1. ¿Tlen xamo tikneki tikmatis?

ITECH nin amochtli yotimomachti tlen melauak techmachtia Biblia. Yitikmati toTajtsin Dios techmakas yolilistli tlen amo keman tlamis, tlen techpanoa ijkuak tiixpoliuij uan oksepa yoltoskej akinmej yoixpolikej (Eclesiastés 9:5; Lucas 23:43, TNM; Juan 5:28,  29; Apocalipsis 21:3, 4). Xamo yitimonechikoa iuan iTlaixpantijkauan Jehová uan tikneltoka yejuan kiueyichiuaj toTajtsin Dios ken ye kineki (Juan 13:35). Noijki axkan okachi kuali timouika iuan Jehová uan tikneki tiktekichiuilis. Ik non, xamo tikneki tikmatis: “¿Tlen okachi moneki nikchiuas para niktekichiuilis toTajtsin Dios?”.

2. ¿Tleka omoapolakti se tlakatl?

² Itech achto siglo, se tlakatl tlen ialtepe okatka Etiopía ijkon omotlajtlani. Seki xiuitl satepan ijkuak Jehová okiyoliti Jesús, se imachtijka tlen omotokayotiaya Felipe okitlapoui non tlakatl uan okimachti Jesús okatka Mesías. Tlakatl okitlajtlachialti tlen omomachti, ik non, san niman okijto: “¡Xikita! Nikan onka atl, ¿tlen nechtsakuilia amo ma nimoapolakti?” (Hechos 8:26-36, TNM).

3. 1) ¿Tlen okinnauati Jesús imachtijkauan? 2) ¿Ken moneki ikaj moapolaktis?

³ Biblia kiyekijtoa tla tikneki tiktekichiuilis Jehová, moneki timoapolaktis. Jesús okinnauati imachtijkauan: “Xiakan xikinchiuakan nomachtijkauan itech nochi altepemej, xikinapolaktikan” (Mateo 28:19, TNM). Jesús noijki omoapolakti uan amo san okitlalilijkej tepitsin atl ipan itsonteko, nochi okiapolaktijkej (Mateo 3:16). Axkan, ijkuak ikaj kineki kichiuas ken Cristo, moneki nochi kiapolaktiskej.

4. ¿Tlen kiteititia akin moapolaktia?

⁴ Ijkuak ikaj moapolaktia kiteititia melauak kineki mouikas iuan toTajtsin Dios uan kitekichiuilis (Salmo 40:7, 8). Ik non, xamo tikneki tikmatis tlen moneki tikchiuas para timoapolaktis.

5. 1) ¿Tlen moneki tikchiuas tla tikneki timoapolaktis? 2) ¿Tleka moneki timonechikos?

⁵ Tla tikneki timoapolaktis, moneki kuali tikixmatis Jehová uan Jesús. Yopejki tikinmixmati porque yitimomachtijtok Biblia (xiktlajtolti Juan 17:3). Pero moneki tikchiuas okse tlamantli. Biblia kijtoa moneki kuali timomachtis tlen kineki toTajtsin Dios (Colosenses 1:9, TNM). Tla nochipa timonechikos, mitspaleuis okachi kuali ximouika iuan Jehová. Ik non, nochipa touan ximonechiko (Hebreos 10:24, 25).

6. ¿Moneki timomachtis nochi tlen kijtoa Biblia tla tikneki timoapolaktis?

⁶ Jehová amo mitstlajtlanilia achto moneki timomachtis nochi tlen kijtoa Biblia tla tikneki timoapolaktis. Amo okilui tlakatl tlen ialtepe okatka Etiopía achto omonekiaya momachtis miak uan satepan uelis moapolaktiskia (Hechos 8:30, 31). Nochipa timomachtijtoskej itech Jehová (Eclesiastés 3:11). Pero tla tikneki timoapolaktis, moneki timomachtis uan tikchiuas seki tlamantli tlen okachi ipati (Hebreos 5:12).

7. ¿Ken yomitspaleui tlen yotimomachti itech Biblia?

⁷ Biblia kijtoa: “Tla se amo kipia tlaneltokálistli, [amo] weletis tikpaktis Dios” (Hebreos 11:6). Ik non, moneki titlaneltokas para timoapolaktis. Biblia kijtoa sekimej tlen ochantiayaj Corinto okinkakej imachtijkauan Jesús, “okineltokakeh” uan omoapolaktijkej (Hechos 18:8). Noijki tlen yotimomachti itech Biblia yomitspaleui xikneltoka tlen toTajtsin Dios yokijto kichiuas uan itech imikilis Jesús, tlen uelis  techmakixtis itech tlajtlakoli uan mikilistli (Josué 23:14; Hechos 4:12; 2 Timoteo 3:16, 17).

8. ¿Tlen mitspaleuis xitetlapoui?

⁸ Okachi titlaneltokas ijkuak okachi timomachtis Biblia uan tikitas ken mitspaleuia itech monemilis. Noijki tiknekis titetlapouis tlen timomachtijtok (Jeremías 20:9; 2 Corintios 4:13). Pero ¿akin uelis tiktlapouis?

9, 10. 1) ¿Akinmej uelis tikintlapouis tlen timomachtijtok? 2) ¿Tlen moneki tikchiuas tla tikneki titetlapouis iuan tokniuan?

⁹ Xamo uelis tikintlapouis mokalchanejkauan, akinmej iuan timouikaj, kanin titekipanoa, kanin timomachtia noso akinmej chantij kanin tichanti. Kuali tla ijkon tikchiuas, pero ijkuak tikintlapouis xikteititi tikintlakaita uan kualtsin xikintlapoui. Satepan uelis titetlapouis iuan tokniuan. Ijkuak tikitas yiuelis titetlapouis, xikilui tokni tlen mitsmachtia tikneki titetlapouis iuan tokniuan. Tla akin mitsmachtia kita tiktlakamati tlen kijtoa Biblia uan mitsiluis yiuelis titetlapouis, satepan ome tlayekankej namouan motlapouiskej.

¹⁰ Tlayekankej mouan motlapouiskej uan kitaskej kox tikajsikamati, kox tikneltoka uan tiktlakamati tlen kijtoa Biblia. Noijki mitstlajtlaniskej kox melauak tikneki tiyetos tiiTlaixpantijka Jehová. Xikilnamikto tlayekankej kinmaluiaj nochtin tokniuan uan noijki tejuatsin. Ik non, amo ximomojti inmiuan timotlapouis (Hechos 20:28; 1 Pedro 5:2, 3). Satepan  tlayekankej mitsiluiskej tla yiuelis titetlapouis iuan tokniuan.

11. ¿Tleka achto moneki tikpatlas monemilis uan satepan uelis titetlapouis iuan tokniuan?

¹¹ Xamo tlayekankej mitsiluiskej achto moneki xikchiua seki tlamantli uan satepan uelis titetlapouis iuan tokniuan. ¿Tleka moneki ijkon tikchiuas? Ijkuak titetlapouiaj tikteititiaj tiktekichiuiliaj toTajtsin Dios. Ik non, moneki tikueyichiuaskej ika nochi tlen tikchiuaj (1 Corintios 6:9, 10; Gálatas 5:19-21).

12. ¿Tleka moneki se moyolkopas?

¹² Noijki moneki tikchiuas okse tlamantli achto timoapolaktis. Tlatitlanil Pedro okijto: “Por eso, ximoyolkopakah iva ximokuapakah inavak toYejwatzi, para ma imechtlapojpolvi de inmotlajtlakol” (Hechos 3:19, Itlajtol Totajtzin Dios [NSUNT]). ¿Tlen kijtosneki timoyolkopaskej? Kijtosneki timoyolkokoaj porque otikchijkej itlaj tlen amo kuali. Ma tikijtokan otiauilnenki uan axkan moneki timoyolkopas. Uan maski nochipa timochijchikaua tikchiuas tlen kuali, noijki moneki timoyolkopas porque tinochtin titlajtlakolchiuaj uan moneki ma techtlapojpolui Jehová (Romanos 3:23; 5:12).

13. ¿Tlen kijtosneki “ximokuapakah”?

¹³ ¿San moneki ma timoyolkokokan porque otikchijkej tlen amo kuali? Amo. Tlatitlanil Pedro noijki okijto “ximokuapakah” noso ximokopakan. Nin kijtosneki ayakmo tikchiuaskej tlen amo kuali uan timochijchikauaskej tikchiuaskej tlen kuali. Ma  tikijtokan titlaixmatiti itech se altepetl. Pero satepan timotlapololtia uan oksekan tio. ¿Tlen tikchiuas? Timokopas uan tias itech ojtli tlen mitsuikas kanin tikneki tias. Noijki ijkon, ijkuak peua timomachtia Biblia, tikita moneki tikpatlas monemilis. Ik non, xikpatla tlen moneki uan xikchiua tlen kuali.

14. ¿Ken uelis timotemakas ixpan toTajtsin Dios?

¹⁴ Para timoapolaktis, achto moneki timotemakas ixpan toTajtsin Dios. Ijkuak ikaj kineki motemakas, motlatlaujtia uan kiluia Jehová san ye kiueyichiuas uan noijki okachi kipatioitas kitekichiuilis (Deuteronomio 6:15).

15, 16. ¿Tleka ikaj motemaka ixpan toTajtsin Dios?

¹⁵ Tikiluis Jehová san ye tiktekichiuilis yetoskia ken tikiluis monamik nochipa iuan tiyetos. Ma tikijtokan se telpochtli kipia inovia, ijkuak okachi kixmati, okachi kitlasojtla uan kineki iuan monamiktis. Moneki kuali mokuayejyekos tla kineki monamiktis porque amo san ajauili, pero kitlasojtla inovia ika nochi iyolo, ik non, iuan monamiktis.

¹⁶ Noijki ijkon, ijkuak okachi tikixmati Jehová, okachi tiktlasojtla uan timochijchikaua tiktekichiuilis. Ik non, satepan ixpan timotemakas. Jesús okinmilui imachtijkauan: “Tla aka kinekis yetos notlamachtijkau, ayakmó makichiwa san tlan ye kineki” (Marcos 8:34). Non kijtosneki okachi tikpatioitas tiktlakamatis Jehová. Nochipa timochijchikauas tikchiuas tlen kineki uan amo tlen mitspaktia (xiktlajtolti 1 Pedro 4:2).

17. ¿Tleka miakej amo motemakaj ixpan Jehová?

¹⁷ Sekimej mokuayejyekoaj amo uelis kitekichiuiliskej Jehová, ik non, amo ixpan motemakaj. Xamo amo kinekij kiyolkokoskej. Noso mokuayejyekoaj tla kichiuaskej itlaj, ye amitlaj kinmiluis porque ayamo ixpan motemakaj.

18. ¿Tlen mitspaleuis amo tikyolkokos Jehová?

¹⁸ Amo tikyolkokos Jehová tla tiktlasojtla ika nochi moyolo. Noijki mitsyolinis timochijchikauas tiktekichiuilis ijkon ken otikilui (Eclesiastés 5:4; Colosenses 1:10). Amo sapanoa oui tikitas tikchiuas tlen kineki toTajtsin Dios. Tlatitlanil Juan okijto: “Tejwah tiktenextiah tiktlasojtla Dios keman tikintlakitah itlanawatilwah, iwa amo owi se kintlakita” (1 Juan 5:3).

19. ¿Tleka uelis timotemakaskej ixpan Jehová?

¹⁹ Uelis timotemakaskej ixpan Jehová maski titlajtlakolejkej. Ye amo techiluia ma tikchiuakan itlaj tlen amo uelis tikchiuaskej (Salmo 103:14). Jehová mitspaleuis xikchiua tlen kuali (Isaías 41:10). Ika nochi moyolo itech xitlaneltoka uan “ye kichiuas kuali xikpia monemilis” (Proverbios 3:5, 6).

20. ¿Tlen yiuelis tikchiuas ijkuak yotimotemakak ixpan Jehová?

²⁰ ¿Yiuelis timotemakas ixpan toTajtsin Dios? Ijkuak ixpan yotimotemakak yiuelis timoapolaktis.

21, 22. ¿Ken uelis ‘tiktematiltis titlaneltoka’?

²¹ Ijkuak yotimotemakak ixpan Jehová, xikilui tokni tlen kinyekana tlayekankej yotimotemakak uan  tikneki timoapolaktis. Tokni kinmiluis sekimej tlayekankej mouan ma kiojpauikan seki tlamachtilmej tlen kijtoa Biblia. Tla kitaskej yiuelis timoapolaktis, mitsiluiskej ximoapolakti itech se ueyi nechikol tlen yimochiuas. Itech ueyi nechikol  kintlapouiskej akinmej moapolaktiskej uan kinmiluiskej tlen kijtosneki ijkuak timoapolaktiaj. Tokni tlen kitemakas tlapoualistli kintlajtlanis ome tlamantli akinmej moapolaktiskej. Ijkuak titlanankilis, ‘tiktematiltis titlaneltokaʼ (Romanos 10:10).

 ²² Ijkuakon yiuelis timoapolaktis. Nochi mitskalakiskej ijtik atl. Ijkuak timoapolaktis tikteititis yotimotemakak ixpan Jehová uan tiiTlaixpantijka.

23. ¿Tlen kijtosneki timoapolaktis “ika itoka toTajtsin, iKone uan espíritu santo”?

²³ Jesús okijto imachtijkauan moapolaktiskiaj “ika itoka toTajtsin, iKone uan espíritu santo” (xiktlajtolti Mateo 28:19, TNM). ¿Tlen kijtosneki? Kijtosneki tikajsikamatij san Jehová kinamiki tlanauatis, tikajsikamatij ken tlapaleuia Jesús uan ken toTajtsin Dios kitekitiltia iespíritu santo para kichiuas tlen kineki (Salmo 83:18; Mateo 28:18; Gálatas 5:22, 23; 2 Pedro 1:21).

24, 25. 1) ¿Tlen tikteititiaj ijkuak timoapolaktiaj? 2) ¿Tlen tikitaskej itech okse tlamachtil?

²⁴ Miak ipati timoapolaktis. Ijkuak mitsapolaktiskej tikteititis tikkaua monemilis tlen achto otikpiaya. Ijkuak tikisas ijtik atl, kijtosneki peua yankuik monemilis para tikchiuas tlen Jehová kineki. Ijkon tikteititia tiaxka toTajtsin Dios. Otikmakak monemilis Jehová, amikaj okse, nion se grupo nion se tekitl.

²⁵ Ijkuak timotemakas ixpan Jehová okachi kuali iuan timouikas (Salmo 25:14). Pero amo timomakixtis san porque yotimoapolakti. Tlatitlanil Pablo okijto: “Xikmosenmakakah itech nomotemakixtilis” (Filipenses 2:12). Ijkuak timoapolaktis yikin peuas okachi timochijchikauas para timomakixtis. ¿Tlen mitspaleuis nochipa ximouika iuan Jehová? Itech okse tlamachtil tiknankiliskej nin tlajtlanilistli.