TLAPOUALISTLI 18

Jacob oyajki Harán

¿TIKMATI akinmej ninmej tlakamej tlen motlapouijtokej iuan Jacob? Satepan onejnenki miak tonalmej, Jacob okinmajsik inauak se atekochtli. Okintlajpixtokaj ichkauan. Jacob okintlajtlani: ‘¿Kanin nanchantij?’.

‘Itech Harán’, okinankilijkej.

Jacob okintlajtlani: ‘¿Nankixmatij Labán?’.

‘Kema tikixmatij’, otlanankilijkej. ‘Xikita, nikan uits ichpoch tlen itoka Raquel uan kiualika ichkauan itajtsin’. ¿Tikita ken ualajsitok Raquel?

Ijkuak Jacob okitak Raquel ika ichkauan Labán, itío Jacob, san niman okijkuani tetl tlen okitsakuaya atekochtli pampa atliskiaj ichkamej. Ijkuakon, Jacob okixpipitso Raquel uan okilui akin ye. Raquel oyolpakik miak uan oyajki ikalijtik uan okitlapoui itajtsin Labán tlen opanok.

Labán opakik miak pampa Jacob mokauaskia ikalijtik. Ijkuak Jacob okilui okinekiaya monamiktis iuan Raquel, Labán opakik. Maski ijkon, okitlajtlanili Jacob ma kitekipano itech itlal chikome xiuitl pampa kimakaskia Raquel. Jacob ijkon okichi, pampa okitlasojtlaya miak Raquel. Maski ijkon, ijkuak oajsik tonal pampa monamiktiskia, ¿tikmati tlen opanok?

Labán okimakak Jacob ichpoch tlen okachi ueyi, Lea, uan amo okimakak Raquel. Ijkuak Jacob okilui Labán oksepa tekitiskia chikome xiuitl, Labán okimakak Raquel ken isiua. Itech non tonalmej toTajtsin Dios okinkauiliaya tlakamej ma kipiakan se noso oksekimej insiuaj. Maski ijkon, axkan Biblia kijtoa tlakatl moneki kipias san se isiua.

Génesis 29:1-30.