BIBLIA amo techiluia tlen metstli oneski Jesús. Maski ijkon, techititia seki tlamantli pampa tikneltokaskej amo oneski itech metstli diciembre.

Itech Belén, se altepetsintli kanin oneski Jesús, ¿ken okatkaj tonalmej itech metstli diciembre? Itech calendario judío okipiaya se metstli tlen omotokayotiaya kislev, tlen peua itlajkotia noviembre uan tlami itlajkotia diciembre, itech nin metstli sapanoa seua uan kiaui. Satepan okatka se metstli tlen omotokayotiaya tebet, tlen peua itlajkotia diciembre uan tlami itlajkotia enero, se metstli kanin sapanoa seua uan ualeua uetsi setl ipan tepemej. Ma tikitakan tlen kijtoa Biblia ken okatka altepetl.

 Esdras, se tlakatl tlen noijki okijkuilo Biblia, kiteititia kislev okatka se metstli kanin sapanoa seua uan kiaui. Kijtoa “itech metstli chiknaui [kislev], itech tonal 20” omonechikojkej sekimej itech Jerusalén uan “ouiuiyokayaj pampa [...] sapanoa okiauiaya”. Noijki kijtoa tlen okijtoayaj tlaltikpaktlakamej itech ken okatkaj non tonalmej: “Itech ninmej tonalmej sapanoa kiaui. Amo uelis timokauaskej kiauak” (Esdras 10:9, 13; Jeremías 36:22). Ik non, ijkuak yiualasiskia diciembre, tlajpixkej okinmololoayaj inmichkauan pampa amo mokauaskia kiauak.

Maski ijkon, itech Biblia kijtoa yoak ijkuak oneski Jesús, okatkaj kiauak sekimej tlajpixkej tlen okinmaluijtokaj inmichkauan. Uan Lucas, se akin okijkuilo Biblia, kijtoa ik Belén okatkaj tlajpixkej “non okin[maluijtokaj] inmichkauan itech tlajtlala” (Lucas 2:8-12). Ken tikitaj amo san ompa onemiayaj noijki ochantiayaj. Okinpiayaj inmichkauan ompa ijkuak yiyoak. Tla itech Belén itech metstli diciembre sapanoa oseuaya uan okiauia, ¿uelis tikijtoskej tlajpixkej okatkaj kiauak? Amo. Ik non, ken okatka ijkuak oneski Jesús, techititia amo oneski itech metstli diciembre. *

ITlajtol toTajtsin Dios kema techititia keman omikik Jesús, maski ijkon, amo techiluia keman oneski. Nin techilnamiktia itlajtoluan ueyi tekiua Salomón: “Okachi kuali se kuali tokayotl uan amo tlen chiauak, uan tonal ijkuak timikij uan amo ijkuak tinesij” (Eclesiastés 7:1). Moajsikamati tleka Biblia san kijtoa iteki uan imikilis Cristo, uan amo okachi tlajtoa ijkuak ye oneski.