1 Tesalonicenses 5:1-28
5 Nokniuan, amo moneki timechtlajkuililiskej tlen hora noso tlen tonal okipejpenki toTajtsin Dios.
2 Porque namejuan nankimatij itonal Jehová ajsiki ijkon ken se ichteki ajsiki youak.
3 Ijkuak yejuan kijtoskej: “¡Axkan tinochtin kuali tikatej uan amitlaj techtekipachoua!”, ijkuakon san niman kinmixpoloskej. Yejuan amo uelis choloskej porque kinpanos ijkon ken se siuatl tlajyouia ijkuak yikipias ikone.
4 Pero namejuan tokniuan amo nankatej kanin tlayoua, ikinon non tonal amo namechtlajtlachialtis ijkon ken tlajka kintlajtlachialtia ichtekej.
5 Nochtin namejuan nanikoneuan tlauili uan nanikoneuan tlajka. Tejuan amo tiiaxkauan youak nion tlayoualotl.
6 Ikinon amo matikochikan ken kichiuaj oksekimej. Matiijsatokan uan kuali matimokuayejyekokan.*
7 Akinmej kochij, kochij youak. Akinmej tlauanaj, tlauanaj youak.
8 Pero tejuan tiiaxkauan tlajka ikinon kuali matimokuayejyekokan.* Matitlaneltokakan uan matitetlasojtlakan ken yetoskia tikmotlaliliaj tepostli tlen kimaluia toelpan. Noijki matikmokuatlalilikan tepostli tlen tikchiaj matechmakixti.
9 ToTajtsin Dios amo otechpejpenki para techtlajyouiltis. Otechpejpenki para toTeko Jesucristo matechmakixti.
10 Ye topatka oixpoliuik para iuan matiyoltokan maski tiijsatoskej noso tikochiskej.*
11 Ikinon nochipa ximosepanyolchikauakan uan ximosepanpaleuikan ijkon ken yinankichijtokej.
12 Nokniuan, timechtlatlaujtiaj xikintlakaitakan akinmej namouan chikauak tekipanouaj. Yejuan namechyekanaj ijkuak nankitekichiuiliaj toTeko uan namechnejmachtiaj.
13 Xikteititikan nankinpatioitaj uan xikintlasojtlakan porque tekipanouaj. Noijki kuali ximouikakan inuan oksekimej.
14 Nokniuan, noijki timechtlatlaujtiaj xikinnejmachtikan akinmej amo tetlakamatij,* xikinyolchikauakan akinmej moyolkokouaj, xikinpaleuikan akinmej amo chikauakej uan nochtin xikinxikokan.
15 Kuali xikitakan amikaj mamomakopa. Nochipa ximochijchikauakan xikinpaleuikan tokniuan uan noijki oksekimej.
16 Nochipa xipakikan.
17 Nochipa ximotlatlaujtikan.
18 Nochi xiktlasojkamatilikan toTajtsin Dios. Non tlen kineki toTajtsin Dios makichiuakan idiscípulos Cristo Jesús.
19 Amo xikseuikan tlitl tlen kipia espíritu santo.
20 Xikinpatioitakan profecías.
21 Nochi kuali xikitakan uan nochipa xikchiuakan tlen kuali.
22 Amo xikchiuakan tlen amo kuali.
23 Ne niktlatlaujtia toTajtsin Dios tlen teyolseuia ajsitok manamechyolchipaua para xiktekichiuilikan. Nokniuan, chipauak mayeto namoyelis, namoyolo uan namocuerpo. Ijkon nanyetoskej namajsitokej uan amitlaj tlajtlakoli nankipiaskej ijkuak yinikan yetos toTeko Jesucristo.
24 ToTajtsin Dios onamechpejpenki uan kichiuas tlen yokijto porque amo tlakajkayaua.
25 Nokniuan, nochipa topatka ximotlatlaujtikan.
26 Ika namoyolo chipauak xikinmixpipitsokan* tokniuan ijkuak nankintlajpaloskej.
27 Ne namechnauatia ika itoka toTeko xikintlajtoltilikan nin carta nochtin tokniuan.
28 ToTeko Jesucristo nochipa manamechtliokoli tlen kuali.
Notas
^ Noso “matimonejneuilikan”.
^ Noso “matimonejneuilikan”.
^ Noso “tiyoltoskej noso tiixpoliuiskej”.
^ Noso “tlauelkakij”.
^ Noso “xikinmixtennamikikan”.
