1 Tesalonicenses 1:1-10
1 Ne Pablo, Silvano* uan Timoteo tiktitlaniliaj nin carta tlanechikol tlen kajki Tesalónica. Non tlanechikol kajki iuan toTajtsin Dios uan toTeko Jesucristo:
ToTajtsin Dios manamechtliokoli tlen kuali uan manamechmaka yolseuilistli.
2 Ijkuak timotlatlaujtiaj, timechilnamikij uan nochipa tiktlasojkamatiliaj toTajtsin Dios.
3 Porque ixpan toTajtsin Dios nochipa tikilnamikij tekitl tlen nankichiuaj porque nantlaneltokaj uan nantetlasojtlaj. Noijki nantlaxikouaj porque nankineltokaj toTeko Jesucristo.
4 Tokniuan, toTajtsin Dios namechtlasojtla uan tejuan tikmatij ye onamechpejpenki.
5 Porque espíritu santo onamechpaleui xikkakikan kuali tlajtoli uan amo san tlen otikijtojkej. Tejuan tikmatij amo otimechkajkayajkej uan sapanoua onamechpaleui tlen otimechmatiltijkej. Namejuan nankimatij onamechpaleui tlen otikchijkej ijkuak namouan otikatkaj.
6 Onankichijkej ken tejuan uan ken toTeko, porque maski onantlajyouijkej onankiselijkej iTlajtol toTajtsin Dios ika pakilistli tlen kitemaka espíritu santo.
7 Ijkon onankimititijkej tlen moneki kichiuaskej idiscípulos Jesús tlen chantij Macedonia uan Acaya.
8 Namejuan nantetlapouiaj ikinon iTlajtol Jehová nouian yomotematilti uan amo san Macedonia uan Acaya. Noijki nouian kimatij nankineltokaj toTajtsin Dios ikinon ayakmo moneki itlaj tikijtoskej.
9 Yejuan ok motlapouiaj ijkuak yikin otimechitakej ompa Tesalónica. Noijki motlapouiaj onankinkajkej namoimágenes uan onanmochijkej itlakeualuan akin melauak toTajtsin Dios tlen yoltok.
10 Noijki motlapouiaj namejuan nankichiaj mauiki iKone itech iluikak. ToTajtsin Dios okiyoliti Jesús uan Jesús techpaleuis amo matechtlajyouiltikan.
Notas
^ Noijki omotokayotiaya Silas.
