuakon, Lea noijki okilui Jacob ma moteka iuan itlakeual Zilpa, uan Zilpa okinpixki Gad uan Aser. Saiktlami, Lea okinpixki ok ome ikoneuan, Isacar uan Zabulón.

Axkan kema Raquel ueli okipixki se ikone. Okitokayoti José. Satepan, okachi timomachtiskej itech José, pampa ye omochi se tlakatl sapanoa ueyititok. Jacob okinpixki ninmej 11 ikoneuan ijkuak ochantiaya iuan Labán, itajtsin Raquel.

Jacob noijki okinpixki sekimej ichpokauan, maski Biblia san tlajtoa itech se. Omotokayotiaya Dina.

Oajsik tonal ijkuak Jacob omoxelo inauak Labán uan omokuepki itech Canaán. Ik non, okinechiko ueyi ikalchanejkej, miakej ichkauan uan oksekimej miakej iyolkauan, uan opejkej nejnemi miakej tonalmej.

Sekimej tonalmej satepan, ijkuak Jacob uan ichanejkauan omokuepkej Canaán, Raquel okipixki okse ikone. Nin opanok ijkuak oyayaj okse altepetl. Raquel otlajyoui miak ijkuak okipixki ikone, saiktlami omikik. Maski ijkon, ikonetsin kuali oneski. Jacob okitokayoti Benjamín.

Tiknekij tikinmilnamikiskej intoka 12 ikoneuan Jacob, pampa nochi altepetl Israel okiski itech yejuan. Noijki 12 nechikolmej itech Israel kiuika intoka majtlaktli ikoneuan Jacob uan ome ikoneuan José. Satepan oneskej ninmej itelpokauan Jacob, Isaac ok yoltoka miak xiuitl, uelis tikijtoskej omoyolpakti miak pampa okipiaya miakej ixuiuan. Axkan, ma tikitakan tlen okipanok ixui akin omotokayotiaya Dina.

Génesis 29:32-35; 30:1-26; 35:16-19; 37:35.