1 Pedro 3:1-22
3 Siuamej, noijki xikkauilikan namonamik manamechyekana, ijkon tla amo kitlakamatij* iTlajtol toTajtsin Dios, nankinpaleuiskej matlaneltokakan ika tlen nankichiuaj maski amitlaj nankinmiluiskej.
2 Yejuan kitaskej namejuan nanyeknemij uan nantetlakaitaj.
3 Amo san panixko ximochijchiuakan, nin kijtosneki amo sapanoua xikyektlalikan namotsonkal, amo xikmotlalilikan miak oro nion amo xikmotlalilikan namotlaken patio.
4 Okachi kuali, mamota tlen kualtsin nankipiaj namoyolipan. ToTajtsin Dios kipatioita xiyetokan nanyolyamankej uan amo xikualanikan. Tla ijkon nankichiuaskej, yetoskia ken nanmochijchiuaj uan non amo keman tlamis.
5 Porque yiuejkika ijkon omochijchiuayaj siuamej yolchipauakej tlen okichiayaj toTajtsin Dios. Yejuan okikauiliayaj innamik makinyekana,
6 ijkon ken Sara okitlakamatiaya* Abrahán uan okiluiaya iteko. Namejuan nanyetoskej ichpochuan Sara tla nochipa nankichiuaskej tlen kuali uan amitlaj namechmomojtis.
7 Tlakamej, noijki kuali xikinmixmatikan namosiuauan. Ijkon nochipa san sekan nanyetoskej uan nankinmajsikamatiskej. Xiktlakaitakan siuatl ken yetoskia se komitl tlen san niman tlapani, tlamo toTajtsin Dios amo namechkakis ijkuak nankitlatlaujtiskej. Porque noijki okintliokoli yolilistli ken namejuan onamechtliokoli.
8 Saiktlami, san se tlamantli ximokuayejyekokan,* xiteajsikamatikan, ximotlasojtlakan ken namiknimej, xiteiknomatikan uan xiyetokan nanyolyamankej.
9 Amo ximomakopakan nion amo xikinuijuikaltikan akinmej namechuijuikaltiaj. Xikinchiuilikan tlen kuali oksekimej porque toTajtsin Dios ikinon onamechnotski uan ye namechchiuilis tlen kuali.
10 Porque “akin kineki moyolpaktis uan pakis, moneki kinauatis inenepil para amo kijtos tlen amo kuali uan para amo tlakajkayauas.
11 Makikaua tlen amo kuali uan makichiua tlen kuali. Mamochijchikaua nochipa moyekuikas inuan oksekimej.
12 Porque Jehová kuali kinmita akinmej yolkualmej uan kinkaki ijkuak kitlatlaujtiaj, pero Jehová kinkokolia akinmej kichiuaj tlen amo kuali”.
13 ¿Akin uelis itlaj namechtoktis tla nankinekij nankichiuaskej tlen kuali?
14 Namejuan nanpakij maski nantlajyouiaj porque nankichiuaj tlen kuali. Pero amo xikmauilikan* tlen oksekimej kimauiliaj* nion amo ximotekipachokan.
15 Namoyolipan xiktlakaitakan Cristo ken namoTeko. Nochipa xikmatikan ken nankinnankiliskej akinmej namechtlajtlaniaj tlen nankichiaj, pero xiyetokan nanyolyamankej uan xikintlakaitakan ijkuak nankinnankiliskej.
16 Xikpiakan chipauak namotlalnamikilis para mapinauakan akinmej namechteneuaj* porque nankichiuaj ken Cristo. Pinauaskej porque kitaskej nankichiuaj tlen kuali.
17 Tla toTajtsin Dios kitekauilia xitlajyouikan, okachi kuali xitlajyouikan porque nankichiuaj tlen kuali uan amo porque nankichiuaj tlen amo kuali.
18 Porque Cristo san se uelta oixpoliuik para techkixtilis totlajtlakol uan ayakmo oksepa ixpoliuis. Maski ye okatka yolkuali, omotemakak inpatka akinmej amo yolkualmej para namechpaleuis kuali ximouikakan iuan toTajtsin Dios. Ye okatka se tlakatl ijkuak okimiktijkej pero toTajtsin Dios okiyoliti ken se espíritu.
19 Uan ijkon okintlapouito ángeles tlen okintsakej.
20 Yejuan amo otetlakamatkej* ijkuak okatka Noé. Ijkuakon toTajtsin Dios omochixtoka ijkuak okichijtokaj arca pero amo miakej omomakixtijkej ijkuak otlatenki. San chikueyi* omomakixtijkej.
21 Non kineskayotia ijkuak onamechapolaktijkej tlen axkan noijki namechmakixtia porque okiyolitijkej Jesucristo. Timoapolaktiskej amo kijtosneki mochipauas tocuerpo, kijtosneki tiktlatlaujtiaj toTajtsin Dios matikpiakan chipauak totlalnamikilis.
22 Cristo kajki iyekma toTajtsin Dios porque oyajki iluikak. Axkan kitlakamatij* ángeles, tekiuajkej uan akinmej tlanauatiaj.
Notas
^ Noso “kiuelkakij”.
^ Noso “okiuelkakiaya”.
^ Noso “ximonejneuilikan”.
^ Noso “xikimakasikan”.
^ Noso “kimakasij”.
^ Noso “namechijtouaj”, “namechpojpouaj”.
^ Noso “otlauelkakej”.
^ Ika griego moijtoua “alma”. Xikita diccionario.
^ Noso “kiuelkakij”.
