Apocalipsis 18:1-24
18 Satepan ijkuak ijkon opanok, onikitak okse ángel tlen otlanauatiaya oualtemouaya iluikak uan ipan tlaltikpak otlaui iueyitilis.
2 Ye chikauak okijto: “¡Youetski! ¡Youetski Ueyi Babilonia! Axkan ompa motlatiaj ejekamej,* ompa motlatiaj nochtin espíritus sokiojkej uan nochi totomej sokiojkej tlen kinkokoliaj.
3 Porque nochi altepemej ouintikej ika ivino tlen kichiua makinekikan auilnemiskej.* Tekiuajkej tlen katej tlaltikpak oauilnenkej iuan non siuatl. Tlasemankej tlen katej tlaltikpak omotomintijkej porque ye kipia sapanoua miak tlamantli ipati uan amo pinaua”.
4 Onikkak okse otlajto iluikak uan okijtouaya: “Namejuan tlen nanpouij itech noaltepe, ayakmo ompa xiyetokan tla amo nankinekij nankipaleuiskej matlajtlakolchiua uan tla amo nankinekij manamechajsi chauistli tlen kiselis.
5 Porque sapanoua yotlajtlakolchi uan toTajtsin Dios kixkomakas tlen amo kuali okichi.
6 Xiktoktikan ijkon ken okintokti oksekimej. Ojpa xiktoktikan tlen ye okichi. Ojpa xiknelilikan tlen ye okinelo ijtik copa.
7 Ye moneki tlajyouis uan moneki moyolkokos porque moueyineki, okololo miak tlamantli ipati uan amo pinaua. Iyolipan nochipa kijtoua: ‘Nika* ken se tekiua, nonamik yoltok uan amo keman nimoyolkokos’.
8 Ikinon san ipan se tonal kajsis nochi chauistli. Mikilistli, apistli, moyolkokos uan sepa kitlatiskej. Porque toTajtsin Dios Jehová kipia chikaualistli uan ye yokixkomakak”.
9 “Tekiuajkej tlen katej tlaltikpak oauilnenkej* iuan non siuatl, san sekan okololojkej miak tlamantli ipati uan amo opinauakej. Yejuan moyolkokoskej, moelpanuitekiskej uan chokaskej ijkuak kitaskej popoka porque okitlatijkej.
10 San uejka moketoskej porque momojtiskej makintlajyouiltikan ken ye uan kijtoskej: ‘¡Mialma! ¡Mialma ueyi altepetl Babilonia tlen chikauak! ¡Porque san ipan se hora toTajtsin Dios okixkomakak!’”.
11 “Noijki tlasemankej tlen katej tlaltikpak kichokiliskej uan moyolkokoskej porque ayakmo ikaj kinkouilis nochi tlen kinemakaj.
12 Oro, plata, temej* kuajkualtsitsintin, perlas, kuali tsotsoli* de lino, tsotsoli* morado, tsotsoli* de seda uan tsotsoli* chichiltik tlen petlani. Noijki nochi tlen okichijkej ika kouitl ajuiak, nochi tlen okichijkej ika marfil uan ika kouitl kuajkualtsin, cobre uan tepostli noso mármol.
13 Noijki canela, xiuitl ajuiak tlen onka India, kopali, aceite ajuiak, kopali istak, vino, aceite de oliva, kuali harina, trigo, vacas, ichkamej, caballos, carruajes,* tlakeualmej uan personas.
14 Ayakmo moaxka nochi tlamantli kuali tlen otiknekiaya. Noijki ayakmo tikpias tlakuali uelik uan nochi tlamantli kuajkualtsin. Ayakmo keman tikpias”.
15 “Tlasemankej tlen okinemakayaj nin tlamantli uan okinpaleui mamotomintikan, san uejka moketoskej porque momojtiskej makintlajyouiltikan ken ye. Yejuan chokaskej uan moyolkokoskej.
16 Kijtoskej: ‘¡Mialma! ¡Mialma ueyi altepetl tlen tlakentok ika kuali tlakemitl de lino, tlakemitl morado uan tlakemitl chichiltik tlen petlani! ¡Noijki kipia miak tlamantli de oro, temej* kuajkualtsitsintin uan perlas!
17 ¡San ipan se hora opojpoliuik uejueyij tlamantli miak ipati!’”.
“San uejka omoketokaj nochtin tlen okiuikayaj barco, akinmej ompa oyayaj, akinmej tekipanouaj itech barco uan akinmej tekipanouaj itech mar para kimotlaniliskej tlen ika mopanoltiskej.
18 Ijkuak okitakej tlapopoka porque okitlatijkej, chikauak okijtouayaj: ‘¿Kox onka se altepetl ken nin ueyi altepetl?’.
19 Okimokuatlaliliayaj tlalpinoli, omoyolkokouayaj, ochokayaj uan chikauak okijtouayaj: ‘¡Mialma! ¡Mialma ueyi altepetl porque otlapaleui mamotomintikan nochtin tlen kinpiaj barcos itech mar! ¡San ipan se hora opojpoliuik!’”.
20 “¡Namejuan tlen nankatej iluikak xipakikan ika tlen okipanok! ¡Noijki xipakikan namejuan akinmej nanyolchipauakej, apóstoles uan profetas! Porque toTajtsin Dios okixkomakak non siuatl uan ijkon onamechpaleui”.
21 Se chikauak ángel okajkokuik se tetl tlen omotaya ken se ueyi tetl tlen ika tlakuechouaj, okitlamotlak ijtik mar uan okijto: “Ijkon san niman kitlamotlaskej ueyi altepetl Babilonia uan ayakmo keman oksepa motas.
22 Ompa ayakmo keman mokakiskej akinmej tlakuikaj ijkuak kitsotsonaj inmiarpa, akinmej tlatsotsonaj, akinmej kipitsaj flauta noso akinmej kipitsaj trompeta. Ompa ayakmo keman motaskej akinmej tlatlamantli tekipanouaj. Ompa ayakmo keman mokakis tetl tlen ika tlakuechouaj.
23 Ompa ayakmo keman tlauis nion se tlauili nion ayakmo keman mokakis tlajtos se novio noso se novia. Porque akinmej omitstlasemaniliayaj oueyititokaj ipan tlaltikpak uan porque otikinkajkaya ika naualotl akinmej chantij itech altepemej.
24 Itech non altepetl okajsikej inmieso profetas, inmieso akinmej yolchipauakej uan inmieso nochtin akinmej okinmiktijkej ipan tlaltikpak”.
Notas
^ Noso “demonios”.
^ Ika griego moijtoua pornéia. Xikita diccionario kanin kijtoua auilnemi.
^ Noso “nieuatok”, “niyetok”.
^ Ika griego moijtoua pornéia. Xikita diccionario kanin kijtoua auilnemi.
^ Noso “tepejximej”.
^ Noso “tlakemitl”, “tilmajtli”.
^ Noso “tlakemitl”, “tilmajtli”.
^ Noso “tlakemitl”, “tilmajtli”.
^ Noso “tlakemitl”, “tilmajtli”.
^ Ninmej carros kipiaj naui ruedas uan kintilanaj caballos.
^ Noso “tepejximej”.
