1. ¿Akin otechmakak toyolilis?

JEHOVÁ “ye Dios akin yoltok” (Jeremías 10:10). Ye otechchijchi uan otechmakak toyolilis. Biblia kijtoa: “Tejwatsi otikchijchi nochi tlan onka, iwa tejwatsi otikmonekilti mayetokah, yika otikinchijchi” (Apocalipsis 4:11). Tiyoltokej porque Jehová ijkon okinek. Toyolilis se kualtsin tetliokolil tlen otechmakak toTajtsin Dios (xiktlajtolti Salmo 36:9).

2. ¿Tlen moneki tikchiuaskej?

² Jehová techmaka atl uan tlen tikkuaj para ma tiyoltokan (Hechos 17:28). Ye kineki ma tiyolpakikan (Hechos 14:15-17). Moneki tiktlakamatiskej uan ijkon kuali kisas nochi tlen tikchiuaskej (Isaías 48:17, 18).

3. ¿Tlen okichi Jehová ijkuak Caín okimikti Abel?

³ Biblia techmachtia Jehová sapanoa kipatioita toyolilis. Ma tikitakan tlen okipanok Caín itlayekankone Adán uan Eva. Caín sapanoa okualanki iuan ikni tlen omotokayotiaya Abel. Jehová okilui Caín amo ma kualanto. Pero ye amo okitlakamatki uan okachi okualanki, ik non, okiuitek Abel uan okimikti (Génesis 4:3-8). Caín sapanoa otlajyoui porque okimikti Abel (Génesis 4:9-13). Non techmachtia tla tikualanij uan ikaj tikkokoliaj, xamo tikteuiskej noso tikchiuaskej tlen amo kuali. Akinmej ijkon kichiuaj, amo kipiaskej yolilistli tlen amo keman tlamis (xiktlajtolti 1 Juan 3:15).  Tla tiknekij tikyolpaktiskej Jehová, moneki nochtin tikintlasojtlaskej (1 Juan 3:11, 12).

4. ¿Tlen techmachtia tlen Jehová otlanauati?

⁴ Opanok miak xiuitl uan Jehová okimakak Moisés majtlaktli tlanauatilmej. Se tlanauatil kijtoa: “Amo xitemikti” (Deuteronomio 5:17). Omonekiaya kimiktiskej akin san okinekiaya temiktis. Nin techmachtia Jehová melauak kipatioita toyolilis.

5. ¿Ken kita Jehová ijkuak ikaj kimayaui ikone?

⁵ ¿Ken kita Jehová ijkuak ikaj kimayaui ikone? Jehová sapanoa kipatioita se konetsintli maski ayamo nesi. Ijkon okiteititi itech se tlanauatil tlen okinmakak israelitas: tla ikaj okikojkoaya se siuatl tlen kipiaskia ikonetsin uan konetsintli omikiaya, akin otekojko noijki omonekiaya kimiktiskej (xiktlajtolti Éxodo 21:22, 23; Salmo 127:3). Non techititia Jehová amo kipaktia ma kinmayauikan konemej (xikita nota 28).

6. ¿Ken tikititiaj Jehová tikpatioitaj toyolilis?

⁶ ¿Ken tikititiaj Jehová tikpatioitaj toyolilis? Amo ma tikchiuakan itlaj tlen uelis kichiuas ma tiixpoliuikan tejuan noso oksekimej. Noijki, amo tiktekitiltiaj tabaco, amo tikchichinaj marihuana nion tiktekitiltiaj drogas, porque nochi non kichiuas ma timokokokan uan ma timikikan.

7. ¿Tlen techpaleuis ma tikkauakan tlen amo kuali?

⁷ ToTajtsin Dios otechmakak toyolilis uan totlalnakayo, ik non, moneki tiktekitiltiskej ken ye technauatia. Moneki nochipa timomaluiskej. Tla amo ijkon tikchiuaj, amo tiyetoskej tichipauakej ixpan toTajtsin Dios (Romanos 6:19; 12:1; 2 Corintios 7:1). Amo uelis tikueyichiuaskej tla amo tiktlakaitaj toyolilis, porque ye otechtliokoli. Xamo oui  techchiuilis tikkauaskej seki tlamantli uan costumbres tlen amo kuali. Pero Jehová techpaleuis tla tikpatioitaj toyolilis uan tiknekij tikkauaskej tlen amo kuali.

8. ¿Tlen moneki tikchiuaskej para timomaluiskej uan noijki oksekimej?

⁸ Yotikitakej toyolilis se kualtsin tetliokolil tlen otechmakak toTajtsin Dios. Ye kineki ma timomaluikan uan noijki ma tikinmaluikan oksekimej. Ik non, ijkuak tikuikaj carro, motocicleta noso okse tlamantli, tikuikaj ken moneki. Noijki amo timauiltiaj kanin uelis timokojkoskej noso tiixpoliuiskej, ken lucha libre noso okseki tlamantli (Salmo 11:5). Noijki kuali tikchijchiuaj tokalijtik para amitlaj ma techpano. Jehová okinnauati israelitas tla okichijchiuayaj se kali, omonekiaya kiyaualoskej ikuapak ika se tepamitl. ¿Tleka omonekiaya ijkon kichiuaskej? Ye okinmilui: “Para amo mitstlajtlakoltiskej tla ikaj uetsis uan mikis” (Deuteronomio 22:8).

9. ¿Tleka moneki tikinmaluiskej yolkamej?

⁹ Jehová noijki kineki ma tikinmaluikan yolkamej. Ye techkauilia ma tikinmiktikan para tikinkuaskej noso tla kinekij techkojkoskej (Génesis 3:21; 9:3; Éxodo 21:28). Pero amo kuali ma tikintlajyouiltikan yolkamej nion ma tikinmiktikan noso ma tikinchiualtikan ma moteuikan san para timoyolpaktiskej (Proverbios 12:10).

10. ¿Ken tikmatij estli kineskayotia toyolilis?

¹⁰ Jehová kipatioita estli porque kineskayotia toyolilis. Ik non, Caín otlajyoui porque okinokili ieso Abel noso okimikti (Génesis 4:10). Satepan ijkuak oatemik  tlaltikpak, Jehová noijki okitematilti estli kineskayotia toyolilis. Jehová okikauili Noé uan ikalchanejkauan ma kinkuakan yolkamej. Okinmilui: “Uelis nankinkuaskej nochtin yolkamej tlen yoltokej, noijki nochi xiuitl namechmaktilia”. Pero okinnauati se tlamantli: “San nakatl ika iyolilis, ieso, amo xikkuakan” (Génesis 1:29; 9:3, 4).

11. ¿Tlen otlanauati Jehová?

¹¹ Opanok kanaj 800 xiuitl desde ijkuak Jehová okinauati Noé amo ma kikua estli uan okilui ialtepe: “Tla se israelita noso akin uits itech okse altepetl chanti namouan, yaui kinkitskiti yolkamej uan kimiktis se yolkatl noso se tototl para kikuas, ieso moneki kinokis uan kitlaltemis”. Noijki okijto: “Amo xikkuakan ieso” (Levítico 17:13, 14). Jehová okinekiaya israelitas ma kipatioitakan estli, ik non, okinmilui uelis kikuaskiaj nakatl pero estli amo. Ijkuak okimiktiayaj se yolkatl para kikuaskiaj omonekiaya kinokiskej ieso ipan tlali.

12. ¿Ken tikitaj estli akinmej tikchiuaj ken Cristo?

¹² Seki xiuitl satepan ijkuak omikik Jesús, tlatitlanilmej uan tlayekankej tlen okatkaj Jerusalén omonechikojkej. Ijkuakon okijtojkej tlen tlanauatilmej tlen okinmakakej israelitas noijki omonekiaya kintlakamatiskej akinmej okichiuayaj ken Cristo (xiktlajtolti Hechos 15:28, 29; 21:25, TNM). Jehová okinpaleui ma kajsikamatikan ye kipatioita estli uan yejuan noijki omonekiaya kipatioitaskej. Itech achto siglo, akinmej okichiuayaj ken Cristo amo omonekiaya kikuaskej estli nion koniskej. Noijki amo okikuayaj nakatl tlen amo okikixtiliayaj estli. Porque tla ijkon kichiuaskiaj, yetoskia ken kinueyichiuaskiaj teotsitsintin noso  auilnemiskiaj. Ik non, axkan noijki akinmej tikchiuaj ken Cristo amo tikkuaj nion tikonij estli. Jehová ok kineki ma tikpatioitakan estli.

13. ¿Tleka akinmej tikchiuaj ken Cristo amo tikmotlaliliaj estli?

¹³ ¿Kijtosneki amo kuali tikmotlaliliskej estli akinmej tikchiuaj ken Cristo? Jehová kijtoa amo ma tikkuakan estli nion ma tikonikan. Ximokuayejyeko: tla akin tlapajtia mitsiluia amo xikoni alcohol, ¿tikmotlalilis ijtik motlaluayo? Amo. Noijki ijkon, ijkuak toTajtsin Dios technauatia amo ma tikkuakan estli nion ma tikonikan, noijki kijtosneki amo ma tikmotlalilikan (xikita nota 29).

14, 15. Maski akinmej tikchiuaj ken Cristo tikpatioitaj toyolilis, ¿tleka okachi tikpatioitaj tiktlakamatiskej toTajtsin Dios?

¹⁴ ¿Uan tla akin tlapajtia kijtoa tiixpoliuiskej tla amo techtlaliliskej estli? Tisejse tikijtoskej kox tiktlakamatiskej tlen technauatia Jehová. Tikmatij ye otechtliokoli toyolilis uan tiktlakaitaj. Ik non, tiktemoaj ken timopajtiskej pero amo tikmotlaliliaj estli.

¹⁵ Estli kineskayotia toyolilis uan toTajtsin Dios sapanoa kipatioita, ik non, maski timochijchikauaj timopajtiskej, amo tikmotlaliliaj estli. Okachi tikpatioitaj tiktlakamatiskej Jehová maski tiixpoliuiskej. Jesús okijto: “Porke akin kinekis kipalewis inemilis, kipolos. Tla aka kipoloa inemilis por ne, kajsis inemilis” (Mateo 16:25). Tiktlasojtlaj Jehová, ik non, tiknekij tiktlakamatiskej uan ye kimati tlen melauak techpaleuis. Ijkon ken Jehová kipatioita toyolilis tejuan noijki tikpatioitaj (Hebreos 11:6).

16. ¿Tleka akinmej melauak tikchiuaj ken Cristo tiktlakamatij tlen kijtoa toTajtsin Dios?

¹⁶ Akinmej melauak tikchiuaj ken Cristo tiktlakamatij  tlen toTajtsin Dios kijtoa itech estli. Ik non, amo tikkuaj estli, amo tikonij nion ika timopajtiaj. * Pero kema timopajtiaj ika okseki tlamantli porque tiknekij tiyoltoskej. ToTajtsin Dios otechmakak toyolilis uan otechtlalili toeso, ik non, san ye kimati tlen melauak techpaleuia. ¿Ijkon tikita tejuatsin?

17. ¿Keman okitekitiltiayaj estli israelitas?

¹⁷ Itech Tlanauatil tlen okijkuilo Moisés, Jehová okinnauati israelitas: “Yolilistli kajki itech estli uan ne noneuian oniktlali ipan altar para kinpojpoloskej namotlajtlakoluan, porque estli non tlen namechchipaua” (Levítico 17:11). Ijkuak israelitas otlajtlakolchiuayaj okiuikayaj se yolkatl ompa teokali, teopixki okimiktiaya uan okinokiaya seki ieso ipan altar, ijkon Jehová okintlapojpoluiaya. San ijkuakon okinkauiliaya israelitas ma kitekitiltikan estli.

18. ¿Ken techpaleuia topatka omotemakak Jesús?

¹⁸ Pero satepan ayakmo omonekiaya ma kintemakakan yolkamej, ijkon ken okijtoaya Tlanauatil. Porque ijkuak Jesús ouala nikan tlaltikpak, okitemakak iyolilis noso ieso para ma techtlapojpolui toTajtsin Dios (Mateo 20:28; Hebreos 10:1). Iyolilis Jesús sapanoa miak ipati uan ken topatka omotemakak, Jehová uelis kichiuas nochipa ma tiyoltokan (Juan 3:16; Hebreos 9:11, 12; 1 Pedro 1:18, 19).

19. ¿Tlen moneki tikchiuaskej para ‘amo totlajtlakol tla aka amo momakixtis’?

 ¹⁹ Sapanoa tiktlasojkamatiliaj Jehová otechtliokoli toyolilis. Ik non, tiknekij tikinmiluiskej nochtin tla tlaneltokaj itech imikilis Jesús, uelis kipiaskej yolilistli tlen amo keman tlamis. Tikintlasojtlaj, ik non, timochijchikauaj tikinmachtiaj tlen moneki kichiuaskej uan ijkon nochipa yoltoskej (Ezequiel 3:17-21). Ijkon uelis tikijtoskej ken tlatitlanil Pablo: “Amo notlajtlakol tla aka amo momakixtis. Porke ne onomechmatilti nochi tlan Dios kimonekiltia, iwa amitla onomechtlaatili” (Hechos 20:26, 27). Ijkuak tikintlapouiaj oksekimej itech Jehová uan tikinmititiaj ye kipatioita toyolilis, tikteititiaj tiktlakaitaj yolilistli uan estli.