1 Juan 5:1-21
5 Nochtin tlen kineltokaj Jesús ye Cristo, yejuan ikoneuan toTajtsin Dios. Noijki nochtin tlen kitlasojtlaj toTajtsin Dios, kintlasojtlaj akinmej ye ikoneuan.
2 Tejuan tikintlasojtlaj ikoneuan toTajtsin Dios ijkuak ye tiktlasojtlaj uan tikchiuaj tlen technauatia.
3 Tiktlasojtlaskej toTajtsin Dios kijtosneki tikchiuaskej tlen technauatia uan amo oui tlen technauatia.
4 Porque nochtin ikoneuan toTajtsin Dios yokintlanilijkej akinmej chantij tlaltikpak. Tejuan titlaneltokaj ikinon yotikintlanilijkej akinmej chantij tlaltikpak.
5 ¿Akin uelis kintlanilis akinmej chantij tlaltikpak? ¿Amo ye akin kineltoka Jesús iKone toTajtsin Dios?
6 Ijkuak Jesús ouala, okatka atl uan estli. Noijki okatka estli uan amo san okatka atl. Espíritu santo ijkon kitematiltia porque kiteititia tlen melauak.
7 Onka eyi tlamantli tlen kitematiltia akin Jesús:
8 espíritu santo, atl uan estli. Non eyi tlamantli san se tlamantli kitematiltia.
9 Tejuan tikneltokaj tlen kijtouaj tlakamej pero okachi ipati tlen kijtoua toTajtsin Dios. Porque toTajtsin Dios kitematiltia Jesús ye iKone.
10 Akin kineltoka iKone toTajtsin Dios kiteititia iyolipan kajki tlen okimachti toTajtsin Dios. Akin amo kineltoka toTajtsin Dios kiteititia ye san tlakajkayaua, porque amo kineltoka toTajtsin Dios okijto akin iKone.
11 Nin tlen toTajtsin Dios kitematiltia: ye otechmakak yolilistli tlen amo keman tlamis uan non yolilistli kitemaka iKone.
12 Non yolilistli kipia akin kiselia teKone. Pero amo kipia non yolilistli akin amo kiselia iKone toTajtsin Dios.
13 Namechijkuililia nin tlamantli para xikmatikan nochipa nanyoltoskej namejuan tlen nankineltokaj iKone toTajtsin Dios.
14 Tejuan tikneltokaj toTajtsin Dios techkaki maski san tlen tlamantli tiktlajtlaniliskej tla ijkon ken ye kineki.
15 Tla tejuan tikmatij ye techkaki ijkuak san tlen tlamantli tiktlajtlaniliaj, noijki tikmatij tikpiaskej tlen tiktlajtlanij porque ye tiktlajtlaniliaj.
16 Tla ikaj kita ikni kichiua se tlajtlakoli tlen amo temiktia, moneki ipatka motlatlaujtis uan toTajtsin Dios kikauilis mayolto. ToTajtsin Dios kinkauilis mayoltokan akinmej amo kichiuaj se tlajtlakoli tlen temiktia. Pero onka se tlajtlakoli tlen temiktia. Amikaj nikiluia mamotlatlaujti ipatka akin kichiua non tlajtlakoli.
17 Nochi tlen amo kuali kijtosneki tlajtlakoli, pero onka se tlajtlakoli tlen amo temiktia.
18 Tejuan tikmatij ikoneuan toTajtsin Dios amo tlajtlakolchiuaj, porque iKone toTajtsin Dios kinmaluia uan Satanás amitlaj uelis kintoktis.
19 Tejuan tikmatij tikchiuaj ken toTajtsin Dios, pero nochtin tlen chantij tlaltikpak katej imak Satanás.
20 Noijki tikmatij ouala iKone toTajtsin Dios. Ye otechmakak ixtlamatilistli para matikixmatikan akin melauak toTajtsin Dios. Ye akin melauak toTajtsin Dios uan ye kitemaka yolilistli tlen amo keman tlamis. Tejuan tikatej iuan akin melauak toTajtsin Dios porque techpaleuia Jesucristo tlen ye iKone.
21 Nokonetsitsiuan, xikinmixtopeuakan imágenes.
