Gálatas 2:1-21
2 Ijkuak opanok 14 xiuitl, oksepa onia* Jerusalén iuan Bernabé uan noijki onikuikak Tito.
2 Onia* porque itlaj onechmatiltijkej uan onikinyekilui tokniuan kuali tlajtoli tlen nikintlapouia akinmej amo judíos. Pero ijkon onikchi san inmixpan tokniuan tlen sapanoua kintlakaitaj, porque oniknekiaya nikmatis kox kuali oniktekichiuilijtoka toTajtsin Dios noso amo, tlamo san nenka tlen onikchi.
3 Pero Tito tlen nouan okatka amo okichiualtijkej makimochiuili circuncisión maski okatka griego.
4 Ouijkayotl opejki porque okatkaj sekimej tlen amo melauak tokniuan. Tejuan ayakmo tikatej imak tlanauatil porque tikatej iuan Cristo Jesús. Pero yejuan okinekiayaj techchiualtiskej oksepa matiyetokan imak tlanauatil.
5 Pero tejuan amo keman otikinkakej nion amo otikchijkej tlen yejuan okinekiayaj, porque tiknekij xikpiakan melauak kuali tlajtoli.
6 Tokniuan tlen sapanoua kintlakaitaj uan kinmitaj ueyititokej amitlaj yankuik onechiluijkej. Ne amo noteki ken okatkaj achto porque toTajtsin Dios amo techikoita.
7 Yejuan okajsikamatkej onechnauatijkej manikintlapoui kuali tlajtoli akinmej amo okimochiuilijkej circuncisión, ijkon ken Pedro okinauatijkej makintlapoui akinmej okimochiuilijkej circuncisión.
8 ToTajtsin Dios okimakak chikaualistli Pedro para mayeto apóstol innauak akinmej okimochiuilijkej circuncisión. Ne noijki onechmakak chikaualistli para maniyeto niapóstol innauak akinmej amo judíos.
9 Yejuan noijki okajsikamatkej toTajtsin Dios onechtliokoli tlen kuali. Ijkuakon tlayekankej* Santiago, Cefas* uan Juan otechmakitskijkej ika inyekma ne uan Bernabé. Non okiteititi kuali okitayaj matiakan kanin okatkaj akinmej amo judíos uan yejuan yaskiaj kanin okatkaj akinmej okimochiuilijkej circuncisión.
10 San otechiluijkej amo matikinmilkauakan akinmej amitlaj kipiaj. Ne nimochijchikaua ijkon nikchiuas.
11 Pero ijkuak Cefas* ouala Antioquía, onikixilui amo kuali tlen okichijtoka.
12 Ye otlakuaya inuan akinmej amo judíos ijkuak ayamo ajsiayaj tlakamej tlen okintitlanki Santiago. Pero ayakmo inuan otlakuaj ijkuak nonmej tlakamej oajsitoj. Noijki ayakmo inuan omouikaya porque okinmauiliaya* akinmej okinekiayaj makimochiuilikan circuncisión.
13 Oksekimej judíos noijki opejki kipiaj ome inmixko uan opejki kichiuaj ken ye. Hasta Bernabé noijki opejki kipia ome ixko ijkon ken yejuan.
14 Ijkuak onikitak amo okichiuayaj ken kijtoua melauak kuali tlajtoli, onikilui Cefas* inmixpan nochtin: “Maski te tijudío tikchiua ken akinmej amo judíos uan amo tikchiua ken judíos, ¿tleka tikinchiualtia akinmej amo judíos makichiuakan ken judíos?”.
15 Tejuan otineskej* tijudíos uan amo tikchiuaj ken akinmej amo judíos tlen tlajtlakolchiuaj.
16 Tejuan kuali tikmatij ikaj kitaj yolkuali porque kineltoka Jesucristo uan amo porque kitlakamati* tlanauatil. Ikinon tikneltokaj Cristo Jesús para matechitakan tiyolkualmej porque tikneltokaj Cristo uan amo porque tiktlakamatij* tlanauatil. Amikaj kitaskej yolkuali porque kitlakamati* tlanauatil.
17 Tla tejuan techitaj titlajtlakolejkej maski timochijchikauaj matechitakan tiyolkualmej porque tikneltokaj Cristo, ¿kijtosneki Cristo technauatia matitlajtlakolchiuakan? Amo.
18 Nikteititis nikixnamiki tlanauatil tla axkan oksepa nikyektlalis tlen achto onikxixini.
19 Ne oniktlakamatki* tlanauatil ikinon imak onixpoliuik uan ijkon niyoltos para toTajtsin Dios.
20 Ne nipilkatok itech kouitl iuan Cristo. Ayakmo nikchiua san tlen ne nikneki porque Cristo yoltok uan nouan kajki. Axkan niyoltok itech nin cuerpo porque nikneltoka iKone toTajtsin Dios. Ye onechtlasojtlak uan nopatka omotemakak.
21 Ne amo nikixtopeua itetliokolil toTajtsin Dios tlen kuali, porque tla ikaj mochiua yolkuali ijkuak kitlakamati* tlanauatil, kijtosneki amitlaj ipati oixpoliuik Cristo.
Notas
^ Noso “onitlejkok”.
^ Noso “onitlejkok”.
^ Noso “akinmej okatkaj ken tlaketsalmej itech tlanechikol”.
^ Noijki omotokayotiaya Pedro.
^ Noijki omotokayotiaya Pedro.
^ Noso “okinmimakasiaya”.
^ Noijki omotokayotiaya Pedro.
^ Noso “otitlakatkej”.
^ Noso “kiuelkaki”.
^ Noso “tikuelkakij”.
^ Noso “kiuelkaki”.
^ Noso “onikuelkaki”.
^ Noso “kiuelkaki”.
