Efesios 5:1-33
5 Xikchiuakan ken toTajtsin Dios kichiua porque namejuan nanikoneuan.
2 Nochipa xitetlasojtlakan ijkon ken Cristo otechtlasojtlak. Ye topatka omotemakak ixpan toTajtsin Dios ken se tetliokolil ajuiak.
3 Amo ximotlapouikan ken auilnemij* oksekimej, ken kichiuaj tlen pitsotik noso ken tlaixnekij porque akinmej yolchipauakej amo moneki ijkon kichiuaskej.
4 Noijki amo xikchiuakan tlen tepinati, amo san tlen amo xikijtokan uan amo pitsotik ximokamanaluikan porque nochi non tlamantli amo kuali. Okachi kuali ximotlasojkamatikan.
5 Namejuan nankimatij uan kuali nankajsikamatij akinmej auilnemij,* akinmej kichiuaj tlen pitsotik uan akinmej tlaixnekij ken yetoskia kinueyichiuaj dioses, amo kiseliskej iTekiuajkayo toTajtsin Dios tlen kiyekana Cristo.
6 Amikaj manamechkajkayaua ika tlen amo melauak, porque toTajtsin Dios kintlajyouiltis akinmej ijkon kichiuaj uan amo tetlakamatij.*
7 Ikinon amo xikchiuakan tlen yejuan kichiuaj.
8 Achto onankatkaj kanin tlayoua pero axkan nankatej iuan toTeko kanin tlanestok. Nochipa xiyetokan ken ikoneuan tlauili
9 porque akinmej katej kanin tlanestok, yejuan yolkualmej, kichiuaj tlen kuali uan kijtouaj tlen melauak.
10 Kuali xikitakan tlen kipaktia toTeko.
11 Ayakmo xikchiuakan tlen amitlaj ipati kichiuaj akinmej katej kanin tlayoua. Okachi kuali xikteititikan tlen amo kuali kichiuaj.
12 Porque hasta tepinati tikijtoskej tlen yejuan san ichtaka kichiuaj.
13 Tlauili petlani ipan tlen amo kuali uan ijkon moteititia tlen amo kuali.
14 Ikinon iTlajtol toTajtsin Dios kijtoua: “Xiijsa te akin tikochtok uan yetoskia ken timiktok, uan Cristo mopan petlanis”.
15 Ximomaluikan para nankichiuaskej tlen kichiuaj ixtlamatkej uan amo tlen kichiuaj akinmej yokuatlapolojkej.
16 Amo ximotonalpolokan porque axkan panotok miak tlamantli amo kuali.
17 Ikinon xiyetokan namixtlamatkej uan xikajsikamatikan tlen Jehová kineki.
18 Amo xitlauanakan porque non kichiuas xikchiuakan tlen amo kuali. Okachi kuali, nochipa xikselikan iespíritu santo toTajtsin Dios.
19 San sekan xitlakuikakan salmos uan xiktlakuikilikan toTajtsin Dios. Ika nochi namoyolo xikueyichiuakan Jehová uan xiktlakuikilikan.
20 Nochipa nochi xiktlasojkamatilikan toTajtsin Dios ika itoka toTeko Jesucristo.
21 Xikinkauilikan oksekimej manamechyekanakan porque nankitlakaitaj Cristo.
22 Siuamej makikauilikan innamik makinyekana ijkon ken kikauiliaj toTeko makinyekana.
23 Porque tlakatl kiyekana isiua ijkon ken Cristo kiyekana tlanechikol. Ye okimakixti nin cuerpo.
24 Siuamej moneki nochipa kikauiliskej innamik makinyekana ijkon ken tlanechikol kikauilia Cristo makiyekana.
25 Tlakamej, nochipa xikintlasojtlakan namosiuauan ijkon ken Cristo okitlasojtlak tlanechikol uan ipatka omotemakak.
26 Ye ijkon okichi para kichipauas ika iTlajtol toTajtsin Dios ken yetoskia kichipauas ika atl.
27 Ijkon tlanechikol kualtsin yetos ixpan ye, amo kipias itlaj sokio, amo kipias itlaj xoxolochtik nion okse tlamantli tlen kijtlakos. Yetos chipauak uan amo kipias itlaj tlen amo kuali.
28 Noijki tlakamej moneki makintlasojtlakan insiuauan ijkon ken yejuan motlasojtlaj. Tlakatl tlen kitlasojtla isiua kijtosneki ye noijki motlasojtla,
29 porque amo keman ikaj kikokolia icuerpo. Nochtin kuali kimaluiaj incuerpo uan kitlamakaj ijkon ken Cristo kichiua ika tlanechikol
30 porque tipouij itech icuerpo.
31 “Ikinon tlakatl kikauas ipapa uan imama. Ye yetos iuan isiua uan mochiuaskej san se”.
32 Miak ipati nin tlamantli santo tlen amo omomatiaya. Axkan nikijtoua akin Cristo uan noijki tlanechikol.
33 Namejuan xiktlasojtlakan namosiua ijkon ken nanmotlasojtlaj. Siuatl noijki makitlakaita inamik.
Notas
^ Ika griego moijtoua pornéia. Xikita diccionario kanin kijtoua auilnemi.
^ Xikita diccionario kanin kijtoua auilnemi.
^ Noso “tlauelkakij”.
