TLAPOUALISTLI 31

Moisés uan Aarón okitatoj Faraón

IJKUAK Moisés oksepa mokuepa Egipto, kiluia ikni Aarón itech ninmej milagros. Uan ijkuak Moisés uan Aarón kinmititiaj israelitas milagros, nochtin kineltokaj Jehová kajki imiuan.

Ijkuakon, Moisés uan Aarón okitatoj Faraón. Okiluijkej: ‘Jehová iTajtsin Israel kijtoa: “Xikaua noaltepetl ma kisa eyi tonalmej, pampa ma nechueyichiuakan kanin tlauaki”’. Maski ijkon, Faraón okijto: ‘Ne amo nitlaneltoka itech Jehová. Uan amo nikauas Israel ma kisa’.

Faraón okualanki, pampa israelitas ayakmo okinekiayaj tekitiskej pampa ijkon uelis kiueyichiuaskiaj Jehová. Ik non, otlanauati okachi chikauak ma tekitikan. Israelitas okitlajtlakoltijkej Moisés pampa okintlajyouiltijkej, uan Moisés omoyolkoko. Maski ijkon, Jehová okilui amo ma motekipacho. Jehová okijto: ‘Nikchiuas Faraón ma kikaua ma kisa noaltepetl’.

Moisés uan Aarón oksepa okitatoj Faraón. Uan axkan okichijkej se milagro. Aarón okitlamotlak ikuauitl, uan omokuepki se ueyi koatl. Uan ixtlamatkej tlen okitekichiuiliayaj Faraón noijki okintlamotlakej inkuauitl, uan omochijkej koamej. Maski ijkon, ¡xikita!, ikuauitl Aarón tlen omokuepki se koatl opejki kintoloa oksekimej koamej tlen inaxka ixtlamatkej. Maski ijkon, Faraón amo okinkauili israelitas ma kisakan.

Ik non, oajsik tonal ijkuak Jehová okititi Faraón iueyitilis. ¿Tikmati ken okichi? Okichi ijkuak okiualtitlanki majtlaktli chauistli noso uejueyij tlajyouilismej ipan Egipto.

Satepan opanok sejse chauistli, Faraón okinotsaya Moisés uan okiluiaya: ‘Xikachiua chauistli uan nikauas ma kisa Israel’. Uan ijkuak ayakmo okatka chauistli, amo okichiuaya ken okijto. Amo okinkauiliaya ma kisakan. Maski ijkon, saiktlami, satepan opanok chauistli majtlaktli, Faraón okinkauili israelitas ma kisakan.

¿Tikinmixmati sejse ninmej majtlaktli chauistli? Xikita okse página uan ma tikitakan sejse chauistli.

Éxodo 4:27-31; 5:1-23; 6:1-13, 26-30; 7:1-13.