TLAMACHTIL 19
¿Melauak kichiuaj ken Cristo iTlaixpantijkauan Jehová?
TiiTlaixpantijkauan Jehová tikneltokaj tikchiuaj ken Cristo. ¿Tleka ijkon tikijtouaj? Matikitakan kanin kisa tlen tikneltokaj uan tleka ijkon timotokayotiaj, noijki matikitakan ken tikteititiaj timotlasojtlaj.
1. ¿Kanin kisa tlen kineltokaj iTlaixpantijkauan Jehová?
Jesús okilui toTajtsin Dios: “Melauak tlen kijtoua motlajtol” (Juan 17:17). TiiTlaixpantijkauan Jehová tikchiuaj ken Jesús: tlen tikneltokaj kisa itech iTlajtol toTajtsin Dios. Xikita ken opejkej kitekichiuiliaj Jehová iTlaixpantijkauan. Kanaj itech xiuitl 1870, sekimej opejkej momachtiaj iTlajtol toTajtsin Dios. Yejuan okineltokayaj tlen omomachtiayaj itech Biblia, maski amo ijkon otlamachtiayaj teopan. Satepan opejkej kintlapouiaj oksekimej tlen omomachtijtokaj. a
2. ¿Tleka timotokayotiaj tiiTlaixpantijkauan Jehová?
Jehová kintokayotia iTlaixpantijkauan akinmej kiueyichiuaj porque yejuan kitematiltiaj akin ye (Hebreos 11:4-12:1). Yiuejkika toTajtsin Dios okinmilui itekipanojkauan: “Namejuan notlaixpantijkauan” (xiktlajtolti Isaías 43:10). Biblia kijtoua Jesús iTlaixpantijka Jehová tlen nochipa kitlakamati (Apocalipsis 1:5). Ikinon itech xiuitl 1931 otimotokayotijkej tiiTlaixpantijkauan Jehová uan tiyolpakij porque ijkon timotokayotiaj.
3. ITlaixpantijkauan Jehová motlasojtlaj ijkon ken Jesús okichi
Jesús okintlasojtlaya akinmej okichiuayaj ken ye, ken yetoskia ifamilia (xiktlajtolti Marcos 3:35). TiiTlaixpantijkauan Jehová noijki kuali timouikaj, yetoskia ken tipouij itech se familia, ikinon oksekimej iTlaixpantijkauan Jehová tikinmiluiaj “tokniuan” (Filemón 1, 2). Noijki tiktlakamatij nin tlanauatil: “Xikintlasojtlakan nochtin tokniuan” (1 Pedro 2:17). TiiTlaixpantijkauan Jehová tikteititiaj timotlasojtlaj porque tikinpaleuiaj tokniuan ijkuak tlajyouiaj.
MATIMOMACHTIKAN
Matikitakan ken opejkej momachtiaj iTlaixpantijkauan Jehová uan noijki matikitakan tleka tikneltokaj melauak tikchiuaj ken Cristo.
Tlen kineltokaj akinmej melauak kichiuaj ken Cristo kisa itech Biblia uan kitematiltiaj tlen ompa kijtoua.
4. Tlen tikneltokaj kisa itech Biblia
Jehová okijto okachi kuali tikajsikamatiskiaj iTlajtol. Xiktlajtoltikan Daniel 12:4 uan satepan xikitakan tlen namechmachtia.
-
¿Tlen momiaktiliskia ijkuak itekipanojkauan toTajtsin Dios momachtiskiaj Biblia?
Xikita ken Charles Russell uan oksekimej omomachtijkej Biblia. Xikitakan VIDEO uan satepan xikitakan tlen namechmachtia.
-
Ijkon ken otikitakej itech video, ¿ken omomachtiaya Biblia Charles Russell uan oksekimej?
¿Otikmatiaya?
Ualeua tikpatlaj tlen achto otikneltokayaj. ¿Tleka ijkon tikchiuaj? Porque toTajtsin Dios techpaleuia okachi matikajsikamatikan iTlajtol, ijkon ken ijkuak tlanesi, ye techkauilia matikitakan tlen onka (xiktlajtoltikan Proverbios 4:18). Maski Biblia amo mopatla, ualeua okachi kuali tikajsikamati tlen kijtoua, ikinon tikyektlaliaj tlen timokuayejyekouaj.
5. TiiTlaixpantijkauan Jehová tiktematiltiaj akin ye
¿Tleka timotokayotiaj tiiTlaixpantijkauan Jehová? Xikitakan VIDEO uan satepan xikitakan tlen namechmachtia.
-
¿Tleka technamiki matimotokayotikan tiiTlaixpantijkauan Jehová?
¿Tleka Jehová otechpejpenki para matiyetokan tiiTlaixpantijkauan? Porque miakej tlakajkayauaj uan kijtouaj seki tlamantli tlen amo kichiua Jehová, ikinon iTlaixpantijkauan kiteititiaj amo melauak tlen oksekimej kijtouaj. Matikitakan ken tlakajkayauaj oksekimej.
Sekimej kijtouaj toTajtsin Dios kineki matikueyichiuakan ika imágenes. ¿Melauak tlen kijtouaj? Xiktlajtoltikan Levítico 26:1 uan satepan xikitakan tlen namechmachtia.
-
Ijkon ken otiktlajtoltijkej, ¿tlen technauatia toTajtsin Dios? ¿Kineki matikueyichiuakan ika imágenes?
Sekimej kijtouaj Jesús ye toTajtsin Dios, pero ¿melauak tlen yejuan kijtouaj? Xiktlajtoltikan Juan 20:17 uan satepan xikitakan tlen namechmachtia.
-
Ijkon ken otiktlajtoltijkej, ¿toTajtsin Dios uan Jesús san se?
-
¿Tlen timokuayejyekoua ijkuak tikajsikamati Jehová kinmiluia iTlaixpantijkauan makitematiltikan akin ye uan noijki akin Jesús?
6. Tinochtin timotlasojtlaj
Biblia kijtoua moneki san sekan tiyetoskej ijkon ken totlalnakayo sasalitok. Xiktlajtoltikan 1 Corintios 12:25, 26 uan satepan xikitakan tlen namechmachtia.
-
¿Tlen moneki kichiuaskej akinmej kichiuaj ken Cristo ijkuak inmikniuan tlajyouiaj?
-
¿Tleka tikijtoskia iTlaixpantijkauan Jehová motlasojtlaj?
Ijkuak iTlaixpantijkauan Jehová tlajyouiaj, san niman kinmiluiaj inmikniuan makinpaleuikan. Xikita tleka ijkon tikijtouaj, xikitakan VIDEO uan satepan xikitakan tlen namechmachtia.
-
¿Timokuayejyekoua iTlaixpantijkauan Jehová kiteititiaj motlasojtlaj ijkuak kinpaleuiaj oksekimej? ¿Tleka ijkon tikijtoua?
Akinmej melauak kichiuaj ken Cristo kintlasojtlaj oksekimej uan kinpaleuiaj.
SEKIMEJ KIJTOUAJ: “Amo yiuejkika katej iTlaixpantijkauan Jehová”.
-
¿Keman opejki Jehová kintokayotia “noTlaixpantijkauan” akinmej kitekichiuiliaj?
XIKILNAMIKTO
ITlaixpantijkauan Jehová melauak kichiuaj ken Cristo. Tipouij iuan oksekimej tokniuan tlen noijki kiueyichiuaj toTajtsin Dios. Tlen tikneltokaj kisa itech Biblia uan tiktematiltiaj akin Jehová.
Matikojpauikan
-
¿Tleka timotokayotiaj tiiTlaixpantijkauan Jehová?
-
¿Ken tikteititiaj tinochtin timotlasojtlaj?
-
¿Tikneltoka iTlaixpantijkauan Jehová melauak kichiuaj ken Cristo?
NIN NOIJKI MITSPAKTIS
Xikita ken iTlaixpantijkauan Jehová opejkej kitekichiuiliaj.
Los testigos de Jehová: una historia de fe viva. Parte 1: Salen de la oscuridad (1:00:53)
Xikita tlen tlamantli kuali yokajsikamatkej iTlaixpantijkauan Jehová.
Xikmati seki tlamantli tlen kichiuaj iTlaixpantijkauan Jehová.
“Tlen miakej motlajtlaniaj” (Nin tlamachtil kajki itech jw.org/ncx)
Stephen otekokoliaya, ikinon okichi miak tlamantli amo kuali. Xikita tlen okipakti ijkuak okinmixmatki iTlaixpantijkauan Jehová uan tleka ayakmo okichi tlen amo kuali.
a Revista Akin Tetlapouijtok opejki tikchijchiuaj itech xiuitl 1879 uan nin revista okachi tikxejxelouaj.
Xamo noijki mitspaktis
TLEN MIAKEJ MOTLAJTLANIAJ
¿Ken tlamachtiaj iTlaixpantijkauan Jehová?
Ijkuak mitstlajpalotiuij iTlaixpantijkauan Jehová uelis timomachtis ika moBiblia. Noijki uelis tikinyoleuas mofamilia noso moyolikniuan mouan mamomachtikan.
