2 Corintios 3:1-18
3 ¿Moneki oksepa tikteititiskej akinmej tejuan? ¿Moneki tikinpiaskej cartas tlen kiyekijtouaj akinmej tejuan ijkon ken oksekimej kichiuaj? Noso ¿namejuan moneki nantechinmijkuililiskej nonmej cartas?
2 Namejuan nanyetoskiaj ken tocarta tlen ijkuilitok toyolipan. Nochtin kixmatij uan kitlajtoltiaj.
3 Namejuan nanyetoskiaj ken icarta Cristo tlen otikijkuilojkej akinmej tiktekichiuiliaj toTajtsin Dios. Amo ijkuilitok ika tinta, ijkuilitok ika iespíritu toTajtsin Dios uan toTajtsin Dios yoltok. Noijki amo ijkuilitok itech temej,* ijkuilitok inyolipan.
4 Cristo techpaleuia matikneltokakan toTajtsin Dios otechpejpenki matiktekichiuilikan.
5 Tejuan amo tikijtouaj san toselti tikchiuaj nin tekitl. ToTajtsin Dios techpaleuia matikchiuakan nin tekitl.
6 Ye techpaleuia matikchiuakan tekitl tlen kijtoua yankuik acuerdo.* Tejuan techyekana espíritu santo uan amo techyekana tlanauatil tlen okijkuilojkej. Tlanauatil tlen okijkuilojkej teixpoloua pero espíritu santo techpaleuia matiyoltokan.
7 Tlanauatil tlen teixpoloua okijkuilojkej itech temej.* Sapanoua petlantok okitemakakej uan israelitas amo ueli okitayaj ixko Moisés porque opetlaniaya. Pero pojpoliuiskia tlen opetlaniaya.
8 Tla tlanauatil okitemakakej petlantok, ¿tleka espíritu santo amo kitemakaj okachi petlantok?
9 Tla opetlaniaya tlanauatil tlen teixpoloua, okachi petlantos tekitl tlen kinpaleuia oksekimej mayetokan yolkualmej.
10 Tlanauatil tlen opetlantoka, ayakmo petlantok porque okachi petlantok yankuik acuerdo.*
11 Tla opetlaniaya tlanauatil tlen opojpoliuik, okachi petlantos tlen nochipa yetos.
12 Tejuan tikchiaj ijkon mapano ikinon tiyolchikauakej ijkuak titlajtouaj.
13 Tejuan amo tikchiuaj ken Moisés. Ye omixtlakentiaya ika se tsotsoli* para israelitas amo makitakan kanin teuika tlanauatil tlen pojpoliuiskia.
14 Yejuan amitlaj okajsikamatiayaj. Hasta axkan ixtlakentokej ika se tsotsoli* ijkuak kitlajtoltiaj achto acuerdo.* San uelis kimokixtiliskej tsotsoli* tla kineltokaskej Cristo.
15 Hasta axkan inyolo tlakentok ika se tsotsoli* ijkuak kitlajtoltiaj tlen okijkuilo Moisés.
16 Pero ikaj kimokixtilia tsotsoli* ijkuak moyolkopa uan kiueyichiua Jehová.
17 Jehová ye se espíritu uan amitlaj kintsakuilia akinmej kipiaj iespíritu Jehová.
18 Tejuan amo tiixtlakentokej ika se tsotsoli.* Tikatej ken espejos tlen tikteititiaj iueyitilis Jehová. Ijkuak ijkon tikchiuaj, timopatlaj para tiyetoskej ken toTajtsin Dios uan okachi tikteititiskej iueyitilis. Jehová ye se espíritu uan tikchiuaj ijkon ken ye kineki.
Notas
^ Noso “tepejximej”.
^ Noso “pacto”. Xikita diccionario.
^ Noso “tepejximej”.
^ Noso “pacto”. Xikita diccionario.
^ Noso “tlakemitl”, “tilmajtli”.
^ Noso “tlakemitl”, “tilmajtli”.
^ Noso “pacto”. Xikita diccionario.
^ Noso “tlakemitl”, “tilmajtli”.
^ Noso “tlakemitl”, “tilmajtli”.
^ Noso “tlakemitl”, “tilmajtli”.
^ Noso “tlakemitl”, “tilmajtli”.
