1-4. (1) ¿Tlen okipanok Pedro? (2) ¿Tlen tikchiuaskia tla mitspanoskia ijkon ken Pedro?

 SOLDADOS okitsakuato Pedro ikinon omokak ijkuak okitsakej puerta de tepostli. ¿Tlen opanok? Ome soldados okilpijkej Pedro ika cadenas uan okitsakuatoj. Ye amo okimatiaya keski horas noso keski tonal ompa tsaktoskia. Ye san okitaya tepamitl, tepostli tlen okipiaya kanin otsaktoka, cadenas uan akinmej otlamaluiayaj.

² Ye okiluijkej itlaj amo kuali kipanoskia. Tekiua Herodes Agripa I okijto itlaj kitoktis. a Non tekiua okinekiaya kixkomakas inmixpan oksekimej ijkuak tlamiskia Pascua. Ye okimatiaya kinpaktiskia kikakiskej makimiktikan Pedro. Ikinon Pedro okimatiaya uelis kimiktiskiaj, porque Herodes achto otlanauati makimiktikan apóstol Santiago.

³ Matimokuayejyekokan Pedro otsaktoka kanin otlayouatoka achto kimiktiskiaj. ¿Tlen omokuayejyekouaya? ¿Okilnamik tlen Jesús okilui seki xiuitl achto? Jesús okiluijka se tonal kiuikaskiaj, kilpiskiaj maski ye amo kinekiskia uan kimiktiskiaj (Juan 21:18, 19). ¿Ijkon kipanoskia non tonal?

⁴ ¿Ken timomachiliskia tla ijkon mitspanoskia? Miakej xamo moyolkokoskiaj uan kijtoskiaj ayakmo uelis itlaj kichiuaskej. Pero akinmej tikchiuaj ken Cristo amo ijkon timokuayejyekouaj. Matikitakan ken uelis techpaleuis tlen okichi Pedro uan tlen okichijkej oksekimej ijkuak okintlajyouiltijkej.

5, 6. (1) ¿Tleka tekiua Herodes Agripa I opejki kintlajyouiltia tokniuan uan ken okichi? (2) ¿Tleka tokniuan omoyolkokojkej ijkuak okimiktijkej Santiago?

⁵ Itech okse tlamachtil otikitakej ijkuak Cornelio uan ifamilia opejki kichiuaj ken Cristo maski amo okatkaj judíos. Miak ipati tlen  okichijkej. Omotlajtlachialtijkej judíos tlen amo okichiuayaj ken Cristo ijkuak okinmitakej judíos okiueyichiuayaj toTajtsin Dios inuan akinmej amo okatkaj judíos.

⁶ Tekiua Herodes oksepa okimatki ken kinmotlanilis judíos. Ikinon opejki kintlajyouiltia tokniuan. “Otlanauati makimiktikan ika espada Santiago tlen okatka ikni Juan”. Ye okimatiaya non apóstol kuali omouikaya iuan Jesús (Hech. 12:2). Sapanoua oui tlen okinpanok tokniuan. Santiago okitak ijkuak Jesús okse tlamantli okinmonextili uan noijki okitak ijkuak okinchi seki milagros (Mat. 17:1, 2; Mar. 5:37-42). Santiago uan ikni tlen omotokayotiaya Juan sapanoua otekipanouayaj uan opakiayaj ikinon Jesús okintokayoti “ikoneuan tlatikuinili” (Mar. 3:17). Tokniuan okitlasojtlayaj Santiago. Ikinon omoyolkokojkej ijkuak okimiktijkej porque ye okatka yolchikauak uan amo keman okika Jehová.

7, 8. ¿Tlen okichijkej tokniuan ijkuak Pedro otsaktoka?

⁷ Judíos opakej ijkuak okimiktijkej Santiago ijkon ken Herodes omokuayejyekojka. Non okipakti uan opejki kitlajyouiltia Pedro. Ikinon ijkon ken yotikitakej, Herodes okitsaki Pedro. Pero itech tlamachtil 5 otikitakej noijki ika se milagro okinkixtijkej apóstoles. Herodes yokimatiaya ijkon opanok ikinon otlanauati makilpikan ika cadenas Pedro. Noijki okintlali ome soldados uan ok 16 tlakamej makimaluikan tlajka uan youak para amo macholo. Akinmej otlamaluiayaj kintlajyouiltiskiaj ijkon ken Pedro tla kikauiliskiaj macholo. ¿Ken uelis tokniuan kipaleuiskiaj Pedro?

⁸ Hechos 12:5 kijtoua: “Pedro otsaktoka pero tokniuan tlen omonechikouayaj  nochipa okitlatlaujtiayaj toTajtsin Dios makipaleui”. Tokniuan kuali okimatiayaj omonekiaya motlatlaujtiskej ipatka Pedro porque okitlasojtlayaj. Yejuan omoyolchikajkej maski Santiago okimiktijkej. Omotlatlaujtijkej uan amo okijtojkej amitlaj ipati ijkon kichiuaskiaj. Itlaj techmachtia tlen yejuan okichijkej. Matikilnamiktokan Jehová sapanoua kipatioita ijkuak timotlatlaujtiaj. Ye technankilis ijkuak tiktlatlaujtiaj mamochiua tlen ye kineki (Heb. 13:18, 19; Sant. 5:16).

9. ¿Tlen techmachtia ijkuak tokniuan omotlatlaujtijkej ipatka Pedro?

⁹ ¿Tikixmati se tokni tlen sapanoua tlajyouijtok? Xamo itlaj kixnamiki, kitlajyouiltiaj noso otlaxixinki kanin chanti. Ximotlatlaujti ipatka non tokni tla tikmati ijkon kipanotok. Noijki uelis timotlatlaujtis inpatka tokniuan tlen tlajyouiaj infamilias, tokniuan tlen moyolkokouaj noso kixnamikij okseki tlamantli porque tlaneltokaj. Ijkuak timotlatlaujtis, achto ximokuayejyeko uan ijkon tikinmilnamikis intoka tokniuan. Noijki uelis tikiluis Jehová makinpaleui porque ‘ye kinkaki akinmej kitlatlaujtiaj’ (Sal. 65:2). Xikilnamikto tokniuan noijki mopatka motlatlaujtiskej ijkuak titlajyouis.

10, 11. Xikijto ken iángel Jehová okipaleui Pedro makisa kanin otsaktoka.

¹⁰ ¿Okimomojtiaya Pedro tlen kipanoskia? Amo tikmatij. Pero non saiktlami youak ijkuak yikimiktiskiaj ye okochtoka intlajkotia ome soldados. Pedro otlaneltokaya ikinon kuali okimatiaya Jehová kimaluiskia maski san tlen panoskia (Rom. 14:7, 8). Xamo  Pedro amo okimatiaya tlen panoskia. Non youak otlapetlanki kanin otsaktoka. Oualmonexti iángel Jehová pero soldados tlen ompa otlamaluiayaj amo okitakej. Non ángel okijxiti Pedro uan ouetskej cadenas tlen ika omailpitoka.

¹¹ Ángel okinauati Pedro tlen omonekiaya kichiuas. Achto okilui ‘¡mamejteua!’. Satepan okilui ‘mamotlajkoilpi uan mamokakti’. Saiktlami okilui ‘makimokenti itsotsol uan makitoka’. Pedro san niman okichi nochi tlen ángel okinauati. Okiskej kanin otsaktoka, okinpanouijkej soldados tlen otlamaluijtokaj uan san ichtaka oajsitoj kanin okatka puerta de tepostli. ¿Ken uelis kisaskiaj ik ompa? Xamo ijkon omotlajtlani Pedro pero san niman okitak “non puerta iselti omotlapo”. Yejuan okiskej uan onejnentiajkej itech se ojtli. Satepan oualpoliuik ángel uan Pedro iselti omoka. Pedro okajsikamatki melauak tlen opanotoka ijkuak okitak ayakmo otsaktoka (Hech. 12:7-11).

12. ¿Tleka techyolseuia ijkuak Jehová okipaleui Pedro?

¹² Techyolseuia tikmatiskej Jehová techpaleuia ika ichikaualis. Maski Herodes okipaleuiayaj nochtin tekiuajkej tlen okatkaj, amo okipaleuijkej matsakto Pedro. Jehová amo nochipa techpaleuia ika se milagro. Amo ijkon okipaleui Santiago nion okipaleui Pedro ijkuak okipanok tlen okilui Jesús. Tejuan amo tikchiaj Jehová makichiua se milagro ijkuak itlaj techpanoua. Pero tikmatij Jehová ‘amo kipatla iyelis’ uan san niman iKone techmakixtis imak mikilistli. Uelis techmakixtis maski mota amikaj uelis kicholilis mikilistli (Mal. 3:6; Juan. 5:28, 29). Nin techyolchikaua ijkuak titlajyouiaj.

13-15. (1) ¿Ken omomachilijkej tokniuan ijkuak Pedro oajsito ikalijtik María? (2) ¿Akin okachi itech tlajtoua libro Hechos? (3) ¿Ken Pedro ok okinpaleui tokniuan?

¹³ Non youak Pedro okatka itlajkotia ojtli. Ompa omokuayejyekojtoka kanin yaskia. Ikinon okijto yaskia ikalijtik María, se tokni tlen ik ompa ochantiaya. Xamo María ayakmo okipiaya inamik uan okipiaya miak tomin porque okatka ueyi ikalijtik uan ompa omonechikouayaj miakej tokniuan. Ye okatka imama Juan Marcos. Itech Hechos ayamo omoijtouaya itoka Juan Marcos pero nikan opejki moijtoua. Satepan Pedro okitak Juan Marcos ken ikone (1 Ped. 5:13). Non tonal miakej tokniuan omotlatlaujtijtokaj ikalijtik María maski yokatka yiyouak. Okiluijkej Jehová makimakixti Pedro. Pero yejuan amo okichiayaj san niman makinnankili Jehová.

¹⁴ Pedro okiuiuitekiaya puerta. Se ichpochtli tlen omotokayotiaya Rode tlen ompa otlapaleuiaya otlachiato akin otlauiuitekiaya. Itoka non ichpochtli okatka ika tlajtoli griego uan kijtosneki “Rosa”. Amo okineltokak ijkuak  okikak Pedro. Ichpochtli opaki ijkuak okitenkak Pedro pero amo okitlatlapoli uan omotlalo okinmiluito akinmej okatkaj kalijtik. Tokniuan okiluijkej okuatlapolo pero ye okachi okinmiluiaya melauak ompa okatka Pedro. Ikinon sekimej tokniuan omokuayejyekojkej se ángel oyajki ipatka Pedro (Hech. 12:12-15). Pedro ok okatka kaltempa uan okiuiuitekiaya puerta uan satepan okitlatlapolijkej.

¹⁵ Tokniuan “omotlajtlachialtijkej ijkuak otlatlapojkej uan okitakej ompa okatka” Pedro (Hech. 12:16). Yejuan opakiayaj uan chikauak otlajtouayaj pero Pedro okinmilui ayakmo itlaj makijtokan uan ijkon okinyekilui tlen opanok. Noijki okinnauati makinmiluitij tokniuan tlen opanok uan noijki makiluitij Santiago. Ijkuak ijkon okijto, okiski uan oksekan oyajki kanin uelis kitekichiuiliskia Jehová. Ijkon amo kajsiskiaj isoldados Herodes. Itoka Pedro omoijto hasta itech capítulo 15 tlen kipia libro Hechos porque okachi kijtoua kanin otetlapouito Pablo. Satepan omoijto itoka ijkuak omotlapouijkej kox ok omonekiaya circuncisión. Tikneltokaj Pedro okinyolchikauaya tokniuan maski san kanin oyaya. Noijki tikneltokaj, tokniuan tlen okatkaj ikalijtik María amo keman okilkajkej ken opakej non youak.

16. ¿Ken tikmatij satepan okachi tipakiskej?

¹⁶ Itekipanojkauan Jehová sapanoua pakij uan motlajtlachialtiaj ijkuak Jehová kichiua itlaj tlen yejuan amo okichiayaj. Ijkon omomachilijkej tokniuan non youak ijkuak Pedro okinmajsito. Tejuan noijki tipakij ijkuak tikitaj Jehová techteochiua (Prov. 10:22). Satepan tikitaskej ipan nochi tlaltikpak Jehová kichiuas nochi tlen yokijto. Sapanoua techtlajtlachialtis nochi tlen Jehová kichiuas porque amo yetos ijkon ken tejuan timokuayejyekouaj. Ijkuakon sapanoua tipakiskej tla amo tikkauaj Jehová.

17, 18. ¿Tleka okiueyichijkej Herodes?

¹⁷ Tekiua Herodes Agripa noijki omotlajtlachialti ijkuak Pedro ocholo kanin otsaktoka. Ye sapanoua okualanki ikinon otlanauati kuali makitemokan. Satepan “okintlajtlani akinmej otlamaluijtokaj tlen opanok uan satepan otlanauati makintlajyouiltikan”. Xamo otlanauati makinmiktikan (Hech. 12:19). Tekiua Herodes amo okinmiknomatiaya oksekimej. ¿Itlaj kipanoskia nin tekiua amo yolkuali?

¹⁸ Xamo Herodes amo okinekiaya makipinauikan porque amo ueli okimikti Pedro. San niman okitak tlen kichiuaskia uan ijkon amo makipinauikan. Ikinon ijkuak sekimej tlen okikokoliayaj Herodes okitatoj porque okinekiayaj iuan moyekuikaskej, ye opejki kijtoua miak tlamantli para moueyitlalis inmixpan akinmej ompa okatkaj. Lucas okiyekijto non tonal  “Herodes omoyektlakenti”. Se tlakatl ixtlamatki tlen omotokayotiaya Josefo okijto tlakemitl tlen okonaki Herodes non tonal, okijtsonkej ika plata ikinon opetlaniaya ixko tonaltsin. Ye okinekiaya kiteititis okatka se dios. Herodes omoueyinekiaya ijkuak okintlapoui akinmej ompa okatkaj uan yejuan okijtojkej: “¡Tlajtoua se dios uan amo se tlakatl!” (Hech. 12:20-22).

19, 20. (1) ¿Tleka Jehová okichi mamokoko Herodes? (2) ¿Ken techyolchikaua tlen okipanok Herodes?

¹⁹ Jehová kineki san ye matikueyichiuakan pero non tonal okitak okiueyichijtokaj Herodes. Non tekiua uelis kinmiluiskia amo ijkon makichiuakan uan toTajtsin Dios amo kitlajyouiltiskia. Pero okipanok ijkon ken kijtoua se texto: “Akin moueyineki satepan tlajyouis” (Prov. 16:18). Ijkuakon “iángel Jehová san niman okichi mamokoko”, “okikuajkej okuilimej uan oixpoliuik” (Hech. 12:23). Temomojti ken oixpoliuik. Josefo okijto Herodes san niman omokoko uan ineuian okijto ijkon okipanok porque okitekauili makiueyichiuakan. Noijki Josefo okijkuilo Herodes otlajyouijtoka makuili tonal. b

²⁰ Xamo ualeua tikijtouaj akinmej amo yolkualmej amitlaj kinpanoua. Nin tlamantli amo techtlajtlachialtia porque tikmatij “nochtin tlen chantij tlaltikpak katej imak Satanás” (1 Juan 5:19). Ualeua tejuan akinmej tiktekichiuiliaj toTajtsin Dios timoyolkokouaj porque amitlaj kintoktiaj akinmej kichiuaj tlen amo kuali. Pero tlen okipanok Herodes techyolchikaua porque Jehová kinmixkomaka akinmej amo yolkualmej uan kipatioita kichiuas tlen kuali (Sal. 33:5). Ayakmo miak poliui uan ye tlaixkomakas uan kichiuas tlen kuali.

21. (1) ¿Tlen tlamantli miak ipati techmachtia Hechos capítulo 12? (2) ¿Tleka techyolchikaua?

²¹ Saiktlami ijkin opanok: “ITlajtol Jehová okachi omotematiltiaya uan miakej okineltokayaj” (Hech. 12:24). Tlen nikan moijtoua techyolchikaua porque okachi momiaktiliaj akinmej kineltokaj toTajtsin Dios. Noijki techilnamiktia Jehová techteochiua ijkuak titetlapouiaj. Hechos capítulo 12 amo san techtlapouia ijkuak okimiktijkej se apóstol uan ijkuak okimakixtijkej Pedro. Noijki techmachtia Jehová tlapaleuia ijkuak Satanás kineki kipojpolos tlanechikol porque ye amo kineki matitetlapouikan. Satanás amo keman kichiuas ayakmo matitetlapouikan maski kichiuas miak tlamantli (Is. 54:17). Tejuan akinmej amo tikkauaj Jehová uan tikchiuaj ken Jesús, titlapaleuiaj mamochiua se tekitl tlen amo keman ikaj kipojpolos. Nin tlamantli sapanoua techyolchikaua. Tipakij titetlapouiskej “iTlajtol Jehová” porque ijkon okachi motematiltia uan okachi miakej kineltokaj.