2 Timoteo 3:1-17
3 Pero moneki tikmatis itlamian tonalmej yetos oui uan oui kixikoskej.
2 Porque miakej san yejuan motlasojtlaskej, kixnekiskej tomin, moueyinekiskej, tetlauelitaskej, tlauijuikaltiskej, amo kintlakamatiskej* inpapanuan, amo motlasojkamatiskej uan ayakmo mouikaskej inuan oksekimej,
3 amo tetlasojtlaskej, amo teajsikamatiskej, kinteneuaskej* oksekimej para amo kuali makinmitakan, amo kimatiskej monauatiskej, tetlajyouiliskej uan kikokoliskej tlen kuali,
4 tekajkayauaskej, amo mokuayejyekoskej* tlen kichiuaskej, sapanoua moueyinekiskej, san moyolpaktiskej uan amo kiyolpaktiskej toTajtsin Dios,
5 kijtoskej kitekichiuiliaj toTajtsin Dios pero tlen kichiuaskej kiteititis amo melauak kitekichiuiliaj. Te amo inuan ximouika.
6 Ompa kisaj sekimej tlakamej tlen tlakajkayauaj. Yejuan kalakij inchan siuamej tlen amo chikauakej para kinyoltilanaskej. Nonmej siuamej sapanoua tlajtlakolchiuaj, san kichiuaj tlen kinyoltilana
7 uan nochipa momachtiaj pero amo keman ueli kajsikamatij nochi tlen melauak.
8 Yejuan kixnamikij tlen melauak ijkon ken Janes uan Jambres okixnamikej Moisés. Nonmej tlakamej amo kuali mokuayejyekouaj* uan toTajtsin Dios amo kinselia porque amo tlaneltokaj.
9 Pero amo kuali kisas tlen kichiuaj, porque nochtin kitaskej yejuan kuatlapolouaj ijkon ken okinpanok Janes uan Jambres.
10 Te kuali tikchiua tlen nitlamachtia uan tlen nikchiua, tikchiua tlen moneki ijkon ken ne nikchiua, titlaneltoka ijkon ken ne nitlaneltoka, timochia ijkon ken ne nimochia, titetlasojtla ijkon ken ne nitetlasojtla uan titlaxikoua ijkon ken ne nitlaxikoua.
11 Te tikmati ken onitlajyoui Antioquía, Iconio uan Listra. Onitlaxiko ijkuak onechtlajyouiltijkej uan toTeko nochipa onechpaleui.
12 Kintlajyouiltiskej nochtin idiscípulos Cristo Jesús tlen kinekij kiueyichiuaskej toTajtsin Dios.
13 Pero akinmej amo yolkualmej uan akinmej tlakajkayauaj okachi kichiuaskej tlen amo kuali. Tlakajkayauaskej uan yejuan noijki kinkajkayauaskej.
14 Pero te nochipa xikchiua tlen omitsmachtijkej uan tlen omitspaleuijkej xikneltoka porque tikmati akinmej omitsmachtijkej.
15 Desde tikonetl te tikixmati iTlajtol toTajtsin Dios tlen ijkuilitok. ITlajtol toTajtsin Dios mitspaleuis xiyeto tiixtlamatki uan ijkon timomakixtis porque tikneltoka Cristo Jesús.
16 Nochi tlen ijkuilitok itech iTlajtol toTajtsin Dios ye iaxka. Techpaleuia matitlamachtikan, techititia ijkuak itlaj amo kuali kajki, techpaleuia matikyektlalikan nochi tlamantli uan ika tikinpaleuiaj oksekimej mamokuayejyekokan* ijkon ken kijtouaj itlanauatiluan toTajtsin Dios.
17 Ijkon akin kiueyichiua toTajtsin Dios kipias iyelis tlen kipaleuis makimati ken kichiuas nochi tlen kuali.
Notas
^ Noso “kinuelkakiskej”.
^ Noso “kinmijtoskej”, “kinpojpouaskej”.
^ Noso “monejneuiliskej”.
^ Noso “monejneuiliaj”.
^ Noso “mamonejneuilikan”.
