Efesios 4:1-32
4 Ne niPablo, nitsaktok porque niktekichiuilia toTeko. Namechtlatlaujtia xiyeknemikan porque toTajtsin Dios onamechnotski.
2 Xiyetokan nanyolyamankej, amo ximoueyinekikan, ximochiakan, xikxikokan tlen oksekimej kichiuaj uan xikintlasojtlakan.
3 Espíritu santo namechpaleuia san sekan xiyetokan, ikinon ximochijchikauakan san sekan xiyetokan uan kuali ximouikakan.
4 Onka san se cuerpo uan san se espíritu. Noijki tikchiaj san se tlamantli tikseliskej tlen toTajtsin Dios yokijto techmakas.
5 Onka san se toTeko, san se tlamantli tikneltokaj uan san se tlamantli timoapolaktiaj.
6 Onka san se Dios tlen nochtin inTajtsin. Ye nochtin kinnauatia, nochi kinejneki* para kichiuas miak tlamantli uan ichikaualis kajki itech nochi tlamantli.
7 ToTajtsin Dios tinochtin otechtliokoli tlen kuali uan Cristo otechmakak nin tetliokolil.
8 Porque iTlajtol toTajtsin Dios kijtoua: “Ijkuak ye otlejkok tlakpak, okinmakixti akinmej otsaktokaj uan okintemakak tlakamej ken se tetliokolil”.
9 ¿Tlen kijtosneki ijkuak kijtoua “otlejkok”? ¿Amo kijtosneki achto oualtemok nikan tlaltikpak?
10 Akin oualtemok noijki otlejkok uan okipanoui iluikak. Ye kichiuas mamochiua nochi tlamantli.
11 Sekimej okintlali mayetokan apóstoles, oksekimej profetas, oksekimej matetlapouikan kuali tlajtoli, oksekimej ken tlajpixkej uan oksekimej tlamachtijkej.
12 Okintlali para makinyektlalikan* tokniuan yolchipauakej, para makinpaleuikan oksekimej uan para makinyolchikauakan akinmej monechikouaj tlen iaxkauan Cristo,
13 hasta ijkuak tinochtin san se tlamantli matikneltokakan uan kuali matikixmatikan iKone toTajtsin Dios. Hasta matimochiuakan tiuejueyij uan matikchiuakan nochi ijkon ken Cristo okichi.
14 Ayakmo matiyetokan ken konemej. Amo matikkauakan matechkajkayaua nochi tlen oksekimej tlamachtiaj ijkon ken ijkuak mar uan ejekatl kiuiuika barco, porque oksekimej kintlaliaj trampas uan tlakajkayauaj.
15 Pero tejuan matikijtokan tlen melauak uan matitetlasojtlakan para matimoskaltikan. Noijki matikchiuakan nochi tlamantli ken Cristo okichi porque tejuan tikmatij ye itsonteko cuerpo.
16 Tejuan tikatej ken se cuerpo uan Cristo kipaleuia san sekan mayeto tlen ika sasalitok uan ijkon cuerpo kuali kajki. Tla kuali tekiti tlen ika sasalitok cuerpo, kuali moskaltijti cuerpo uan mochikajti ika tlasojtlalistli.
17 Ikinon ika itoka toTeko namechtlatlaujtia amo xikchiuakan ken akinmej amo tlaneltokaj, porque amitlaj ipati tlen yejuan mokuayejyekouaj.*
18 Intlayejyekol* kajki kanin tlayoua uan yokikajkej yolilistli tlen kitemaka toTajtsin Dios, porque amo kimatij tlen kichiuaj uan oyoltlakuauakej.
19 Ayakmo kinkuejsoua intlalnamikilis, tlajtlakolchijtinemij uan ayakmo pinauaj,* kichiuaj nochi tlen pitsotik uan tlaixnekij.
20 Pero namejuan amo onanmomachtijkej Cristo ijkon okichiuaya.
21 Jesús otlamachti tlen melauak. Tla onankikakej uan ye onamechmachti kijtosneki kuali nankimatij non tlamantli.
22 Namejuan onanmomachtijkej moneki nankikauaskej namonemilis tlen achto onankipiayaj. Non kijtosneki tlen achto onankichiuayaj uan non okachi ijtlakaui porque namechkajkayaua tlen amo kuali namechyoltilana.
23 Moneki nochipa xikpatlakan namotlayejyekol.*
24 Xikyankuilikan namonemilis ken kineki toTajtsin Dios. Ijkon nankichiuaskej tlen kuali uan melauak nantlaneltokaskej.
25 Axkan namejuan ayakmo nantlakajkayauaj ikinon nannochtin xikinmiluikan tlen melauak oksekimej, porque tinochtin tisasalitokej inuan oksekimej.
26 Amo xitlajtlakolchiuakan ijkuak nankualanij. Amo xikualantokan nochi se tonal.
27 Amo xikkauilikan Diablo itlaj makichiua.
28 Akin tlachteki ayakmo matlachteki. Mamochijchikaua kuali matekipano uan ijkon kipias tlen kimakas akin itlaj kipoloua.
29 Amo xipitsotlajtokan. Xikijtokan tlen kinyolchikauas oksekimej ijkon ken moneki. Xikijtokan tlen kinpaleuis akinmej namechkakij.
30 Noijki amo xikyolkokojtokan iespíritu santo toTajtsin Dios tlen ika onamechtlalilijkej sello para namechtlaxtlauaskej* uan namechmakixtiskej ijkuak ajsis tonal.
31 Amo san xikilnamiktokan tlen onamechtoktijkej, amo xikualanikan, amo xikualankamikikan, amo xitsatsajtsikan uan amo xiteyolkokokan. Noijki xikkauakan nochi tlen amo kuali.
32 Okachi kuali ximosepantlasojtlakan, ximoyeknotsakan, ximoiknomatikan uan ximotlapojpoluikan ika nochi namoyolo ijkon ken toTajtsin Dios ika nochi iyolo onamechtlapojpolui ika Cristo.
Notas
^ Noso “kitekitiltia”, “kikui”.
^ Noso “makinmachtikan”.
^ Noso “monejneuiliaj”.
^ Noso “intlanemilil”.
^ Xikita diccionario.
^ Noso “namotlanemilil”.
^ Xikita diccionario kanin kijtoua okitlaxtla.
