Filipenses 2:1-30
2 Ximochijchikauakan nanteyolchikauaskej porque nankatej iuan Cristo, xiteyolseuikan ika tlasojtlalistli, manamechtekipacho tlen kinpanoua oksekimej, xitetlasojtlakan uan xiteiknomatikan.
2 Nipakis tla ijkon nankichiuaskej. Ximoyekuikakan, ximotlasojtlakan, san se tlamantli ximokuayejyekokan* uan san se tlamantli xikchiuakan.
3 Amitlaj xikchiuakan porque nantlaixnekij noso nanmoueyinekij. Xiyetokan nanyolyamankej uan xikinmitakan oksekimej okachi ueyititokej.
4 Xikchiuakan tlen kinpaleuis oksekimej uan amo xikchiuakan san tlen namejuan namechpaleuis.
5 Ximokuayejyekokan* ken Cristo Jesús omokuayejyekouaya.*
6 Ye okatka ken toTajtsin Dios pero amo omokuayejyeko* mochiuas toTajtsin Dios.
7 Ye okikajte nochi tlen okipiaya, oneski* ken se tlakatl uan omochi ken se tlakeuali.
8 Ijkuak oneski* ken se tlakatl, omochi yolyamanki uan otetlakamatki* hasta ijkuak okimiktijkej itech se kouitl.*
9 Ikinon toTajtsin Dios okachi okiueyitlali. Noijki okikauili matlanauati pero ye okachi ueyititok amo ken oksekimej tlen tlanauatiaj.
10 ToTajtsin Dios ijkon okichi para nochtin makitlakaitakan itoka Jesús. Makitlakaitakan akinmej katej iluikak, akinmej katej tlaltikpak uan akinmej katej itlampa tlali.
11 Noijki nochtin makimatikan Jesucristo toTeko para makiueyichiuakan toTajtsin Dios.
12 Ne namechtlasojtla nokniuan uan namejuan nochipa nantetlakamatij.* Amo nantetlakamatij* san ijkuak ompa nika, okachi nantetlakamatij* ijkuak amo ompa nika. Nochipa ximochijchikauakan ika tlakaitalistli uan mauilistli para nanmomakixtiskej.
13 ToTajtsin Dios namechmaka chikaualistli para xikchiuakan nochi tlen kipaktia. Ye kichiua xiknekikan ijkon nankichiuaskej uan namechmaka chikaualistli para xikchiuakan.
14 Amo ximokualanikan ijkuak itlaj nankichiuaj nion amo xitlananankilikan.
15 Ijkon nanyetoskej ikoneuan toTajtsin Dios nanyolchipauakej uan amitlaj namechtlajtlakoltiskej. Namejuan amitlaj namotlajtlakol, ikinon nanpetlanij ken se tlauili maski nanchantij inuan akinmej amo yolkualmej uan kichiuaj tlen amo kuali.
16 Namejuan chikauak ximokitskijtokan itech iTlajtol toTajtsin Dios tlen kitemaka yolilistli. Ijkon nipakis ijkuak ajsis itonal Cristo porque nikmatis amo san nenka onimochijchika nion amo san nenka chikauak onitekipano.
17 Ne nimotemaka ken vino tlen kitetliokoliaj uan kinokiaj* ipan altar. Ne namechpaleuia nochipa xiktekichiuilikan toTajtsin Dios ikinon sapanoua namouan nipaki.
18 Noijki namechiluia nouan xipakikan.
19 Ne nikchia toTeko Jesús manechkauili san niman namechtitlanilis Timoteo, para nimoyolchikauas ijkuak nikmatis ken nankatej.
20 Porque amo nikpia okse ken ye tlen melauak kitekipachoua ken nankatej.
21 Porque oksekimej kichiuaj san tlen yejuan kinpaleuia uan amo kichiuaj tlen kineki Jesucristo.
22 Pero namejuan nankimatij Timoteo yokiteititi amo ijkon kichiua. Porque ye okatka ken se tlakeuali ijkuak onechpaleui otiktematiltijkej kuali tlajtoli ijkon ken se tepapa iuan ikone.
23 Ikinon san niman namechtitlanilis Timoteo ijkuak nikmatis tlen nechpanos.
24 Ne nikmati toTeko san niman nechkauilis manamechtlajpaloti.
25 Pero axkan nikita moneki namechtitlanilis tokni Epafrodito. Ye nouan tekipanoua uan noijki se isoldado Cristo. Namejuan onankititlankej manechpaleuiki ken se tlakeuali.
26 Ye namechilnamiki uan kineki namechitas. Noijki moyolkokoua porque onankimatkej ye omokokouaya.
27 Ye yiixpoliuiskia porque chikauak omokokouaya. Pero toTajtsin Dios okiknomatki uan ne noijki onechiknomatki para amo okachi manimoyolkoko.
28 Ikinon san niman namechtitlanilis Epafrodito para nanpakiskej ijkuak nankitaskej uan ne ayakmo nimoyolkokos.
29 Xipakikan ijkuak nankiseliskej ken nankinseliaj akinmej kichiuaj ken toTeko. Nochipa xikinpatioitakan tlakamej tlen kichiuaj ken ye.
30 Epafrodito yiixpoliuiskia porque kitekichiuilia Cristo. Ye uelis itlaj kipanoskia porque onechpaleui ijkuak namejuan amo onantechpaleuijkej porque amo nikan onankatkaj.
Notas
^ Noso “ximonejneuilikan”.
^ Noso “ximonejneuilikan”.
^ Noso “omonejneuiliaya”.
^ Noso “omonejneuili”.
^ Noso “otlakatki”.
^ Noso “otlakatki”.
^ Noso “otlauelkaki”.
^ Xikita diccionario.
^ Noso “nantlauelkakij”.
^ Noso “nantlauelkakij”.
^ Noso “nantlauelkakij”.
^ Noso “kimimilouaj”, “kixauaniaj”, “kitoyauaj”.
