Tokniuan:

Tejuan tiktlasojtlaj toTajtsin Dios uan tikintlasojtlaj oksekimej ikinon tikchiuaj tlen otechnauati Jesús. Ye okijto: “Xiakan itech nochi altepemej uan xitlamachtikan makichiuakan tlen ne onikchi. Xiteapolaktikan” (Mat. 28:​19, 20; Mar. 12:​28-31). Tla titetlasojtlaj uelis tikinpaleuiskej akinmej mochijchikauaj “kiseliskej yolilistli tlen amo keman tlamis” (Hech. 13:48).

Achto otimochijchikauayaj timomachtiskej para tikilnamiktoskej tlen tikinmiluiskej akinmej otikintlapouiayaj uan otikinmakayaj amatlajkuilolmej. Pero axkan okachi moneki tikmatiskej ken timotlapouiskej inuan oksekimej. Tikteititiaj tikintlasojtlaj oksekimej ijkuak tikintlapouiaj tlen yejuan kintekipachoua. Tinochtin tlatlamantli timokuayejyekouaj, ikinon moneki tikinmajsikamatiskej oksekimej, tikitaskej tlen kinekij kimatiskej uan tlen kintekipachoua. Nin amatlajkuilol techpaleuis ijkon matikchiuakan.

Nin amatlajkuilol kinpia 12 tlamachtilmej uan kipia 12 tlamantli tlen techpaleuis matitetlasojtlakan uan matitlamachtikan. Sejse tlamachtil kipia seki textos tlen kijtouaj tlen okichi Jesús ijkuak otetlapoui noso tlen okichi okse tokni tlen okatka achto siglo. Axkan tiknekij tikteititiskej tikintlasojtlaj akinmej tikintlapouiaj uan amo san tikilnamiktoskej tlen tikinmiluiskej. Nochi tlen kipia nin amatlajkuilol techpaleuis ijkuak titetlapouiaj. Seki tlamantli techpaleuis ijkuak yikin peua ikaj tiktlapouiaj, ijkuak oksepa titetlajpalotiuij uan ijkuak titlamachtiaj.

Ijkuak timomachtis sejse tlamachtil ximokuayejyeko ken mitspaleuis xitetlapoui. Okachi ipati matiktlasojtlakan Jehová uan matikintlasojtlakan oksekimej uan amo san tikmatiskej ken titlamachtiskej. Ikinon matimochijchikauakan okachi matitetlasojtlakan. Non techpaleuis matitlamachtikan.

Tikpatioitaj namouan tiktekichiuiliskej toTajtsin Dios (Sof. 3:9). Jehová manamechteochiua porque nanmochijchikauaj nantetlasojtlaj uan nantlamachtiaj.