1, 2. 1) ¿Tleka timokuayejyekoa ijkuak tiktlatlaujtiaj Jehová se kualtsin tetliokolil? 2) ¿Tleka moneki ma tikmatikan ken kineki Jehová ma tiktlatlaujtikan?

TLALTIKPAK amo ueyi ken semanauak. Tejuan tikatej ken tepitsin atl ixpan Jehová (Salmo 115:15; Isaías 40:15). Semanauak sapanoa ueyi uan tejuan titsikitsitsintin pero Biblia kijtoa: “Jehová amo uejka kajki itech akinmej kitlatlaujtiaj, itech nochtin akinmej kinotsaj ika tlen melauak. Ye kinmaka tlen kinekij akinmej kimauiliaj; ye kinkaki ijkuak kitlatlaujtiaj ma kinpaleui uan kinmakixtia” (Salmo 145:18, 19). Jehová akin okichijchi nochi tlen onka uan akin kipia sapanoa miak chikaualistli, kineki touan mouikas. Se ueyi tlateochiualistli techkaki ijkuak tiktlatlaujtiaj. Jehová techkauilia iuan ma timotlapouikan uan non ken se kualtsin tetliokolil tlen tinochtin techmaka.

² Jehová techkakis tla tiktlatlaujtiaj ken ye kineki. ¿Ken uelis ijkon tikchiuaskej? Ma tikitakan tlen techmachtia Biblia.

3. ¿Tleka moneki xiktlatlaujti Jehová?

³ Jehová kineki xiktlatlaujti uan ijkon iuan timotlapouis. ¿Ken tikmatij? Ximokuayejyeko tlen Jehová mitsiluia xikchiua itech Filipenses 4:6, 7 (xiktlajtolti). Akin okichijchi semanauak kitekipachoa tlen mitspanoa uan kineki xikilui tlen tikmachilia uan tlen ouijkayotl tikpia.

4. ¿Tlen panos tla nochipa tiktlatlaujtiaj Jehová uan tleka?

 ⁴ Okachi kuali timouikaj iuan Jehová ijkuak tiktlatlaujtiaj. Ijkuak iuan ikaj timouikaj uan tikiluiaj tlen timokuayejyekoaj, tlen techtekipachoa uan tlen tikmachiliaj, okachi peua timotlasojtlaj. Ijkon kichiua Jehová, ye yomitsilui ika Biblia tlen mokuayejyekoa uan tlen kimachilia. Noijki yomitsilui tlen kichiuas satepan. Tejuatsin noijki xikilui nochi tlen tikmachilia. Tla nochipa timotlatlaujtia, okachi kuali iuan timouikas (Santiago 4:8).

5. ¿Ken tikmatij Jehová amo nochtin kinkaki?

⁵ ¿Nochtin kinkaki Jehová? Amo. Ijkuak okatka profeta Isaías, Jehová okinmilui israelitas: “Maski nanmotlatlaujtiskej miak, ne amo namechkaki; porque namomauan kipiaj miak estli” (Isaías 1:15). Tla amo timomaluiaj, uelis tikchiuaskej itlaj tlen kichiuas ayakmo ma timouikakan iuan Jehová uan ye ayakmo techkakis.

6. 1) ¿Tleka moneki ma titlaneltokakan? 2) ¿Ken tikteititiskej melauak titlaneltokaj?

 ⁶ Tla tiknekij ma techkaki Jehová, moneki itech ma titlaneltokakan (Marcos 11:24). Tlatitlanil Pablo okijto: “Pero tla se amo kipia tlaneltokálistli, [amo] weletis tikpaktis Dios, porke akin [motokia] inawak Dios, moneki makineltoka Ye onka, iwa Ye kinmakas intlatliokolil akimeh kitemoah” (Hebreos 11:6). Pero amo san moneki tikijtoskej titlaneltokaj. Moneki nochipa ma tiktlakamatikan Jehová uan ijkon tikteititiskej melauak titlaneltokaj (xiktlajtolti Santiago 2:26).

7. 1) ¿Tleka moneki ma tiktlakaitakan Jehová uan ma tiyetokan tiyolyamankej ijkuak iuan timotlapouiaj? 2) ¿Ken tikteititiaj tikiluiaj Jehová tlen tikpiaj itech toyolo?

⁷ Ijkuak tiktlatlaujtiaj Jehová moneki tikteititiskej tiyolyamankej uan tiktlakaitaj. ¿Tleka moneki ijkon tikchiuaskej? Tla timotlapouiskiaj iuan se ueyi tekiua, tiktlakaitaskiaj. Jehová kipia sapanoa miak chikaualistli, ik non, moneki okachi ma tiktlakaitakan uan ma tiyetokan tiyolyamankej ijkuak iuan timotlapouiaj (Génesis 17:1; Salmo 138:6). Noijki moneki ma tikiluikan tlen tikpiaj itech toyolo uan amo san ma tikkoptokan totlajtol (Mateo 6:7, 8).

8. ¿Tlen moneki tikchiuaskej ijkuak itlaj tiktlajtlaniliaj Jehová?

⁸ Noijki ijkuak tiktlatlaujtiaj Jehová ma techpaleui, moneki timochijchikauaskej tikchiuaskej ijkon ken otikiluijkej. Xamo tikiluiaj ma techpaleui ma tikpiakan tlen ika timopanoltiskej. Pero amo ma titlatsiuikan nion san ma tikchixtokan ma techmaka nochi tlen moneki. Tla ok ueli titekitij, chikauak ma titekitikan uan ma tikselikan tekitl tlen techmakaj (Mateo 6:11; 2 Tesalonicenses 3:10). Noijki tla tiktlatlaujtiaj Jehová ma techpaleui para amo tikchiuaskej tlen amo kuali, moneki  ma tikixtopeuakan tlen techyoltilanas ma titlajtlakolchiuakan (Colosenses 3:5). Axkan tikitaskej miakej kinekij kimatiskej ken moneki motlatlaujtiskej.

9. 1) ¿Akin moneki tiktlatlaujtiskej? 2) Ijkon ken kijtoa Juan 14:6, ¿tlen moneki tikchiuaskej ijkuak timotlatlaujtiaj?

⁹ ¿Akin moneki tiktlatlaujtiskej? Jesús okinmilui imachtijkauan ijkin ma motlatlaujtikan: “Totajtsi Dios non timoitstika ilwikak” (Mateo 6:9). Non kijtosneki san Jehová moneki tiktlatlaujtiskej. Jesús noijki okijto: “Ne ni ojtli nontewika inawak Dios, Ne nomechnonotsa ika milák tlájtoli, iwa Ne Akin kichiwa xiyolitokah. Sanwel akin nechtlakita weletis [motokis] inawak Notajtsi” (Juan 14:6). Non techmachtia moneki timotlatlaujtiskej ika itoka Jesús. ¿Tlen kijtosneki non? Tla tiknekij ma techkaki Jehová, moneki tiktlakaitaskej tekitl tlen okimakak iKone. Ijkon ken yotimomachtijkej Jesús ouala tlaltikpak otechmakixtiko itech tlajtlakoli uan mikilistli (Juan 3:16; Romanos 5:12). Noijki Jehová yokitlali Jesús ken Ueyi Teopixki uan Juez (Juan 5:22; Hebreos 6:20).

10. Xikyekijto kox moneki timotlankuaketsaskej noso timoketoskej ijkuak timotlatlaujtiaj.

¹⁰ ¿Moneki timotlankuaketsaskej noso timoketoskej ijkuak timotlatlaujtiaj? Amo. Jehová amo techiluia kox moneki timotlankuaketsaskej, timotlaliskej noso timoketoskej. Biblia kijtoa ijkuak timotlatlaujtiaj uelis tiyetoskej san ken tiknekiskej pero moneki tikteititiskej tiktlakaitaj Jehová (1 Crónicas 17:16; Nehemías 8:6; Daniel 6:10; Marcos 11:25). Jehová okachi kipatioita ma tiktlatlaujtikan ika nochi toyolo. Ijkuak timotlatlaujtiaj uelis mokakis tlen tikijtoaj noso amo. Noijki uelis  timotlatlaujtiskej maski san kanin tiyetoskej uan san tlen hora tiknekiskej, uelis timotlatlaujtiskej tlajka noso yoak. Jehová techkaki ijkuak tiktlatlaujtiaj maski oksekimej amo kikakij (Nehemías 2:1-6).

11. ¿Tlen uelis tikijtoskej ijkuak timotlatlaujtiaj?

¹¹ ¿Tlen uelis tikijtoskej ijkuak timotlatlaujtiaj? Uelis tikijtoskej tlen tiknekiskej pero amo ma kixnamiki tlen Jehová kineki. Biblia kijtoa: “Tikmatih Ye techkaki tla itla tiktlajtlaniliah non Ye kipaktia” (1 Juan 5:14). ¿Uelis tikijtoskej tlen techtekipachoa? Kema. Ijkuak tiktlatlaujtiskej Jehová moneki tikchiuaskej ken ijkuak timotlapouiaj iuan se toyolikni. Uelis tikiluiskej tlen timokuayejyekoaj uan tlen tikmachiliaj (Salmo 62:8). Noijki uelis tikiluiskej ma techmaka iespíritu santo uan ijkon tikchiuaskej tlen kuali (Lucas 11:13). Uelis tiktlatlaujtiskej ma techpaleui para tiyetoskej tiixtlamatkej uan ijkon tikpejpenaskej tlen kuali. Noijki uelis tikiluiskej ma techmaka chikaualistli para tikixnamikiskej ouijkayotl (Santiago 1:5). Moneki tiktlatlaujtiskej ma techtlapojpolui (Efesios 1:3, 7). Noijki moneki ma tiktlatlaujtikan ma kinpaleui oksekimej, ken tokalchanejkauan uan tokniuan tlen inmiuan timonechikoaj (Hechos 12:5; Colosenses 4:12).

12. ¿Tlen okachi moneki tikpatioitaskej ijkuak timotlatlaujtiaj?

¹² ¿Tlen okachi moneki tikpatioitaskej ijkuak timotlatlaujtiaj? Jehová uan itlanekilis. Moneki ika nochi toyolo ma tiktlasojkamatilikan nochi tlen techmaka (1 Crónicas 29:10-13). Ijkuak Jesús okinmilui imachtijkauan ken motlatlaujtiskej, okiteititi tlen moneki tikpatioitaskej (xiktlajtolti Mateo 6:9-13). Ye okijto achto moneki ma tiktlajtlanikan ma mochipaua itoka Jehová, non kijtosneki ma kitakan sapanoa chipauak. Jesús noijki  okijto ma tiktlajtlanikan ma uiki iTekiuajkayo toTajtsin Dios uan ma mochiua tlen ye kineki nikan tlaltikpak. Noijki okijto ijkuak yotikijtojkej tlen okachi ipati, uelis tikijtoskej tlen techtekipachoa. Ijkuak achto tikijtoaj tlen Jehová kipaktia uan tlen ye kineki, tikteititiaj non tlen okachi tikpatioitaj.

13. ¿Moneki tiuejkauaskej ijkuak timotlatlaujtiaj?

¹³ ¿Moneki tiuejkauaskej ijkuak timotlatlaujtiaj?  Biblia amo kijtoa, ik non, uelis tiuejkauaskej noso amo. Ijkuak titlakuaj uelis san totoka timotlatlaujtiskej pero ijkuak tiktlasojkamatiliaj Jehová noso tikiluiaj tlen techtekipachoa, uelis okachi tiuejkauaskej (1 Samuel 1:12, 15). Pero amo ma tiuejkauakan ijkuak timotlatlaujtiaj san para tikintlajtlachialtiskej oksekimej ijkon ken okichiuayaj ijkuak Jesús okatka nikan tlaltikpak (Lucas 20:46, 47). Jehová amo kipaktia ijkon ma tikchiuakan, ye kineki ma tiktlatlaujtikan ika nochi toyolo.

14. 1) ¿Keski uelta moneki timotlatlaujtiskej? 2) ¿Tlen techmachtia non itech Jehová?

¹⁴ ¿Keski uelta moneki timotlatlaujtiskej? Jehová techyoleua nochipa iuan ma timotlapouikan. Biblia kijtoa: “Ximotiotsajtsilikah”, “nochipa ximotiotsajtsilijtokah”  uan “ixmostla ximotiotsajtsilijtokah” (Mateo 26:41; Romanos 12:12; 1 Tesalonicenses 5:17). Jehová nochipa kineki techkakis, ik non, mojmostla ma tiktlasojkamatilikan techtlasojtla uan nochi tlen techmaka. Noijki uelis tiktlatlaujtiskej ma techyekana, ma techyolchikaua uan ma techyolseui. Nochipa tiktlapouiskej Jehová tla tikpatioitaj techkauilia ma tiktlatlaujtikan.

15. ¿Tleka ijkuak tlami timotlatlaujtiaj moneki ma tikijtokan “amén”?

¹⁵ ¿Tleka ijkuak tlami timotlatlaujtiaj moneki ma tikijtokan “amén”? Tlajtoli “amén” kijtosneki “ijkon ma mochiua” noso “melauak”. Ijkuak ijkon tikijtoaj tikteititiaj otimotlatlaujtijkej ika nochi toyolo (Salmo 41:13). Biblia noijki techmachtia moneki tikijtoskej “amén” ijkuak timotlatlaujtiaj iuan miakej, uelis mokakis noso amo ijkuak tikijtoskej. Ijkon tikteititiaj tiknekij ma mochiua tlen omoijto (1 Crónicas 16:36; 1 Corintios 14:16).

16. Xikyekijto kox melauak technankilia Jehová ijkuak tiktlatlaujtiaj.

¹⁶ ¿Kox melauak technankilia Jehová ijkuak tiktlatlaujtiaj? Kema. Biblia kijtoa toTajtsin Dios ‘kinkaki akinmej kitlatlaujtiaj’ uan ye technankilis (Salmo 65:2). Jehová techkaki ijkuak tiktlatlaujtiaj ika nochi toyolo uan tlatlamantli technankilia.

17. ¿Ken kintekitiltia Jehová ángeles uan itekipanojkauan para technankilis?

¹⁷ Jehová kintekitiltia ángeles uan itekipanojkauan para technankilis ijkuak tiktlatlaujtiaj (Hebreos 1:13, 14). Miakej omotlatlaujtijkej para kajsikamatiskiaj Biblia uan san niman se iTlaixpantijka Jehová okintlajpaloto. Non kiteititia ángeles techpaleuiaj ijkuak titetlapouiaj “kualitlájtoli” itech nochi tlaltikpak (xiktlajtolti  Apocalipsis 14:6). Noijki timiakej ijkuak otitlajyouijkej otiktlatlaujtijkej Jehová uan se tokni otechpaleui (Proverbios 12:25; Santiago 2:16).

18. ¿Ken kitekitiltia Jehová iespíritu santo uan Biblia para technankilis?

¹⁸ Jehová noijki kitekitiltia iespíritu santo para technankilis ijkuak timotlatlaujtiaj. Ijkuak tiktlatlaujtiaj ma techpaleui para tikxikoskej ouijkayotl, uelis kitekitiltis iespíritu santo para techyekanas uan techyolchikauas (2 Corintios 4:7). Noijki technankilia ika Biblia uan ijkon techpaleuia ma tikpejpenakan tlen okachi kuali. Ijkuak tiktlajtoltiaj xamo tikajsij seki textos tlen techpaleuiaj. Ijkuak timonechikoaj, Jehová noijki uelis kichiuas se tokni ma tlanankili itlaj tlen techpaleuis. Ualeua noijki kitekitiltia se tlayekanki para ma techititi itlaj tlen kijtoa Biblia (Gálatas 6:1).

19. ¿Tleka uelis timokuayejyekoskej Jehová amo technankilia?

¹⁹ Tla se tonal yotimotlajtlani tleka Jehová amo mitsnankilia, xikilnamikto ye kimatok keman technankilis uan ken kichiuas. Ye kimati tlen techpoloa. Xamo monekis ma tiktlatlaujtikan miak uelta para ijkon tikititiskej melauak tiknekij tlen otikiluijkej uan tikneltokaj ye techmakas (Lucas 11:5-10). Ualeua Jehová technankilia ken amo otimokuayejyekoayaj. Ma tikijtokan tikpiaj se ouijkayotl uan tikiluiaj ma techpaleui pero xamo amo techkixtilia tlen techtlajyouiltia, ye techyolchikaua para titlaxikoskej (xiktlajtolti Filipenses 4:13, TNM).

20. ¿Tleka moneki nochipa ma timotlatlaujtikan?

²⁰ Jehová techkauilia ma tiktlatlaujtikan uan non se kualtsin tetliokolil. Ma tikneltokakan ye techkaki (Salmo 145:18). Tla tiktlatlaujtiaj ika nochi toyolo, okachi kuali iuan timouikaskej.