1 Tesalonicenses 2:1-20
2 Nokniuan, namejuan nankimatij amo san nenka otimechtlajpalotoj.
2 Namejuan nankimatij otitlajyouijkej uan otechtoktijkej miak tlamantli ompa Filipos. Pero toTajtsin Dios otechyolchika matimechtlapouikan kuali tlajtoli maski oksekimej okualaniayaj.
3 Tlen tejuan timechiluiaj amo kisa itech tlen amo melauak. Amo timechtlapouiaj para tikchiuaskej tlen amo kuali noso para timechkajkayauaskej.
4 ToTajtsin Dios otechpejpenki matiktematiltikan kuali tlajtoli, ikinon amo titetlapouiaj para tikinyolpaktiskej oksekimej. Titetlapouiaj para tikyolpaktiskej toTajtsin Dios porque ye kita tlen tikpiaj toyolipan.
5 ToTajtsin Dios kimati uan namejuan nankimatij tejuan amo keman kualtsin otimechtlapouijkej para timechkajkayauaskej. Noijki amo san otikteititijkej tiyolkualmej para itlaj matechmakakan.
6 Amo otiknekej ikaj matechueyitlali nion namejuan nion oksekimej, maski uelis timechtlajtlaniliskiaj tomin porque tejuan tiiapóstoles Cristo.
7 Tejuan otimechmaluijkej uan otimechtlasojtlakej ijkon ken se siuatl kinchichitia ikoneuan uan kinmaluia porque kintlasojtla.
8 Tejuan otimechtlasojtlakej miak uan otipakej timechmatiltiskej kuali tlajtoli tlen kitemaka toTajtsin Dios. Noijki otiknekiayaj tiktemakaskej toyolilis para timechpaleuiskej.
9 Nokniuan, namejuan nankilnamikij chikauak otitekipanojkej uan sapanoua otimochijchikajkej. Ijkuak otimechtlapouijkej kuali tlajtoli tlen kitemaka toTajtsin Dios, tlajka uan youak otitekipanojkej uan ijkon amo otimechtlajtlanilijkej tomin.
10 ToTajtsin Dios kimati uan namejuan tlen nantlaneltokaj nankimatij amo keman otimechkajkej ijkuak namouan otikatkaj. Noijki otikchijkej tlen kuali uan amitlaj otechtlajtlakoltijkej.
11 Namejuan nankimatij otimechyektlapouijkej, otimechyolchikajkej uan otimechiluijkej tlen moneki nankichiuaskej ijkon ken se tlakatl kinmiluia ikoneuan.
12 Para xiyeknemikan ken kineki toTajtsin Dios porque ye namechnotsa xikalakikan itech iTekiuajkayo uan manamechueyitlalikan.
13 Ikinon nochipa tiktlasojkamatiliaj toTajtsin Dios porque ijkuak onankikakej iTlajtol toTajtsin Dios tlen otimechtlapouijkej, onankiselijkej ken iTlajtol toTajtsin Dios uan amo ken intlajtol tlakamej. ITlajtol toTajtsin Dios namechpaleuia namejuan tlen nantlaneltokaj.
14 Nokniuan, itlanechikoluan toTajtsin Dios ompa Judea katej iuan Cristo Jesús. Namejuan onankichijkej ken yejuan porque onantlajyouijkej inmak akinmej chantij namoaltepe. Ijkon ken nonmej tokniuan tlajyouijtokej inmak judíos.
15 Nonmej judíos okimiktijkej toTeko Jesús, okinmiktijkej profetas uan tejuan otechtlajyouiltijkej. Yejuan amo kiyolpaktiaj toTajtsin Dios uan tlen kichiuaj amikaj kipaleuia.
16 Porque amo techkauiliaj matikintlapouikan akinmej chantij itech okseki altepemej para mamomakixtikan. San okachi tlajtlakolchiuaj ijkuak ijkon kichiuaj. Pero ikualanilis toTajtsin Dios inpan yiajsiki.
17 Nokniuan, ijkuak otimechkajtejkej kanaj keski tonal, otiknekiayaj timechitaskej uan otimochijchikajkej ijkon tikchiuaskej. Pero otimechilnamiktokaj maski amo otimechitayaj.
18 Ikinon otiknekiayaj timechtlajpalotiuij. Ne Pablo ome uelta onikyejyeko nias. Pero Satanás otechtsakuili.
19 Porque ¿tlen tikchiaskej, tlen kichiuas matipakikan uan tlen corona ika tipakiskej ixpan toTeko Jesús ijkuak ye yinikan yetos? ¿Amo namejuan?
20 Namejuan nankichiuaj matechueyitlalikan uan matipakikan.
