Colosenses 3:1-25
3 Tla namejuan onamechyolitijkej iuan Cristo, nochipa xiktemokan tlen onka iluikak kanin kajki* Cristo iyekma toTajtsin Dios.
2 Ximokuayejyekojtokan* tlen onka iluikak uan amo ximokuayejyekojtokan* tlen onka tlaltikpak.
3 Porque namejuan onamixpolikej uan namoyolilis tlatitok itech Cristo ijkon ken kineki toTajtsin Dios.
4 Cristo kitemaka yolilistli. Ijkuak ye kiteititis ichikaualis, noijki moteititis namejuan iuan namechueyitlaliaj.
5 Ikinon xikpojpolokan tlen amo kuali nankipiaj. Ijkon amo nanauilnemiskej,* amo nankichiuaskej tlen pitsotik, amo sapanoua nankinekiskej ikaj iuan nanmotekaskej, amo nankichiuaskej tlen amo kuali nankimachiliaj uan amo nantlaixnekiskej tlen yetoskia ken nankinueyichiuaskej dioses.
6 Porque toTajtsin Dios kintlajyouiltis akinmej ijkon kichiuaj.
7 Achto nansekimej ijkon onankipiayaj namonemilis.
8 Pero axkan ayakmo xikualanikan, ayakmo xikualankamikikan, ayakmo xikchiuakan tlen amo kuali, ayakmo xiteyolkokokan uan ayakmo xipitsotlajtokan.
9 Amo xikinkajkayauakan oksekimej. Xikkauakan namonemilis tlen achto onankipiayaj uan tlen onankichiuayaj.
10 Xikpiakan yankuik namonemilis tlen toTajtsin Dios techmaka ijkuak tikixmatij. Tonemilis moyankuilia uan mochiua ken iyelis toTajtsin Dios.
11 Nochtin uelis kipiaskej yankuik innemilis maski griegos noso judíos, maski okimochiuilijkej circuncisión noso amo, maski akinmej uitsej itech okseki altepemej noso akinmej amo tlaixmatij,* maski tlakeualmej noso amo. Cristo kajki itech nochi tlamantli uan tejuan iuan tikatej.
12 Namejuan onamechpejpenki toTajtsin Dios, nanyolchipauakej uan namechtlasojtla ikinon xikteititikan nanteiknomatij, xiyetokan nanyolkualmej, xiyetokan nanyolyamankej, amo ximoueyinekikan uan ximochiakan.
13 Nochipa xikxikokan tlen oksekimej kichiuaj uan xikintlapojpoluikan ika nochi namoyolo maski itlaj namechtoktiskej. Jehová onamechtlapojpolui ika nochi iyolo ikinon namejuan noijki ijkon xikchiuakan.
14 Pero okachi ipati xikteititikan nantetlasojtlaj porque non kinpaleuia nochtin kuali mamouikakan.
15 Iyolseuilis Cristo makinauati namoyolo porque namejuan onamechnotskej para kuali xiyetokan uan xipouikan san itech se cuerpo. Noijki xikteititikan nanmotlasojkamatij.
16 Tlen otlamachti Cristo nochipa mayeto namoyolipan uan ijkon nanyetoskej namixtlamatkej. Nochipa ximomachtikan uan ximoyolchikauakan inuan oksekimej ika salmos. Noijki xiktlakuikilikan toTajtsin Dios para nankiueyichiuaskej uan nankitlasojkamatiliskej. Xiktlakuikilikan Jehová ika nochi namoyolo.
17 Maski san tlen nankichiuaskej noso san tlen nankijtoskej, nochi xikchiuakan ika itoka toTeko Jesús. Noijki ika itoka ximotlasojkamatikan inauak toTajtsin Dios.
18 Siuamej, xikkauilikan namonamik manamechyekana ijkon ken moneki kichiuaskej idiscípulos Cristo.
19 Tlakamej, nochipa xikintlasojtlakan namosiuauan uan amo san xikinmajuatokan.
20 Konemej, nochipa xikintlakamatikan* namopapanuan porque toTeko ijkon kipaktia.
21 Tetajmej, amo xikinkualanijtokan namokoneuan para amo mamoyolkokokan.
22 Tlakeualmej, ika nochi namoyolo nochipa xiktlakamatikan* namoteko porque nankitlakaitaj Jehová. Amo ijkon xikchiuakan san ijkuak yejuan namechitaskej para nankinyolpaktiskej oksekimej.
23 Maski san tlen tlamantli nankichiuaskej, xikchiuakan ika nochi namoyolo ken yetoskia para Jehová uan amo para tlakamej.
24 Porque nankimatij Jehová namechmakas namotetliokolil. Xiktekichiuilikan Cristo porque ye toTeko.
25 Akin kichiuas tlen amo kuali, kitlaxtlauas tlen kichiuas porque toTajtsin Dios nochtin kinmixkomakas.
Notas
^ Noso “euatok”, “yetok”.
^ Noso “ximonejneuilijtokan”.
^ Noso “ximonejneuilijtokan”.
^ Ika griego moijtoua pornéia. Xikita diccionario kanin kijtoua auilnemi.
^ Ika griego moijtoua escita. Yiuejkika ijkon okinmiluiayaj akinmej okintlauelitayaj porque amo okinpaktiaya tlen okichiuayaj.
^ Noso “xikinuelkakikan”.
^ Noso “xikuelkakikan”.
