2 Corintios 10:1-18
10 Ne Pablo namechtlatlaujtia xikchiuakan tlen namechiluia. Ijkuak ne namechtlapouia, nikchiua ken Cristo porque ye yolyamanki uan yolkuali. Ijkuak namouan nika nantechitaj amo niyolchikauak, pero nantechitaj niyolchikauak ijkuak amo namouan nika.
2 Ne nikchia ijkuak namechitati, amo nikneki chikauak nikinmajuas akinmej mokuayejyekouaj* tikchiuaj ken oksekimej.
3 Tejuan amo tikmomakaj ken oksekimej kichiuaj maski tichantij nikan tlaltikpak.
4 Porque teposmej tlen ika tikmomakaj amo pouij itech nin tlaltikpak. Nonmej teposmej chijchikauakej porque toTajtsin Dios otechinmakak para tikxixiniskej nochi tlen kajki ken se chikauak tepamitl.
5 Tejuan yetoskia ken tikxixiniaj miak tlayejyekoli* uan nochi tlen kintsakuilia oksekimej amo makixmatikan toTajtsin Dios. Noijki tikinpatiliaj intlayejyekol* oksekimej para makitlakamatikan* Cristo.
6 Tejuan uelis tiktlajyouiltiskej akin amo tetlakamati* ijkuak namejuan nankiteititiskej melauak nantetlakamatij.*
7 Namejuan nantlaixkomakaj san ika tlen nankitaj. Tla ikaj kineltoka ye idiscípulo Cristo, oksepa mamokuayejyeko* tejuan noijki tiidiscípulos Cristo ijkon ken ye.
8 Amo moneki nipinauas tla tepitsin nimoueyinekis, porque toTeko otechkauili matimechyolchikauakan uan amo matimechyolkokokan.
9 Pero amo ximokuayejyekokan* nikneki namechmomojtis ika nocartas.
10 Sekimej kijtouaj miak ipati tlen kijtouaj nocartas uan kipiaj chikauak tlajtoli. Pero ijkuak inuan nika, nechitaj amo niyolchikauak uan amo kinpaktia ken nitlajtoua.
11 Akinmej ijkon kijtouaj makilnamiktokan ijkuak tiajsitiuij, tikchiuaskej ijkon ken otikijkuilojkej itech cartas.
12 Tejuan amo timixeuiaj tikijtoskej tikchiuaj ken akinmej moueyinekij. Noijki amo moneki tikitaskej kox tikchiuaj ken yejuan kichiuaj. Pero yejuan kiteititiaj amo ixtlamatkej ijkuak inneuian kitaj kichiuaj tlen kuali.
13 Tejuan amo timoueyinekiskej ika tlen toTajtsin Dios amo otechnauati matikchiuakan. Timoueyinekiskej ika tlen toTajtsin Dios otechnauati matikchiuakan uan namejuan noijki ompa nanpouij.
14 Ijkuak otimechitatoj, tejuan amo otikchijkej itlaj tlen toTajtsin Dios amo otechnauati matikchiuakan. Tejuan achto otimechmatiltijkej kuali tlajtoli tlen kijtoua akin Cristo.
15 Amo timoueyinekij ika tlen toTajtsin Dios amo otechnauati matikchiuakan. Nin kijtosneki amo timoueyinekij ika inteki oksekimej. Pero ijkuak okachi nantlaneltokaskej, tikchiaj okachi mamomiaktili tekitl tlen otikchijkej kanin titetlapouiaj. Ijkon uelis okachi titlapaleuiskej.
16 Uelis tiktematiltiskej kuali tlajtoli itech altepemej tlen okachi uejka katej kanin namejuan nanchantij. Ijkon amo timoueyinekiskej ika tlen oksekimej okichijkej kanin tetlapouiaj.
17 “Pero akin moueyineki, mamoueyineki porque kixmati Jehová”.
18 Porque Jehová kiselia akin ye kiueyitlalia, pero amo kiselia akin ineuian moueyitlalia.
Notas
^ Noso “monejneuiliaj”.
^ Noso “tlanemilili”.
^ Noso “intlanemilil”.
^ Noso “makiuelkakikan”.
^ Noso “tlauelkaki”.
^ Noso “nantlauelkakij”.
^ Noso “mamonejneuili”.
^ Noso “xiknejneuilikan”.
