TLAMACHTIL 15
¿Ken kineki toTajtsin Dios ma tikueyichiuakan?
1. ¿San akin uelis techiluis ken moneki ma tikueyichiuakan toTajtsin Dios?
MIAKEJ religiones kijtoaj tlamachtiaj tlen melauak itech toTajtsin Dios. Pero amo melauak porque tlatlamantli kijtoaj akin toTajtsin Dios uan ken moneki kiueyichiuaskej. Ik non, ¿ken tikmatiskej akinmej melauak kiueyichiuaj ken ye kineki? San ye uelis techiluis ken moneki tikueyichiuaskej.
2. ¿Tlen moneki tikchiuas para tikmatis ken moneki tikueyichiuaskej toTajtsin Dios?
2 Jehová otechmakak Biblia para ma tikmatikan ken tikueyichiuaskej, ik non, moneki ximomachti. Mitsititis ken mitspaleuis iTlajtol porque ye kineki xiyolpaki (Isaías 48:17).
3. ¿Tlen moneki tikchiuaskej?
3 Sekimej kijtoaj toTajtsin Dios kinselia nochtin religiones pero Jesús amo ijkon otlamachti. Ye okijto: “Amo nochteh akimeh nechiliah: ‘¡Noteko, Noteko!’, kalakiskeh kan Dios tlanawatia. Sanwel akimeh kichiwah tlan kimonekiltia Notajtsi non kajki ilwikak”. Non techititia moneki ma tikmatikan tlen kineki toTajtsin Dios uan ma tikchiuakan. Miak ipati ijkon tikchiuaskej porque Jesús okijto “tlajtlakolchijkeh” akinmej amo kitlakamatij toTajtsin Dios (Mateo 7:21-23).
4. ¿Tlen otechnejmachti Jesús?
4 Jesús okijto tikixnamikiskej miak ouijkayotl tla tiknekij tikchiuaskej tlen toTajtsin Dios kineki. Otechnejmachti ijkuak okijto: “Xikalakikah kan ik kaltentli non tsopijtik, porke patlawak n kaltentli iwa kuyawak n ojtli non tewika kan moixpoloah, iwa miakeh ik ompa yajtokeh. Pero n kaltentli iwa n ojtli non tewika kan nochipa se yolitos, saikpanoa tsopijtik iwa san sikimeh kajsi non ojtli” (Mateo 7:13, 14). Ojtli tlen pitsauak kineskayotia religión tlen melauak uan techpaleuis ma tikselikan yolilistli tlen amo keman tlamis. Ojtli tlen patlauak kineskayotia religión tlen amo melauak uan teixpoloa. Pero Jehová amo kineki ma tiixpoliuikan, ik non, nochtin kinkauilijtok ma kixmatikan (2 Pedro 3:9).
¿KEN TIKMATISKEJ AKINMEJ MELAUAK KIUEYICHIUAJ TOTAJTSIN DIOS KEN YE KINEKI?
5. ¿Ken tikmatis akinmej melauak kiueyichiuaj toTajtsin Dios ken ye kineki?
5 Jesús okijto tikitaskiaj seki tlamantli tlen kichiuaskiaj akinmej melauak kiueyichiuaj toTajtsin Dios. Ik non, moneki ma timomachtikan tlen kineltokaj uan tlen kichiuaj. Jesús okijto: “Nomejwah weletis nonkinmixmatiskeh ika tlan kichiwah”. Noijki okijto: “Nochi kuali kuawitl, kitemaka kuali itlakilo” (Mateo 7:16, 17). Nin amo kijtosneki amo tlajtlakolchiuaj akinmej kiueyichiuaj toTajtsin Dios pero mochijchikauaj kichiuaj tlen kuali. Ma tikitakan ken uelis tikmatiskej akinmej kiueyichiuaj toTajtsin Dios ken ye kineki.
6, 7. 1) ¿Tleka akinmej kiueyichiuaj toTajtsin Dios ken ye kineki tlamachtiaj tlen kijtoa Biblia? 2) ¿Tlen techmachtia tlen okichi Jesús?
6 Tlamachtiaj tlen kijtoa Biblia. Biblia kijtoa: “Nochi tiotlajkuíloli Dios otlanawati makijkuilokah, kuali matechmachtikah, ika matechnonotsakah, ika matechmilawakah iwa matechititikah kenijki tinemiskeh inawak Dios. Ijkó nochi akin ya tekone inawak Dios, kuali mamoixtlamachti iwa makimati kenijki kichiwas nochi tlan kuali” (2 Timoteo 3:16, 17). Tlatitlanil Pablo okinmilui akinmej okichiuayaj ken Cristo: “Ijkuak nomejwah ononkikakeh itlajtol Dios non tejwah otomechmatiltijkeh, nomejwah ononkiselijkeh kemi milák itlajtol Dios iwa amo san kemi intlajtol n tlakah” (1 Tesalonicenses 2:13). Biblia melauak iTlajtol toTajtsin Dios, ik non, akinmej kiueyichiuaj ken ye kineki tlamachtiaj tlen ompa kijtoa. Amo tlamachtiaj tlen yejuan mokuayejyekoaj nion costumbres.
7 Nochi tlen Jesús otlamachti okisaya itech iTlajtol toTajtsin Dios (xiktlajtolti Juan 17:17). Okijtoaya tlen ompa ijkuilitok (Mateo 4:4, 7, 10). Akinmej melauak kitekichiuiliaj toTajtsin Dios kichiuaj ken Jesús uan nochi tlen tlamachtiaj kisa itech Biblia.
8. ¿Tlen okijto Jesús?
8 San Jehová kiueyichiuaj. Salmo 83:18 kijtoa: “Te motoka Jehová, san te okachi tiUeyititok ipan nochi tlaltikpak”. Jesús okinekiaya nochtin ma kimatikan akin melauak toTajtsin Dios, ik non, okinmachti itoka (xiktlajtolti Juan 17:6). Jesús okijto: “Xikweyijkachiwa Moteko Dios [Jehová], iwa sanwel Ye tiktekichiwilis” (Mateo 4:10). Tiitekipanojkauan toTajtsin Dios tikchiuaj ken Jesús, san ye Jehová tikueyichiuaj, tiktekitiltiaj itoka uan tikinmachtiaj oksekimej. Noijki tiktematiltiaj tlen kichiuas toTajtsin Dios.
9, 10. ¿Ken tikteititiaj timotlasojtlaj?
9 Kiteititiaj melauak motlasojtlaj. Jesús okinnauati imachtijkauan ma motlasojtlakan (xiktlajtolti Juan 13:35). Tla timotlasojtlaj, san sekan tiyetoskej maski tlatlamantli toaltepe noso tla tikpiaj tomin noso amo (Colosenses 3:14). Ik non, amo tiauij itech guerra uan amikaj tikmiktiaj. Biblia kijtoa: “Weletis tikitas akin ikone n Totajtsi Dios, iwa akin ikone n diablo. Akin amo kichiwa tlan kuali, nion kitlasojtla ikni, amo ikone Dios”. Noijki kijtoa: “Matimosepantlasojtlakah. Amo matikchiwakah kemi Caín, ikone n diablo, non okimikti ikni” (1 Juan 3:10-12; 4:20, 21).
10 Ika tochikaualis uan ika tlen tikpiaj, tikinpaleuiaj uan tikinyolchikauaj tokniuan (Hebreos 10:24, 25). Moneki ma “tiktechiwilikan tlan kuale” (Gálatas 6:10, Itlajtol totajtzin Dios, [NHY]).
11. ¿Tleka moneki tiktlakamatiskej Jesús?
11 Moneki ma tiktlakamatikan Jesús porque omotemakak para techmakixtis. Biblia kijtoa amo “onka ok se tlakatl akin weletis techmakixtis, porke Dios [amo] otechmák ok se tlakatl itech nin tlaltíkpaktli para inawak matimomakixtikah” (Hechos 4:12). Itech tlamachtil 5 otimomachtijkej Jehová okiualtitlanki Jesús para ma motemaka inpatka akinmej tetlakamatij (Mateo 20:28). Jehová okipejpenki Jesús para ma yeto ueyi tekiua uan ye kinauatis tlaltikpak. Ik non, Biblia kijtoa moneki tiktlakamatiskej Jesús tla tiknekij nochipa tiyoltoskej (xiktlajtolti Juan 3:36, TNM).
12. ¿Tleka amo timokajkalakiaj itech política?
12 Amo mokajkalakiaj itech política. Jesús amo omokajkalaki itech política. Ijkuak okixkomakakej, okilui tekiua romano Pilato: “Notekiwajyo amo kajki itech nin tlaltíkpaktli” (xiktlajtolti Juan 18:36). Tejuan tikpaleuiaj iTekiuajkayo toTajtsin Dios ijkon ken okichi Jesús, ik non, maski san kanin tichantij, amo timokajkalakiaj itech política. Pero tikintlakamatij “tekiwajkeh” ijkon ken kijtoa Biblia (Romanos 13:1). Tikintlakamatij tlanauatilmej tlen onka itech toaltepe. Pero ijkuak technauatiaj ma tikchiuakan itlaj tlen toTajtsin Dios amo kipaktia, tikchiuaj ken okichijkej tlatitlanilmej. Yejuan okijtojkej: “Tejwah tikpiah tiktlakitaskeh tlan Dios kijtoa iwa amo tlan kijtoah n tlakah” (Hechos 5:29; Marcos 12:17).
13. ¿Tlen tiktematiltiaj kichiuas iTekiuajkayo toTajtsin Dios?
13 Kitematiltiaj san iTekiuajkayo toTajtsin Dios kiyektlalis nochi ouijkayotl. Jesús okijto “kuali tlajtolmej itech Tekiuajkayotl” motematiltiskia itech nochi tlaltikpak (xiktlajtolti Mateo 24:14, TNM). Nion se tekiua uelis kichiuas tlen iTekiuajkayo toTajtsin Dios kichiuas (Salmo 146:3). Jesús otechmachti ma tiktlajtlanikan iTekiuajkayo toTajtsin Dios ijkuak timotlatlaujtiaj, okijto: “Ma uiki moTekiuajkayo. Ma mochiua motlanekilis ompa iluikak uan noijki nikan tlaltikpak” (Mateo 6:10, TNM). Biblia kijtoa iTekiuajkayo toTajtsin Dios kinpojpolos nochtin tekiuajkayomej tlen axkan katej uan san ye nochipa tlanauatis (Daniel 2:44).
14. ¿Akinmej melauak kiueyichiuaj toTajtsin Dios ken ye kineki?
14 Yotimomachti miak tlamantli uan axkan ximotlajtlani: “¿Akinmej tlamachtiaj tlen kijtoa Biblia? ¿Akinmej kitematiltiaj itoka toTajtsin Dios? ¿Akinmej melauak motlasojtlaj? ¿Akinmej kineltokaj toTajtsin Dios okiualtitlanki Jesús para techmakixtis? ¿Akinmej amo mokajkalakiaj itech política? ¿Akinmej kitematiltiaj san iTekiuajkayo toTajtsin Dios kiyektlalis ouijkayotl tlen axkan onka?”. San iTlaixpantijkauan Jehová ijkon kichiuaj (Isaías 43:10-12).
¿TLEN TIKCHIUAS?
15. ¿Tlen moneki tikchiuaskej tla tiknekij toTajtsin Dios ma kiseli ken tikueyichiuaj?
15 Amo san moneki tikneltokaskej melauak kajki toTajtsin Dios porque amo kuali ejekamej noijki kineltokaj kajki pero amo kitlakamatij (Santiago 2:19). Tla tiknekij toTajtsin Dios ma kiseli ken tikueyichiuaj, amo san moneki tikneltokaskej, noijki moneki tikchiuaskej tlen technauatia.
16. ¿Tleka moneki tikkauaskej religión tlen amo melauak?
16 Para kiselis toTajtsin Dios ken tikueyichiuaj, noijki moneki tikkauaskej religión tlen amo melauak. Profeta Isaías okijto: “Xikisakan itlajkotia, xiyetokan nanchipauakej” (Isaías 52:11; 2 Corintios 6:17). Ik non, moneki tikixtopeuaskej nochi tlen kichiua religión tlen amo melauak.
17, 18. 1) ¿Tlen kijtosneki “weyi Babilonia”? 2) ¿Tleka moneki san niman xikkaua religión tlen amo melauak?
17 ¿Tlen kijtosneki religión tlen amo melauak? Kijtosneki nochi religiones tlen kijtoaj kiueyichiuaj toTajtsin Dios pero amo kichiuaj ken kijtoa Biblia. ITlajtol toTajtsin Dios kintokayotia nochi religiones “weyi Babilonia” (Apocalipsis 17:5). ¿Tleka? Satepan ijkuak oatemik tlaltikpak, ompa Babilonia opejkej tlamachtiaj tlen amo melauak uan omotematilti itech nochi tlaltikpak. Ompa okinueyichiuayaj ejeyi dioses uan axkan noijki miakej kijtoaj toTajtsin Dios se trinidad. Pero Biblia kijtoa san ye Jehová akin melauak toTajtsin Dios uan Jesús iKone (Juan 17:3). Akinmej ochantiayaj Babilonia okineltokayaj ijkuak ikaj oixpoliuiaya ok omokauaya itlaj tlen oyoltoka tlen uelis kanaj tlatlatoskia pero non amo melauak (xikita nota 14, 17 uan 18).
18 ToTajtsin Dios yokijto amo miak poliui kintlajtlamiskej nochi religiones tlen amo melauakej (Apocalipsis 18:8). ¿Tikajsikamati tleka moneki san niman xikkaua religión tlen amo melauak? Jehová kineki totoka ijkon xikchiua (Apocalipsis 18:4).
Tla tiktekichiuilis Jehová, tikinmajsis miakej tokniuan itech nochi tlaltikpak tlen yetoskej ken mokalchanejkauan.
19. ¿Ken mitsmaluis toTajtsin Dios tla tiktekichiuilis?
19 Tla tikkauas religión tlen amo melauak uan tiktekichiuilis Jehová, xamo mokalchanejkauan uan akinmej iuan timouika amo kajsikamatiskej tleka ijkon tikchiua uan mitstlajyouiltiskej. Pero Jehová mitsmaluis. Tikinmajsis miakej tokniuan itech nochi tlaltikpak tlen yetoskej ken mokalchanejkauan tlen melauak motlasojtlaj. Noijki satepan uelis nochipa tiyoltos itech xochitlali (Marcos 10:28-30). Xamo sekimej tlen axkan mitsiluiaj amo xiktekichiuili Jehová, satepan noijki kinekiskej momachtiskej Biblia.
20. ¿Tleka moneki timochijchikauas tikueyichiuas toTajtsin Dios ken ye kineki?
20 Ayakmo miak poliui toTajtsin Dios kitlajtlamis tlen amo kuali uan iTekiuajkayo ualtlanauatis (2 Pedro 3:9, 13). ¡Melauak tiyolpakiskej! Nochtin kiueyichiuaskej toTajtsin Dios ken ye kineki. Ik non, moneki ximochijchikaua uan xikueyichiua toTajtsin Dios ken ye kineki.
Xamo noijki mitspaktis
TLEN MIAKEJ MOTLAJTLANIAJ
ITlaixpantijkauan Jehová, ¿kinchiualtiaj oksekimej makipatlakan inreligión?
ITlaixpantijkauan Jehová tetlapouiaj, ¿kijtosneki kinchiualtiaj oksekimej mamochiuakan idiscípulos Jesús? ¿Kinchiualtiaj makipatlakan inreligión?
DOCUMENTALES
ITlaixpantijkauan Jehová: akinmej melauak tlaneltokaj. Tlaxelol 1: Okiskej itech tlen amo melauak
Tikitaj inneskayo sekimej tlaltikpaktlakamej tlen okiskej itech tlen amo melauak maski okintlajyouiltijkej. Inneskayo techpaleuis pampa tiktekichiuiliskej toTajtsin Dios.
