Apocalipsis 9:1-21
9 Ángel makuili okipitski itrompeta. Ijkuakon onikitak se sitlali tlen ouetski ipan tlaltikpak desde iluikak uan okimakakej illave tekochtli uejkatlan.
2 Sitlali okitlapo tekochtli uejkatlan uan ompa opankiski poktli ken ipokyo se ueyi horno. Tonaltsin uan ejekatl opoktlileuakej ika tlen okisaya ijtik tekochtli.
3 Ijtik poktli okiskej chapulimej tlen oualajkej tlaltikpak. Yejuan okinkauilijkej matlanauatikan ken tlanauatiaj kolomej* ipan tlaltikpak.
4 Okinnauatijkej amitlaj makitoktikan sakatl, okseki xiuitl uan kojyo tlen kajki ipan tlaltikpak. San makinkojkokan akinmej amo kipiaj inmixkuak isello toTajtsin Dios.
5 Chapulimej okinkauilijkej makintlajyouiltikan makuili metstli akinmej chantij tlaltikpak, pero amo okinkauilijkej makinmiktikan. Yejuan otetlajyouiltiayaj ken se kolotl* tetlajyouiltia ijkuak tetsopitia.
6 Ijkuakon akinmej chantij tlaltikpak kitemoskej mikiskej pero amo uelis mikiskej. Kinekiskej mikiskej pero ayamo uelis mikiskej.
7 Chapulimej omotayaj ken caballos tlen yikatej para kimomakatiuij. Noijki ipan intsonteko okipiayaj itlaj ken se corona de oro uan inmixko omotaya ken tlakamej.
8 Intsonkal okatka ken itsonkal se siuatl uan intlanuan okatkaj ken itlanuan león.
9 Tlen ika omoelpantsakuiliayaj omotaya ken tepostli. Inmiajasuan* omokakiayaj ken ijkuak caballos kinuikaj carretas kanin yauij kimomakatiuij.
10 Itech inkuitlapil okipiayaj veneno ken kolomej.* Itech inkuitlapil okipiayaj inchikaualis para kinkojkoskej makuili metstli akinmej chantij tlaltikpak.
11 Yejuan kinnauatia ángel tlen tlamaluia kanin tlauejkatlan. Ika hebreo itoka Abadón* uan ika griego itoka Apolión.*
12 Yopanok achto tlajyouilistli pero ok poliui panos ome tlajyouilistli.
13 Ángel chikuase okipitski itrompeta. Ijkuakon onikkak se tlajtoli tlen okisaya itech ikuakonuan altar de oro tlen kajki ixpan toTajtsin Dios.
14 Okilui ángel chikuase tlen okipiaya trompeta: “Xikintotoma naui ángeles tlen ilpitokej inakastlan ueyi aueyatl Éufrates”.
15 Ijkuakon okintotonkej naui ángeles tlen omoyektlalijkej para hora tlen yomoijto, tonal, metstli uan xiuitl. Nochtin tlen chantij tlaltikpak okinxelojkej eyi grupos uan se grupo kinmiktiskiaj.
16 Ne onikkak okatkaj 200 millones* soldados tlen oyayaj ipan caballos.
17 Caballos tlen onikinmitak uan akinmej inpan oyayaj okatkaj ijkin: tepostli tlen ika omoelpantsakuiliayaj okatkaj chichilikej ken tlitl, azules ken jacinto uan kostikej ken azufre. Intsonteko caballos okatkaj ken intsonteko leones. Inkamak okisaya tlitl, poktli uan azufre.
18 Nochtin tlen chantij tlaltikpak okinxelojkej eyi grupos uan se grupo okinmikti ninmej eyi chauistli: tlitl, poktli uan azufre tlen okisaya inkamak caballos.
19 Porque inchikaualis caballos kipiaj itech inkamak uan itech inkuitlapil. Inkuitlapil okatka ken se kouatl uan kipia itsonteko. Yejuan tetlajyouiltiaj ika inkuitlapil.
20 Pero oksekimej tlen amo omikej ika ninmej chauistli, amo omoyolkopkej uan amo okikajkej tlen okichiuayaj. Yejuan ok okinueyichiuayaj ejekamej* uan imágenes de oro, plata, cobre, tetl uan de kouitl. Nonmej imágenes amo ueli tlachiaj, amo ueli tlakakij nion amo ueli nejnemij.
21 Amo omoyolkopkej uan ok otemiktiayaj, okichiuayaj naualotl, oauilnemiayaj* uan otlachtekiayaj.
Notas
^ Noso “escorpiones”.
^ Noso “escorpión”.
^ Noso “inmajtlapaluan”, “inmastikapaluan”.
^ Noso “escorpiones”.
^ Kijtosneki “tlaxixini”.
^ Kijtosneki “akin tlaxixinia”.
^ Ika griego moijtoua “ome miríadas de miríadas”.
^ Noso “demonios”.
^ Ika griego moijtoua pornéia. Xikita diccionario kanin kijtoua auilnemi.
