Apocalipsis 15:1-8
15 Itech iluikak onikitak okse ueyi milagro tetlajtlachialti: chikome ángeles okiualikayaj chikome chauistli. Ninmej saiktlami chauistli ika tlamis ikualanilis toTajtsin Dios.
2 Noijki onikitak itlaj ken mar de vidrio tlen onelitoka iuan tlitl. Onikinmitak akinmej okitlanilijkej yolkatl temomojti, iimagen uan número tlen kipia itoka. Yejuan omoketokaj itempa mar de vidrio uan okinkitskijtokaj iarpas toTajtsin Dios.
3 Yejuan otlakuikatokaj itlakuikal Moisés, itlakeual toTajtsin Dios uan itlakuikal Ichkatsin. Okijtouayaj:
“ToTajtsin Dios Jehová akin tikpia nochi chikaualistli, tlen otikchijchi sapanoua uejueyij uan tetlajtlachialti. Te tiTekiua tlen nochipa tiyoltok, kuali nochi tlen tikchiua uan tikijtoua tlen melauak.
4 Jehová, ¿akin amo mitsmauilis? ¿Akin amo kiueyichiuas motoka? San te amo keman titekaua. Monauak uitsej nochtin akinmej chantij itech altepemej uan mitsueyichiuaskej porque yejuan kitaj kuali titlaixkomaka”.
5 Satepan ijkuak ijkon opanok, onikitak itech iluikak omotlapo kanin santo itech tabernáculo.*
6 Kanin santo okiskej chikome ángeles tlen okiualikayaj chikome chauistli. Yejuan otlakentokaj ika lino chipauak tlen opetlaniaya. Noijki oelpanilpitokaj ika oro.
7 Se querubín* okinmakak chikome ángeles chikome tazones de oro. Nonmej tazones otentokaj ika ikualanilis toTajtsin Dios tlen nochipa yoltok.
8 Kanin santo otlapoktenki por iueyitilis toTajtsin Dios uan por ichikaualis. Amikaj ueli okalakiaya kanin santo hasta ijkuak tlamiskiaj chikome chauistli tlen okinpiayaj chikome ángeles.
Notas
^ Noso “kaltsintli tlen okiteititiaya toTajtsin Dios inuan okatka”.
^ Querubín kijtosneki se ángel tlen okachi tlanauatia.
