Gálatas 6:1-18
6 Nokniuan, tla ikaj mokxitlanuia uan amo kita, namejuan tlen nanmoyekanaj ika espíritu santo, xiktemokan ken nankiyektlaliskej ika yolyamanilistli. Pero nannochtin ximotlachilikan para amo nankichiuaskej tlen amo kuali.
2 Ximopaleuikan ijkuak nantlajyouiaj uan ijkon nankichiuaskej tlen kijtoua itlanauatil Cristo.
3 Porque san iselti mokajkayaua akin momachilia ueyititok maski amo melauak.
4 Pero se tlakatl moneki kitas kox kuali tlen kichiua uan amo makita tlen kichiuaj oksekimej. Ijkon tlen ye kichiuas kipaleuis mapaki.
5 Sejse moneki kichiuas iteki uan amo inteki oksekimej.
6 Akin momachtia iTlajtol toTajtsin Dios makimaka nochi tlen kuali akin kimachtia.
7 Amo ximokajkayauakan: amikaj uelis kipinauis toTajtsin Dios. Tinochtin tikololoskej tlen tiktokaj.
8 Ixpoliuis akin moyekana ika tlen amo kuali kineki kichiuas icuerpo. Pero espíritu santo kichiuas nochipa mayolto akin moyekana ika espíritu santo.
9 Ikinon nochipa matikchiuakan tlen kuali porque ajsis tonal tikololoskej tlen otiktokakej tla amo timosotlauaj.
10 Nochtin matikinpaleuikan ijkuak tiuelij, pero okachi matikinpaleuikan tokniuan tlen tlaneltokaj.
11 Xikitakan onamechtlajkuilili ika uejueyij letras.
12 Akinmej namechchiualtiaj xikmochiuilikan circuncisión san kinekij kinyolpaktiskej oksekimej. Ijkon kichiuaj porque amo kinekij makintlajyouiltikan ipatka Cristo tlen okimiktijkej itech kouitl.*
13 Porque akinmej kimochiuiliaj circuncisión amo kitlakamatij* iTlanauatil Moisés. Yejuan kinekij xikmochiuilikan circuncisión para moueyinekiskej porque onankimochiuilijkej circuncisión.
14 Pero ne amo nikneki nimoueyinekis ika okseki tlamantli. San nikneki nimoueyinekis porque toTeko Jesucristo okimiktijkej itech kouitl. Ne nikita por ye katej ken miktokej akinmej amo kitekichiuiliaj toTajtsin Dios uan yejuan noijki ijkon nechitaj.
15 Amitlaj ipati tla ikaj kimochiuilis circuncisión noso amo kimochiuilis, okachi ipati toTajtsin Dios makiyankuili.
16 Makipiakan yolseuilistli nochtin akinmej pouij itech Israel tlen iaxka toTajtsin Dios, uan ye makimiknomati porque yejuan kipiaj innemilis ken moneki.
17 Axkan ayakmo ikaj manechkuejso porque itech nocuerpo mota niitlakeual Jesús.
18 Nokniuan, toTeko Jesucristo manamechtliokoli tlen kuali porque nankipiaj kuali namoyolo. Amén.
