Hebreos 12:1-29
12 Sapanoua miakej testigos techyaualojtokej ken yetoskiaj mixtli, ikinon matikmokixtilikan nochi tlen tikmamajtokej uan noijki tlajtlakoli tlen amo oui techtsakuilia. Matimotlalokan ijkon ken toTajtsin Dios otechnauati uan matitlaxikokan.
2 Nochipa kuali matikitakan Jesús porque toTajtsin Dios okipejpenki matechpaleui kuali matitlaneltokakan. Ye okimatiaya satepan pakiskia ikinon otlaxiko ijkuak okitlajyouiltijkej itech kouitl* uan amo opinauak. Ye omotlali iyekma toTajtsin Dios tlen kajki itech itrono.
3 Xikilnamiktokan akin otlaxiko ijkuak okiuijuikaltijkej tlajtlakolejkej tlen san inselti omotlajyouiltiayaj. Ijkon amo nansotlauaskej uan nantlaxikoskej.
4 Namejuan nanmochijchikauaj amo nankichiuaskej non tlajtlakoli pero ayamo nanmochijchikauaj nantlaxikoskej hasta nanmikiskej.
5 Sepa onankilkajkej tlen toTajtsin Dios onamechnauati porque nanikoneuan: “Nokone, amo xikajauilmati ijkuak Jehová mitsyektlapouia uan amo ximosotlaua ijkuak mitsyektlalia.
6 Porque Jehová kinyektlapouia akinmej kintlasojtla. Ye kitlakotema akin kiselia ken ikone”.
7 Namejuan moneki nantlaxikoskej porque nankimatij toTajtsin Dios namechyektlapouia. Ye namechita ken nanikoneuan. ¿Kox onka se tepapa tlen amo kiyektlapouia ikone?
8 Pero tla toTajtsin Dios amo namechyektlapouis ijkon ken kinyektlapouia oksekimej, kijtosneki nanikoneuan ikaj okse uan amo ye nanikoneuan.
9 Topapanuan otechyektlaliayaj uan tejuan otikintlakaitayaj. ¿Amo moneki okachi tiktlakamatiskej* toTajtsin tlen techyekana ika iespíritu santo para matiyoltokan?
10 Topapanuan amo uejkika otechyektlaliayaj uan okichiuayaj ken okitayaj kuali. Pero toTajtsin tlen kajki iluikak techyektlalia porque kineki kuali matiyetokan. Ijkon matiyetokan tiyolchipauakej ken ye.
11 Tejuan timoyolkokouaj ijkuak techyektlaliaj uan amo tipakij. Pero tla tikseliaj matechyetlalikan techpaleuis matiyeknemikan uan kuali matiyetokan.
12 Ikinon xikinchikauilikan inmauan akinmej amo machikauakej uan xikinchikauilikan intlankuauan akinmej tlankuauiuiokaj.
13 Nochipa xinejnemikan itech ojtli tlen melauak para mapajti akin kikokoua ikxi uan ijkon amo okachi mokxikokos.
14 Xiktemokan ken kuali nanmouikaskej inuan nochtin uan xikpiakan chipauak namonemilis. Porque akin amo kipia chipauak inemilis amo kitas toTeko.
15 Ximomaluikan uan ijkon toTajtsin Dios nannochtin namechtliokolis tlen kuali. Ijkon amo mamoneluayoti tlen amo kuali uan kichiuas ximokualanikan uan miakej kinmijtlakos.
16 Kuali xikitakan amikaj maauilnemi* uan amikaj makitlauelita tlen iaxka toTajtsin Dios ijkon ken okichi Esaú. Ika tlakuali okipatlak tlateochiuali tlen ye kiseliskia porque achto oneski.*
17 Namejuan nankimatij ye ayakmo okiteochijkej ijkuak okinekiaya makiteochiuakan. Amitlaj okipaleui maski ochokak ijkuak okitlatlaujti ipapa makiteochiua.
18 Porque namejuan amo keman nanmotokiaj itech se tepetl tlen xotlatok uan uelis nankikitskiskej, nion itech mixtli tliliuik, nion itech tlayoualotl nion itech chikauak ejekatl.
19 Amo onankikakej ijkuak okipitskej trompeta nion amo onankikakej tlajtoli tlen omokak iluikak. Ijkuak israelitas okikakej ikaj otlajto, omotlatlaujtijkej ayakmo itlaj makinmiluikan.
20 Porque omomojtijkej ijkuak okinmakakej nin tlanauatil: “Tla se yolkatl moketsas ipan tepetl moneki kimojmotlaskej ika tetl”.
21 Sapanoua temomojti tlen opanok ikinon Moisés okijto: “Nimomojtia uan niuiuioka”.
22 Pero namejuan onanmotokijkej itech tepetl Sion uan itech ialtepe toTajtsin Dios tlen yoltok. Non altepetl kijtosneki Jerusalén tlen kajki iluikak kanin katej sapanoua miakej ángeles
23 uan nochtin san sekan omonechikojkej. Onanmotokijkej itech intlanechikol achto ikoneuan toTajtsin Dios tlen intoka ijkuilitok iluikak. Onanmotokijkej inauak toTajtsin Dios tlen nochtin kinmixkomaka. Onanmotokijkej innauak akinmej yolkualmej tlen moyekanaj ika espíritu santo uan ayakmo kipiaj tlajtlakoli.
24 Noijki onanmotokijkej inauak Jesús tlen tlapaleuia mamochiua se yankuik acuerdo* uan estli tlen otechtsitsikuichili. Non estli okachi kuali uan amo ijkon ken ieso Abel.
25 Ximomaluikan para amo nankixtopeuaskej akin namechtlapouia. Yiuejkika okintlajyouiltijkej akinmej amo okikakej tlen okijto toTajtsin Dios ipan tlaltikpak, ikinon tejuan okachi techtlajyouiltiskej tla amo tikkakij akin techualtlapouia desde iluikak.
26 Ijkuakon otlalolinki porque otlajto toTajtsin Dios, pero axkan ye yokijto: “Oksepa nikchiuas matlalolini ipan tlaltikpak uan noijki nikchiuas mamolini iluikak”.
27 Tlajtoli “oksepa” kijtosneki pojpoliuis nochi tlen molinia uan amo okichijchi toTajtsin Dios. Ijkon san yetos tlen amo molinia.
28 Tejuan tikseliskej se Tekiuajkayotl tlen amo ueli molinia, ikinon amo keman matikkauakan toTajtsin Dios uan ijkon ye nochipa techtliokolis tlen kuali. Non techpaleuis matiktekichiuilikan ijkon ken ye kipaktia, matikmauilikan uan matiktlakaitakan.
29 Porque toTajtsin Dios yetoskia ken tlitl tlen nochi kitlatia.
Notas
^ Xikita diccionario.
^ Noso “tikuelkakiskej”.
^ Xikita diccionario kanin kijtoua auilnemi.
^ Noso “otlakatki”.
^ Noso “pacto”. Xikita diccionario.
