Apocalipsis 11:1-19
11 Noijki onechmakakej se akatl tlen omotaya ken se tlakotl tlen ika tlatamachiuaj. Ye onechilui: “Ximoketsa uan xiktamachiua itemplo toTajtsin Dios, altar uan akinmej ompa tlaueyichiuaj.
2 Pero amo xitlatamachiua kiauak kanin kajki templo porque yokinmakakej akinmej chantij itech okseki altepemej. Yejuan 42 metstli tlajtlaksaskej* ipan altepetl chipauak.
3 Nikchiuas makitematiltikan ome notestigos 1,260 tonalmej tlen toTajtsin Dios kijtoua ika intlaken tetsojtsopiti”.*
4 Nonmej testigos kinneskayotiaj ika ome olivos uan ika ome candelabros. Yejuan moketokej ixpan akin iaxka tlaltikpak.
5 Tla ikaj kineki itlaj kintoktis, inkamak kisa tlitl uan kintlatia akinmej kinkokoliaj. Ijkon mikiskej nochtin tlen kinekij itlaj kintoktiskej.
6 Yejuan kinkauiliaj makitsakuakan iluikak uan amo makitekauilikan makiaui ijkuak kitematiltiskej tlen toTajtsin Dios okinmilui. Noijki kinkauiliaj atl makikopakan estli uan makijtlakokan tlaltikpak ika nochi chauistli ijkuak yejuan kinekiskej.
7 Ijkuak tlamis kitematiltiskej tlen toTajtsin Dios okinmatilti, yolkatl temomojti tlen kisa kanin tlauejkatlan kinteuis, kintlanis uan kinmiktis.
8 Incuerpo mokauas ojtli kanin miakej panouaj itech ueyi altepetl. Sodoma uan Egipto kineskayotiaj non altepetl kanin inTeko noijki okimiktijkej itech kouitl.
9 Akinmej tlatlamantli inmialtepe, tlatlamantli infamilia, tlatlamantli intlajtol uan akinmej nouian chantij, eyi tonal uan tlajko kinmitaskej incuerpo. Amo kitekauiliskej makintokakan incuerpo.
10 Pakiskej akinmej chantij ipan tlaltikpak uan iluichiuaskej porque omikej. Noijki motlatliokoliskej porque nonmej ome profetas okintlajyouiltijkej akinmej chantij tlaltikpak.
11 Ijkuak opanok eyi tonal uan tlajko, toTajtsin Dios okinyoliti uan yejuan omoketskej. Sapanoua omomojtijkej akinmej okinmitakej.
12 Ijkuakon yejuan okikakej ikaj chikauak otlajto iluikak uan okinmilui: “Nikan xitlejkokan”. Yejuan otlejkokej iluikak ipan se mixtli uan akinmej okinkokoliayaj okinmitakej.
13 Ijkuakon chikauak otlalolinki. Altepetl okixelojkej majtlaktli partes uan se parte ouetski. Oixpolikej 7,000 porque otlalolinki. Oksekimej sapanoua omomojtijkej uan okiueyichijkej toTajtsin Dios tlen iaxka iluikak.
14 Yopanok ome tlajyouilistli pero san niman panos okse tlajyouilistli.
15 Ángel chikome okipitski itrompeta. Ijkuakon chikauak otlajtojkej iluikak uan okijtouayaj: “ToTajtsin Dios uan iCristo axkan yitlanauatiaj ipan tlaltikpak uan ye nochipa tlanauatis”.
16 Veinticuatro tlayekankej tlen okatkaj* ipan intronos ixpan toTajtsin Dios, omotlankuaketskej uan okiueyichijkej toTajtsin Dios.
17 Yejuan okijtojkej: “ToTajtsin Dios Jehová, te tikpia nochi chikaualistli, te axkan tika uan yotikatka. Timitstlasojkamatiliaj porque yotiknejneki* mochikaualis uan yopejki titlanauatia.
18 Pero akinmej chantij itech altepemej sapanoua okualankej. Ijkuakon otikteititi tikualani uan oajsik tonal tlen omoijto para kinmixkomakaskej akinmej yoixpolikej. Noijki para tikinteochiuas motlakeualuan, profetas, akinmej yolchipauakej uan akinmej kitlakaitaj motoka maski ueyititokej noso amo ueyititokej. Noijki para tikinmixpolos akinmej kijtlakouaj tlaltikpak”.
19 Ijkuakon itech iluikak omotlapo itemplo toTajtsin Dios uan itech itemplo omotak arca tlen ika omochi acuerdo.* Noijki otlapejpetlanki, omokak otlajtouayaj, otlatijtikuinki, otlalolinki uan chikauak otesiuik.
Notas
^ Noso “mokejketsaskej”.
^ Xikita diccionario.
^ Noso “oeuatokaj”, “oyetokaj”.
^ Noso “yotiktekitilti”, “yotikkuik”.
^ Noso “pacto”. Xikita diccionario.
