1 Timoteo 4:1-16
4 Pero iTlajtol toTajtsin Dios kiyekijtoua satepan sekimej ayakmo tlaneltokaskej, porque kinkakiskej akinmej tlakajkayauaj uan kikakiskej tlen tlamachtiaj ejekamej.*
2 Yejuan kinkakiskej akinmej tlakajkayauaj uan kipiaj ome inmixko. Intlalnamikilis yotlakuauak ken yetoskia okintlalilijkej se marca ika se tepostli totonik.
3 Yejuan amo kinkauiliaj oksekimej mamonamiktikan uan kinnauatiaj amo makikuakan seki tlakuali. Pero toTajtsin Dios okitlali tlakuali para makikuakan akinmej tlaneltokaj porque kajsikamatij tlen melauak uan makitlasojkamatilikan.
4 Porque toTajtsin Dios nochi kuali okichijchi uan amo moneki itlaj tikixtopeuaskej tla timotlasojkamatij ijkuak tikseliaj.
5 Porque tlakuali mochipaua ika iTlajtol toTajtsin Dios uan noijki ijkuak timotlatlaujtiaj.
6 Kuali tiktekichiuilis Cristo Jesús tla tikinmachtis nochi nin tlamantli tokniuan. Noijki timochikauas ika iTlajtol toTajtsin Dios uan timochikauas ika kuali tlamachtil tlen amo keman tikkaua.
7 Pero amo xikkaki tlen amo melauak uan kixnamiki toTajtsin Dios ijkon ken kijtojtinemij sekimej siuamej tlen yokokoxkatikej. Noijki ximochijchikaua xikueyichiua toTajtsin Dios.
8 Tla tikchiuaj ejercicio amo okachi techpaleuia, pero tla nochipa tikueyichiuaj toTajtsin Dios okachi techpaleuis, porque techteochiuaskej axkan uan noijki satepan.
9 Nin tlamantli uelis kineltokaskej uan moneki nochtin kiseliskej.
10 Ikinon sapanoua titekipanouaj uan timochijchikauaj porque tikneltokaj toTajtsin Dios tlen yoltok. Ye nochtin kinmakixtia pero okachi kinmakixtia akinmej amo keman kikauaj.
11 Nochipa xitlamachti uan xitlanauati tlen nimitsiluia.
12 Amikaj mamitstlauelita porque titelpochtli. Xikinmachti akinmej kitekichiuiliaj toTajtsin Dios uan kineltokaj. Xikinmachti ika tlen tikijtoua, ika tlen tikchiua, ken titetlasojtla, ken titlaneltoka uan ken tikpia chipauak monemilis.
13 Ijkuak ayamo niajsiti, ximochijchikaua teixpan kuali xiktlajtolti iTlajtol toTajtsin Dios, xiteyolchikaua uan xitlamachti.
14 Amo xikkaua tetliokolil tlen tikpia uan tlen otikseli ika se profecía ijkuak tlayekankej mopan okintlalijkej inmauan.
15 Ximokuayejyeko* nochi nin tlamantli uan xikchiua, para nochtin kuali makitakan mochikajti motlaneltokilis.
16 Nochipa xikita tlen tikchiua uan tlen titlamachtia. Nochipa xikchiua nin tlamantli uan ijkon timomakixtis te uan noijki akinmej mitskakiskej.
