2 Corintios 11:1-33
11 Nechpaktiskia techxikokan maski nantechitaj yonikuatlapolo, pero namejuan yinantechxikojtokej.
2 Ne nechtekipachoua tlen namechpanoua ijkon ken toTajtsin Dios kitekipachoua. Ne noneuian onikijto namechtemaktis ximonamiktikan iuan Cristo. Nikneki namechtemaktis inauak ye ijkon ken se ichpochtli.
3 Kouatl okitlatlalui Eva uan okikajkaya, ikinon nechtekipachoua ikaj makijtlako namotlayejyekol* uan ayakmo nantetlakamatiskej* nion ayakmo nanyetoskej nanchipauakej. Porque akin kichiua ken Cristo moneki tetlakamatis* uan moneki yetos chipauak.
4 Ne ijkon nikijtoua porque namejuan nankikakiskiaj tla ikaj namechtlapouiti akin Jesús pero amo ken tejuan timechtlapouiaj. Noijki nankiseliskiaj tla ikaj namechpatiliti namotlayejyekol,* noso nankikakiskiaj tla ikaj namechtlapouiti kuali tlajtoli pero amo tlen onankiselijkej.
5 Ne nikita amitlaj kiteititia amo okachi nopati ken namoapóstoles tlen nankinmitaj okachi ueyititokej.
6 Pero ne niixtlamatki maski amo okachi ueli nitlajtoua, ijkon yotimechititijkej ika nochi tlamantli tlen tikchiuaj.
7 Ne amo onitlajtlakolchi ijkuak onimochi niyolyamanki para namejuan manamechtlakaitakan. Ne onipakiaya ijkuak onamechmatilti kuali tlajtoli tlen kitemaka toTajtsin Dios uan amo onamechilui techtlaxtlauikan.
8 Okseki tlanechikolmej onechpaleuijkej uan yetoskia ken onikinkixtili tlen kipiaj para namechpaleuis.
9 Ijkuak namouan onikatka uan amitlaj onikpiaya, amitlaj onamechtlajtlanili porque tokniuan tlen oualayaj Macedonia onechmakakej ika nochi inyolo tlen onechpolouaya. Ne onimochijchika amo namechtekimakas uan nochipa ijkon nikchiuas.
10 Amikaj nechtsakuilis manimoueyineki porque nikchiua ken Cristo uan ijkon nikchiuas itech altepemej tlen katej Acaya.
11 ¿Uan tleka? ¿Kijtosneki amo namechtlasojtla? ToTajtsin Dios kimati ne namechtlasojtla.
12 Miakej moueyinekij porque kijtouaj yejuan apóstoles ken tejuan, ikinon nochipa nikchiuas tlen nikchijtiuits uan ijkon amo nikinkauilis mamoueyinekikan.
13 Yejuan amo melauak apóstoles, san tlakajkayauaj uan san ik mochiuaj yejuan iapóstoles Cristo.
14 Non amo nechtlajtlachialtia porque Satanás noijki san ik mochiua se ángel yolkuali.*
15 Ikinon amo tetlajtlachialti itekipanojkauan san ik mochiuaj kichiuaj tlen kuali. Pero satepan inpan mokopas tlen kichiuaj.
16 Oksepa namechiluia amikaj mamokuayejyeko* nikuatlapoloua. Pero tla nanmokuayejyekouaj* nikuatlapoloua ijkon techselikan para uelis tepitsin nimoueyinekis.
17 Axkan amo namechtlapouia ijkon ken kichiuaskia toTeko. Ne nimoueyineki ijkon ken kichiuaskia akin kuatlapoloua.
18 Ne noijki nimoueyinekis ken miakej moueyinekij ika tlen onka tlaltikpak.
19 Namejuan nanmomachiliaj namixtlamatkej ikinon kuali nankinseliaj akinmej kuatlapolouaj.
20 Noijki nankiseliaj akin kichiua xiyetokan nantlakeualmej, akin kimoaxkatia tlen namoaxka, akin namechichtekilia tlen nankipiaj, akin namechita amitlaj namopati uan akin namechixtlatsinia.
21 Tepinati ijkon tikijtouaj porque nansekimej nankijtouaj tlen tikchiuaj kiteititia amo tiyolchikauakej.
Pero tla sekimej amo pinauaj moueyinekiskej, ne noijki amo nipinauas nimoueyinekis maski sekimej nechitaj yonikuatlapolo.
22 ¿Yejuan hebreos? Ne noijki nihebreo. ¿Yejuan israelitas? Ne noijki niisraelita. ¿Yejuan ixuiuan Abrahán? Ne noijki niixui Abrahán.
23 ¿Yejuan kipaleuiaj Cristo? Ne okachi nikpaleuia uan ijkon nikijtoua ken ikaj tlen yokuatlapolo. Ne okachi yonitekipano, okachi miak uelta yonechtsakej, miak uelta yonechuitekej uan miak uelta yinimikiskia.
24 Makuili uelta judíos onechuitekej 39 uelta.
25 Eyi uelta onechtlakotenkej, se uelta onechmojmotlakej ika tetl, eyi uelta oxixinki barco tlen itech oniaya, uan se tonal otimokajkej itech mar kanin okachi tlauejkatlan.
26 Ne nouian yoninentinenki, onitlajyoui itech aueyatl, onechixnamikej ichtekej, onechixnamikej akinmej chantij noaltepe uan akinmej chantij itech okseki altepemej. Noijki onitlajyoui itech altepetl, kanin tlauaki uan itech mar. Noijki onechixnamikej akinmej amo melauak tokniuan.
27 Nimochijchikaua nitekipanoua uan amo nimoseuia, miak uelta amo nikochi, ualeua amo nikpia tlen nikkuas nion tlen nikonis, miak uelta amo nitlakua, ualeua nisekui porque amo nikpia notlaken.
28 Pero amo san nin tlamantli nechpanoua. Noijki nochipa nechtekipachoua tlen kinpanoua nochi tlanechikolmej.
29 Tla ikaj amo chikauak, ne nikmachilia amo nichikauak. Noijki nechkualania tla ikaj kitoktiaj ayakmo matlaneltoka.
30 Tla moneki nimoueyinekis, nimoueyinekis ika nochi tlen kiteititia amo nichikauak.
31 Moneki nochipa makiueyichiuakan iDios uan iTajtsin toTeko Jesús. Ye kimati amo nitlakajkayajtok.
32 Ompa Damasco, tekiua okintlali sekimej tlakamej matlamaluikan para nechkitskiskiaj. Non tekiua otlanauatiaya ipatka tekiua Aretas.
33 Pero onicholo porque tokniuan onechtemouijkej ika se chikiuitl itech ventana tlen okatka itech tepamitl.
Notas
^ Noso “namotlanemilil”.
^ Noso “nantlauelkakiskej”.
^ Noso “tlauelkakis”.
^ Noso “namotlanemilil”.
^ Noso “tlen petlani”.
^ Noso “mamonejneuili”.
^ Noso “nanmonejneuiliaj”.
