2 Corintios 4:1-18
4 Amo timosotlauaj tiktekichiuiliaj toTajtsin Dios porque ye otechiknomatki.
2 Ayakmo tikchiuaj tlen oksekimej ichtaka kichiuaj uan tepinati. Noijki amo titlakajkayauaj nion amo tikpapatlaj iTlajtol toTajtsin Dios. Tejuan tiktematiltiaj tlen melauak uan ijkon ixpan toTajtsin Dios tikteititiaj tikchiuaj tlen kuali para sejse intlalnamikilis makajsikamati nin tlamantli.
3 Tla kuali tlajtoli tlen tiktematiltiaj tlakentok ika se tsotsoli* kijtosneki amo kitaj akinmej ixpoliuiskej,
4 akinmej amo tlaneltokaj, porque dios tlen axkan tlanauatia ipan tlaltikpak amo kinkauilia matlachiakan para amo makajsikamatikan kuali tlajtoli. Yetoskia ken amo kitekauilia inpan mapetlani tetlajtlachialti kuali tlajtoli tlen kijtoua akin Cristo, porque Cristo kiteititia akin toTajtsin Dios.
5 Tejuan amo tikijtouaj tlen tikchiuaj. Titetlapouiaj Jesucristo ye toTeko uan tejuan tinamotlakeualuan porque tikchiuaj ken Jesús.
6 Porque toTajtsin Dios okijto: “Tlauili matlaui kanin tlayoua”. Ika ixko Cristo, toTajtsin Dios kitlauilia toyolo ika itlauil. Nin tlauili techpaleuia matikixmatikan toTajtsin Dios.
7 Tejuan tikchiuaj nin tekitl miak ipati maski tikatej ken konmej de sokitl.* Ijkon tikteititiaj tikpiaj ichikaualis toTajtsin Dios tlen amikaj uelis kipias.
8 Tikpiaj miak ouijkayotl pero amo sepa titsaktokej. Amo tikmatij tlen tikchiuaskej pero nochipa tikajsij ken timakisaskej.
9 Techtlajyouiltiaj pero amo toselti tikatej. Techtlatlamotlaj pero amo techixpolouaj.
10 Maski san kanin tiauij tikixnamikij mikilistli ijkon ken Jesús okipanok. Ijkon oksekimej kitaj titlajyouiaj ken Jesús otlajyoui.
11 Maski tiyoltokej nochipa tikixnamikij mikilistli porque tiidiscípulos Jesús. Ijkon oksekimej kitaj titlajyouiaj ken Jesús otlajyoui.
12 Namejuan nanyoltoskej maski tejuan tikixnamikij mikilistli.
13 Nin tlen ijkuilitok: “Ne onitlajto porque nitlaneltoka”. Tejuan titlajtouaj porque noijki tikteititiaj titlaneltokaj.
14 Porque tikmatij akin okiyoliti Jesús noijki techyolitis para tiyetoskej iuan Jesús uan techuikas ixpan Jesús.
15 Namejuan namechpaleuis nochi tlen opanok para toTajtsin Dios okachi miakej kintliokolis tlen kuali. Ijkon okachi miakej kitlasojkamatiliskej toTajtsin Dios uan kiueyichiuaskej.
16 Ikinon amo timosotlauaj. Maski tikokoxkatitiuij,* mojmostla moyankuilia toyolo uan totlayejyekol.*
17 Maski tlen tikijyouiaj amo uejkaua uan amitlaj ipati, non kichiua okachi matiueyititokan uan nochipa tiueyititoskej.
18 Tejuan amo tikitaj tlen mota. Tejuan tikitaj tlen amo mota. Porque amo uejkauas nochi tlen mota, pero nochipa yetos nochi tlen amo mota.
Notas
^ Noso “tlakemitl”, “tilmajtli”.
^ Noso “akuitlatl”.
^ Noso “tiueuejtitiuij”.
^ Noso “totlanemilil”.
