TLAPOUALISTLI 30

Xiuitl tlen oxotlatoka

MOISÉS uits itech tepetl Horeb uan kitemoa xiuitl pampa ichkauan. Uan nikan kita se xiuitl tlen xotlatok, maski ijkon, ¡xiuitl amo tlatla!

‘¡Amo nikmati tlen panoa!’, omokuayejyeko Moisés. ‘Okachi kuali ma nikitati’. Ijkuak okitato, omokak se tlajtoli tlen okisaya ijtik xiuitl: ‘Ayakmo okachi xinejnemi. Xikmokixtili mokakuan, pampa tika itech tlali tlen chipauak’. Ye toTajtsin Dios akin otlajtoaya ika se ángel, ik non, Moisés omoixtlapacho.

Axkan toTajtsin Dios okijto: ‘Yonikitak ken noaltepetl tlajyouijtok itech Egipto. Nikinmakixtis, uan nimitstitlanis pampa tikinkixtis’. Jehová kiuikaskia ialtepetl itech kuajkualtsin ueyi altepetl Canaán.

Maski ijkon, Moisés okijto: ‘Ne amo itlaj nopati. ¿Ken nikchiuas? Uan tla nias nechtlajtlaniskej: “¿Akin omitsualtitlanki?” ¿Tlen nikinmiluis?’.

‘Nin tikinnankilis’, okijto toTajtsin Dios. ‘“JEHOVÁ akin inTajtsin Dios Abrahán, Isaac uan Jacob onechualtitlanki”’. Uan Jehová noijki okijto: ‘Nin notoka pampa nochipa’.

Moisés okinankili: ‘Uan, ¿tla amo nechneltokiliskej ijkuak nikinmiluis otinechtitlanki?’.

ToTajtsin Dios okitlajtlani: ‘¿Tlen tikpia ipan moma?’.

Moisés okijto: ‘Se kuauitl’.

ToTajtsin Dios okilui: ‘Xiktlamotla ipan tlali’. Ijkuak Moisés ijkon okichi, kuauitl omokuepki se koatl. Ijkuakon, Jehová okititi Moisés okse milagro. Okilui: ‘Xikkalaki moma itech motlaken’. Moisés ijkon okichi, uan ijkuak okikixti ima, okatka sapanoa istak. Omoitaya okipiaya se kokolistli tlen itoka lepra. Maski ijkon, satepan Jehová okipajti. Ijkuakon, Jehová okimakak Moisés chikaualistli pampa kichiuas eyijpa milagro. Saiktlami okilui: ‘Ninmej milagros kichiuaskej israelitas ma kineltokakan ne onimitstitlanki’.

Satepan, Moisés omokuepki ikalijtik uan okilui Jetro: ‘Nimitstlatlaujtia, xinechkauili ma nimokuepa Egipto pampa ma nikinmitati ken katej nochanejkauan’. Ik non, Jetro okimakauak Moisés, uan opejki mokuepa itech Egipto.

Éxodo 3:1-22; 4:1-20.