2 Corintios 12:1-21
12 Moneki nimoueyinekis. Nikijtos tlen onechnextili toTeko uan tlen onechmatilti maski amo nechpaleuis ijkon nikchiuas.
2 Nikixmati se tlakatl, ye idiscípulo Cristo uan yikipia 14 xiuitl san niman okiuikakej itech iluikak eyi. Amo nikmati kox okiuikakej ika nochi icuerpo noso amo, san toTajtsin Dios kimati.
3 Ne nikixmati non tlakatl. Amo nikmati kox okiuikakej ika nochi icuerpo noso amo, san toTajtsin Dios kimati.
4 Ye san niman okiuikakej itech xochitlali uan okikak seki tlajtoli tlen amikaj kikauiliaj makijto.
5 Ne nimoueyinekis ipatka non tlakatl pero amo noneuian nimoueyinekis. San nimoueyinekis ika tlen kiteititia amo nichikauak.
6 Tla niknekiskia nimoueyinekis, amo kijtosneki nikuatlapoloua porque nikijtoskia tlen melauak. Pero amo nimoueyineki para amikaj mamokuayejyeko* onikchi itlaj tlen amo okitak noso onikijto itlaj tlen amo okikak,
7 san porque onechmatiltijkej seki tlamantli tetlajtlachialti.
Onechtsoponilijkej se uitstli itech nocuerpo para amo manimoueyineki. Se iángel Satanás nechixtlatsinia para amo manimoueyineki.
8 Eyi uelta oniktlatlaujti toTeko manechkixtili.
9 Pero ye onechilui: “Ne yonimitstliokoli tlen kuali uan san non moneki tikpias, porque nochikaualis kuali moteititia ijkuak amo nanchikauakej”. Ikinon nipaki nimoueyinekis ika tlen kiteititia amo nichikauak para nikpixtos ichikaualis Cristo ken se kaltsintli.
10 Ne nipaki ijkuak amo nichikauak, ijkuak nechuijuikaltiaj, ijkuak amitlaj nikpia, ijkuak nechtlajyouiltiaj uan ijkuak nitlaxikoua ipatka Cristo. Porque ijkuak amo nichikauak nimochiua nichikauak.
11 Namotlajtlakol nitlajtoua ken yonikuatlapolo. Amo ijkon nitlajtoskia tla nankijtoskiaj kuali tlen nikchiua. Maski amitlaj nopati, yonikteititi amo okachi inpati namoapóstoles tlen nankinmitaj okachi ueyititokej.
12 Ne yonitlaxiko ijkuak onamechititi tlen kichiua se apóstol. Onikinchi milagros uan okseki tlamantli tetlajtlachialti.
13 ¿Tleka namejuan amo nankatej ken oksekimej tlanechikolmej? ¿Porque amitlaj onamechtlajtlanili? Techtlapojpoluikan tla ijkon onikchi.
14 Axkan yiajsis eyi uelta uelis namechtlajpaloti uan amitlaj namechtlajtlanilis. Ne namejuan namechtemoti uan amo niktemoti tlen nankipiaj. Porque tetajmej moneki kinkauiliskej seki tlamantli inkoneuan uan amo konemej kinkauiliskej seki tlamantli inpapanuan.
15 Ne nipakis niktemakas namopatka nochi tlen nikpia uan noijki noyolilis. Tla ne namechtlasojtla miak, ¿namejuan amo okachi nantechtlasojtlaskej?
16 Maski ne amitlaj onamechtlajtlanili, namejuan nankijtouaj onamechtlalili trampas uan onamechkajkaya.
17 ¿Kox onikinmilui tokniuan tlen onikintitlanki makitemotij tlen nankipiaj?
18 Oniktlatlaujti Tito manamechtlajpaloti uan okse tokni oniktitlanki iuan mauia. ¿Kox itlaj onamechkixtili Tito? ¿Amo san se tlamantli timokuayejyekouaj?* ¿Amo san se tlamantli tikchiuaj?
19 Namejuan nanmokuayejyekouaj* san tiknekij timopaleuiskej pero amo melauak ijkon tikchiuaj. Tejuan tikchiuaj ken Cristo uan tikijtouaj tlen melauak ixpan toTajtsin Dios. Tokniuan, tejuan timechtlasojtlaj uan timechyolchikauaj ika nochi tlen tikchiuaj.
20 Ne nimomojtia tla ijkuak namechtlajpaloti amo nanyetoskej ijkon ken ne nechpaktiskia, noso ne amo niajsiti ijkon namejuan namechpaktiskia. Nimomojtia namechajsiti nanmokualaniaj, nanmochauatiliaj, nankualankamikij, nanmotlauelitaj, nankinteneuaj* oksekimej para amo kuali makinmitakan, nantlateneuaj,* nanmoueyinekij uan nanmoxexelouaj.
21 Ijkuak oksepa nias, xamo toTajtsin Dios kichiuas namoixpan manipinaua. Xamo nimoyolkokos porque miakej otlajtlakolchijkej uan amo moyolkopaj. Yejuan ok kitaj kuali kichiuaskej tlen pitsotik, auilnemij,* tlajtlakolchijtinemij uan ayakmo pinauaj.*
Notas
^ Noso “mamonejneuili”.
^ Noso “timonejneuiliaj”.
^ Noso “nanmonejneuiliaj”.
^ Noso “nankinmijtouaj”, “nankinpojpouaj”.
^ Noso “nanteijtouaj”, “nantepojpouaj”.
^ Ika griego moijtoua pornéia. Xikita diccionario kanin kijtoua auilnemi.
^ Xikita diccionario.
