2 Juan 1:1-13
1 Ne akin yonikokoxkatik* niktlajkuililia siuatl tlen okipejpenkej uan noijki nikintlajkuililia ikoneuan. Ne melauak nikintlasojtla. Pero amo san ne nikintlasojtla noijki kintlasojtlaj akinmej yokimatkej tlen melauak.
2 Porque toyolipan tikpiaj tlen melauak uan nochipa ompa tikpiaskej.
3 ToTajtsin Dios uan Jesucristo tlen ye iKone techtliokoliskej tlen kuali, techiknomatiskej uan techmakaskej yolseuilistli. Yejuan techtlasojtlaskej uan techmachtiskej tlen melauak.
4 Sapanoua onipaki ijkuak onikmatki sekimej mokoneuan kichiuaj tlen melauak ijkon ken toTajtsin otechnauati.
5 Siuatl, amo nimitsijkuililia se yankuik tlanauatil. Nin tlanauatil desde achto tikpiaj uan ompa kijtoua moneki tinochtin timosepantlasojtlaskej.
6 Titetlasojtlaskej kijtosneki nochipa tikchiuaskej tlen toTajtsin technauatia. Ye technauatia nochipa matimotlasojtlakan ken achto otikkakej.
7 Porque ipan tlaltikpak yomonextijkej miakej tekajkayajkej. Yejuan amo kineltokaj Jesucristo ouala ken se tlakatl. Akin ijkon kichiua san tlakajkayaua uan kixnamiki Cristo.
8 Ximomaluikan para amo nankipoloskej tlen otimochijchikajkej otikchijkej. Noijki para nankiseliskej nochi tlateochiuali tlen toTajtsin Dios yonamechyektlalili.
9 ToTajtsin Dios amo kiselia akin amo kichiua tlen otlamachti Cristo uan tlamachtia okse tlamantli. Pero toTajtsin Dios uan iKone kiseliaj akin nochipa kichiua tlen otlamachti Cristo.
10 Tla ikaj namechitati uan amo tlamachtia tlen Cristo otlamachti, amo xiktlajpalokan nion amo xikkalakikan namochan.
11 Porque akin kitlajpaloua kijtosneki kipaleuia makichiua tlen amo kuali.
12 Maski nikneki namechiluis miak tlamantli, amo nikneki nikijkuilos itech se carta. Nikneki nias namechitati uan namouan nimotlapouis para sapanoua nanpakiskej.
13 Mitsontlajpalouaj ikoneuan mokni tlen okipejpenkej.
Notas
^ Noso “yoniueuejtik”.
