2 Tesalonicenses 2:1-17
2 Nokniuan, namejuan nankimatij yinikan yetos toTeko Jesucristo uan nankimatij tejuan iuan timonechikoskej. Ikinon timechtlatlaujtiaj
2 amikaj xikkauilikan makipatla tlen kuali nanmokuayejyekouaj* noso amo ximotekipachokan ijkuak namechiluiskej yoajsiko itonal Jehová. Amo ximotekipachokan maski namechiluiskej iaxka toTajtsin Dios tlen namechmatiltiaj noso ikaj okse namechiluis. Noijki amo ximotekipachokan tla nankitlajtoltiskej se carta tlen kijtouaj tejuan otikijkuilojkej.
3 Amo xiktekauilikan ikaj manamechkajkayaua. Porque ijkuak ayamo ajsiki non tonal, sekimej kikauaskej toTajtsin Dios uan kixnamikiskej. Noijki monextis tlakatl amo yolkuali uan kixpoloskej.
4 Ye tlaixnamiki uan momachilia kinyakapanouia nochtin akinmej moteneuaj dioses noso nochi tlen kiueyichiuaj. Ikinon ye motlalia itech itemplo toTajtsin Dios uan teixpan kijtoua ye se dios.
5 ¿Amo nankilnamikij ne onamechiluiaya nin tlamantli ijkuak ok namouan onikatka?
6 Axkan nankimatij akin kitsakuilijtok tlakatl amo yolkuali uan ijkon monextis ijkuak ajsis tonal.
7 Non tlakatl yikichtakachijtok tlen amo kuali, pero kichtakachijtos tlen amo kuali hasta ijkuak ayakmo yetos akin axkan kitsakuilijtok.
8 Ijkuakon monextis tlakatl amo yolkuali pero toTeko Jesús kipojpolos ika itlajtol tlen kipia chikaualistli. Noijki kipojpolos ijkuak motas yinikan yetos toTeko.
9 Pero tlakatl amo yolkuali kajki porque Satanás kipaleuia makichiua miak tlamantli tetlajtlachialti, makinchiua milagros tlen ika tlakajkayaua,
10 uan kipaleuia makinkajkayaua ika tlen amo kuali akinmej kinmixpoloskej. Yejuan kinmixpoloskej porque amo okiselijkej tlen melauak ika nochi inyolo maski uelis kinmakixtiskia.
11 Ikinon toTajtsin Dios kitekauilia makinkajkayauakan uan ijkon makineltokakan tlen amo melauak.
12 Ijkon nochtin kinmixkomakaskej porque amo okineltokakej tlen melauak. Yejuan okachi okinpakti kichiuaskej tlen amo kuali.
13 Nokniuan, Jehová namechtlasojtla uan moneki nochipa namopatka tiktlasojkamatiliskej. Porque toTajtsin Dios yiuejkika onamechpejpenki para ximomakixtikan. Ijkon opanok porque onamechchipa ika iespíritu uan onankineltokakej tlen melauak.
14 Ye onamechpejpenki para ximomakixtikan ika kuali tlajtoli tlen tejuan tiktematiltiaj. Ijkon uelis namechueyitlaliskej ken toTeko Jesucristo.
15 Ikinon nokniuan ximoyekketokan uan nochipa xikchiuakan tlen onamechmachtijkej ijkuak onamechtlapouijkej noso onamechmachtijkej ika se tocarta.
16 ToTajtsin Dios techtlasojtla uan techtliokolia tlen kuali, ikinon nochipa techyolchikaua uan kichiua itlaj matikchiakan. ToTajtsin Dios uan toTeko Jesucristo
17 manamechyolchikauakan uan manamechpaleuikan nochipa xikchiuakan uan xikijtokan tlen kuali.
Notas
^ Noso “nanmonejneuiliaj”.
