Hebreos 2:1-18
2 Ikinon moneki okachi matimokuayejyekokan* tlen otikkakej uan ijkon nochipa titlaneltokaskej.
2 Porque tla melauak tlen okitematiltijkej ángeles, uan tla akinmej otlajtlakolchijkej uan akinmej amo otetlakamatkej* okintlajyouiltijkej ijkon ken moneki,
3 ¿ken timopaleuiskej tla amo tikpatioitaj ueyi temakixtilistli? Porque toTeko ye achto okitematilti uan akinmej okikakej otechiluijkej tlen okitakej uan tlen okikakej.
4 Ijkuakon toTajtsin Dios noijki okitematilti ika milagros, ika okseki tlamantli tetlajtlachialti uan ika espíritu santo tlen okitemakak ijkon ken ye kineki.
5 ToTajtsin Dios amo okintlali ángeles makinauatikan tlaltikpak tlen satepan uits uan tlen tejuan tiktematiltiaj.
6 Se tonal se testigo okijkuilo: “¿Tlen ipati tlakatl para xikilnamikto? ¿Tlen ipati ikone tlakatl para xikmalui?
7 Te amo otikchijchi maueyitito ken ángeles. Te otikteochi uan otikueyitlali. Noijki otiktlali makinauati nochi tlen otikchijchi.
8 Nochi tlamantli otiktlali ikxitlampa para makinauati”. ToTajtsin Dios okitlali nochi makinauati uan amitlaj okika tlen amo uelis kinauatis. Maski ayamo tikitaj nochi tlamantli kinauatijtok,
9 yitikitaj Jesús okiteochijkej uan okiueyitlalijkej porque otlajyoui uan oixpoliuik. Ijkon oixpoliuik inpatka miakej porque toTajtsin Dios kitetliokolia tlen kuali. Ye amo okichijchijkej maueyitito ken ángeles.
10 Nochi tlamantli kajki para makiueyichiua toTajtsin Dios uan nochi kajki porque ye okichijchi. Ikinon para kinueyitlalis miakej ikoneuan, toTajtsin Dios omonekiaya kitekauilis matlajyoui akin kinpaleuia mamomakixtikan. Ijkon ye uelis kinpaleuiskia mamomakixtikan.
11 Jesús uan akinmej ye yokinyolchipa kipiaj san se intajtsin. Ikinon ye amo pinaua kijtos yejuan ikniuan
12 ijkuak kijtoua: “Nokniuan nikinmatiltis motoka uan nimitsueyichiuas ika tlakuikali itech tlanechikol”.
13 Noijki kijtoua: “Ne nikneltokas toTajtsin Dios”. Uan kijtoua: “Nikan nika inuan konemej tlen Jehová onechinmakak”.
14 Nonmej “konemej” kipiaj innakayo uan inmieso, ikinon ye noijki omochi se tlakatl tlen okipiaya inakayo uan ieso. Ijkon ika imikilis uelis kipojpolos Diablo tlen temiktia.
15 Uan kinmakixtis nochtin akinmej okatkaj ken tlakeualmej porque omomojtiayaj ixpoliuiskej.
16 Ye okinpaleuiko ixuiuan Abrahán uan amo okinpaleuiko ángeles.
17 Ikinon omonekiaya mochiuas ken “ikniuan” itech nochi tlamantli. Ijkon omochi teopixki tlen tlayekana, tlen teiknomati uan tetlakamati* ijkuak kitekichiuilia toTajtsin Dios. Noijki ijkon okichi para kitemakas se tetliokolil por intlajtlakol nochtin para kuali mamouikakan iuan toTajtsin Dios.
18 Ye otlajyoui ijkuak okiyejyekojkej ikinon kimati ken kinpaleuis akinmej kinyejyekouaj.
