1 Tesalonicenses 3:1-13
3 Tejuan otiknekiayaj tikmatiskej ken nankatej ikinon otikijtojkej toselti timokauaskiaj Atenas.
2 Uan otimechtitlanilijkej tokni Timoteo. Ye kitekichiuilia toTajtsin Dios uan tetlapouia kuali tlajtoli tlen kijtoua akin Cristo. Otiktitlankej manamechyolseuiti uan manamechyolchikauati para okachi xitlaneltokakan.
3 Ijkon amikaj makisotlaua tlen kijyouia. Porque namejuan nankimatij moneki titlajyouiskej.
4 Ijkuak namouan otikatkaj, yotimechiluijkaj titlajyouiskiaj uan namejuan nankimatij ijkon panotok.
5 Ne oniknekiaya nikmatis ken nankatej, ikinon oniktitlanki Timoteo manamechitati kox ok nankineltokaj toTajtsin Dios noso Diablo yokichi xitlajtlakolchiuakan, porque amitlaj ipati tekitl tlen otikchijkej tla ijkon yokichi.
6 Pero Timoteo yomokopato onamechtlajpaloto uan yotechilui namejuan nanmotlasojtlaj uan nankineltokaj toTajtsin Dios. Noijki yotechilui nochipa nantechilnamikij porque nantechtlasojtlaj uan nankinekij nantechitaskej ijkon ken tejuan tiknekij timechitaskej.
7 Nokniuan, maski tejuan amitlaj tikpiaj uan titlajyouiaj, namejuan nantechyolchikauaj porque nankiteititiaj nankineltokaj toTajtsin Dios.
8 Tejuan kuali timomachiliaj uan tipakij tla amo nankikauaj toTeko.
9 ¿Ken tiktlasojkamatiliskej toTajtsin Dios namopatka porque nankichiuaj ixpan matipakikan?
10 Tlajka uan youak tiktlatlaujtiaj ika nochi toyolo para uelis timechitaskej uan timechpaleuiskej okachi xitlaneltokakan.
11 ToTajtsin Dios uan toTeko Jesús matechkauilikan matimechtlajpalotij.
12 Noijki toTeko manamechpaleui okachi ximotlasojtlakan uan noijki xikintlasojtlakan oksekimej ijkon ken tejuan sapanoua timechtlasojtlaj.
13 Ijkon ijkuak toTeko Jesús yinikan yetos inuan nochtin yolchipauakej tlen iaxkauan, ye namechpaleuis ximoyekketokan uan xiyetokan nanyolchipauakej ixpan toTajtsin Dios.
