TLAMACHTIL 52
¿Tleka moneki kuali timotlakentiskej uan timoyektlaliskej?
Tinochtin tlatlamantli techpaktia timotlakentiskej uan timoyektlaliskej. Pero tla tikchiuaj tlen kijtoua Biblia, timotlakentiskej uan timoyektlaliskej ijkon ken kipaktia Jehová. Matikitakan tlen kijtoua Biblia.
1. ¿Tlen principios bíblicos uelis techpaleuiskej para tikmatiskej ken timotlakentiskej?
Akinmej kichiuaj ken Cristo moneki “mamoyektlakentikan uan intlaken makiteititi yejuan yolyamankej uan kuali mokuayejyekouaj”. Noijki mayetokan chipauakej uan ijkon makiteititikan “kiueyichiuaj toTajtsin Dios” (1 Timoteo 2:9, 10). Matikitakan naui principios tlen techmachtia nin texto. (1) Matimotlakentikan ken moneki. Xamo yotikitak nochtin tokniuan tlatlamantli motlakentiaj pero nochtin kiteititiaj kitlakaitaj toTajtsin Dios. (2) Kuali timotlakentiskej noijki kijtosneki amo mayeto tilintok noso tepontik totlaken, ijkon amo san techitaskej. (3) Tikteititiskej ‘kuali timokuayejyekouaj’ tla amo timotlakentiaj ken akinmej amo kitekichiuiliaj Jehová. (4) Ken timoyektlaliaj moneki kiteititis tiktlakaitaj toTajtsin Dios uan san ye tikueyichiuaj (1 Corintios 10:31).
2. ¿Ken kitaskej oksekimej tokniuan ken timotlakentiaj?
Uelis tikpejpenaskej ken timotlakentiskej pero moneki tikilnamiktoskej ken kitaj oksekimej. Timochijchikauaj para nochtin kuali mamomachilikan ijkuak techitaj. Ikinon tikchiuaj ken kijtoua nin texto: “Tinochtin matikchiuakan tlen kinpaktia oksekimej uan ijkon tikinyolchikauaskej” (xiktlajtolti Romanos 15:1, 2).
3. ¿Ken uelis kinpaleuis oksekimej ken timotlakentiaj?
Timochijchikauaj nochipa timotlakentiskej ken moneki pero okachi kuali timotlakentiaj ijkuak timonechikouaj uan titetlapouiaj. Amo tiknekij mayeto totlajtlakol tla ikaj amo kineki momachtis porque amo kuali timotlakentiaj. Tiknekij oksekimej mamomachtikan uan “kiteititiskej kuajkualtsin tlen tlamachtia toTajtsin Dios akin techmakixtia” (Tito 2:10).
MATIMOMACHTIKAN
Matikitakan kox timotlakentiaj uan timoyektlaliaj ken akinmej melauak kichiuaj ken Cristo.
Ken timotlakentiaj uan timoyektlaliaj kiteititia kox titetlakaitaj. Maski Jehová okachi kipatioita toyolo noijki kita ken timotlakentiaj.
4. Tla kuali timotlakentiaj, tikteititiaj tiktlakaitaj Jehová
¿Tleka moneki tikitaskej kox kuali timotlakentiaj uan timoyektlaliaj? Xiktlajtoltikan Salmo 47:2 uan satepan xikitakan tlen namechmachtia.
-
Tejuan tiiTlaixpantijkauan Jehová, ikinon ¿ken moneki timotlakentiskej?
-
¿Timokuayejyekoua miak ipati kuali matimotlakentikan ijkuak timonechikouaj uan titetlapouiaj? ¿Tleka ijkon timokuayejyekoua?
5. ¿Tlen techpaleuis kuali matimotlakentikan uan matimoyektlalikan?
Amo moneki yetos patio totlaken, san moneki yetos chipauak uan kuali mamota. Xiktlajtoltikan 1 Corintios 10:24 uan 1 Timoteo 2:9, 10. Satepan xikijtokan tleka amo kuali tikonakiskej se tlakemitl tla...
-
... amo kuali mota noso sokio.
-
... sapanoua tilintok noso tepontik.
Maski akinmej tikchiuaj ken Cristo ayakmo tiktlakamatij tlanauatil tlen okimakakej Moisés, nin tlanauatil techititia ken mokuayejyekoua Jehová. Xiktlajtoltikan Deuteronomio 22:5 uan satepan xikitakan tlen namechmachtia.
-
¿Tleka amo kuali se tlakatl mamotlakenti uan mamoyektlali ken se siuatl uan se siuatl ken se tlakatl?
Xiktlajtoltikan 1 Corintios 10:32, 33 uan 1 Juan 2:15, 16 uan satepan xikitakan tlen namechmachtia.
-
Tla sekimej amo kuali momachiliaj ijkuak kitaj ken timotlakentiaj, ¿moneki tikpatlaskej? ¿Tleka ijkon tikijtoua?
-
¿Ken motlakentiaj uan moyektlaliaj ik kanin tichanti?
-
¿Timokuayejyekoua amo moneki ijkon motlakentiskej akinmej kichiuaj ken Cristo? ¿Tleka ijkon tikijtoua?
Uelis timotlakentiskej ken techpaktia uan noijki uelis tikyolpaktiskej Jehová.
SEKIMEJ KIJTOUAJ: “Ne nikpejpena ken nimotlakentis”.
-
¿Noijki ijkon timokuayejyekoua? ¿Tleka?
XIKILNAMIKTO
Ijkuak kuali timotlakentiaj uan timoyektlaliaj tikteititiaj tiktlakaitaj Jehová uan oksekimej.
Matikojpauikan
-
¿Tleka Jehová kineki kuali matimotlakentikan?
-
¿Ken kijtoua Biblia moneki timotlakentiskej?
-
¿Tlen mokuayejyekouaj oksekimej ijkuak kitaj ken timotlakentia?
NIN NOIJKI MITSPAKTIS
¿Tlen mokuayejyekouaj oksekimej ijkuak kitaj ken timotlakentiaj?
“¿Nimotlakentia ken moneki?” (Nin tlamachtil kajki itech jw.org/ncx)
¿Tleka moneki kuali timokuayejyekos tla tikneki tikmochiuilis se tatuaje?
“¿Kox kuali ma tikmochiuilikan se tatuaje?” (Nin tlamachtil kajki itech jw.org/ncx)
Xikita ken Biblia uelis mitspaleuis para timotlakentis ken moneki.
¿Tlen okipaleui se siuatl makitlakaita ken motlakentiaj uan moyektlaliaj oksekimej?
Xamo noijki mitspaktis
TLEN MIAKEJ MOTLAJTLANIAJ
¿Ken tlamachtiaj iTlaixpantijkauan Jehová?
Ijkuak mitstlajpalotiuij iTlaixpantijkauan Jehová uelis timomachtis ika moBiblia. Noijki uelis tikinyoleuas mofamilia noso moyolikniuan mouan mamomachtikan.
