Hebreos 3:1-19
3 Ikinon nokniuan yolchipauakej tlen onamechnotskej xiakan iluikak, ximokuayejyekokan* tlen okichi Jesús. Tejuan tikseliaj ken apóstol uan ken teopixki tlen tlayekana.
2 Ye okitlakamatki* toTajtsin Dios tlen okimakak non tekitl, ijkon ken Moisés otetlakamatki* ijkuak otekipano ikalijtik toTajtsin Dios.
3 Moisés oueyititoka pero Jesús okachi okiueyitlalijkej. Porque akin kichiua se kali okachi kitlakaitaj uan amo kitlakaitaj kali.
4 Se kali ikaj kichiua pero toTajtsin Dios okichijchi nochi tlen onka.
5 Moisés nochipa okimalui ikalijtik toTajtsin Dios. Tlen okichi okiteititi tlen toTajtsin Dios kijtoskia satepan.
6 Pero Cristo ikone toTajtsin Dios uan nochipa okimalui ikalijtik iTajtsin. Tejuan tikatej ken ikalijtik tla nochipa tiyolchikauakej ijkuak titlajtouaj uan tla tikneltokaj tlen tikchiaj ika pakilistli.
7 Ikinon espíritu santo kijtoua: “Tla axkan nankikakiskej itlajtol,
8 amo xiyoltlakuauakan ken okichijkej namouejkatatajuan ijkuak onechkualanijkej kanin tlauaki uan onechyejyekojkej.
9 Ompa onechyejyekojkej namouejkatatajuan uan onechixnamikej maski 40 xiuitl okitakej tlen onikchi.
10 Ikinon onikintlauelitak akinmej ijkuakon oyoltokaj uan onikijto: ‘Nochipa kichiuaj tlen kinyoltilana uan ayamo nechixmatij’.
11 Ikinon sapanoua onikualanki uan onikijto: ‘Amo kalakiskej kanin ne nimoseuia’”.
12 Nokniuan, ximomaluikan para amo maijtlakaui namoyolo uan ayakmo nantlaneltokaskej porque nankikauaskej toTajtsin Dios tlen yoltok.
13 Okachi kuali, nochipa ximosepanyolchikauakan ijkuak ok uejkauas non tonal tlen itoka “axkan”. Ijkon amo nanyoltlakuauaskej ika ichikaualis tlajtlakoli tlen tekajkayaua.
14 Porque tejuan tikseliskej tlen okiseli Cristo tla nochipa titlaneltokaskej ijkon ken ijkuak opejki titlaneltokaj.
15 ITlajtol toTajtsin Dios kijtoua: “Tla axkan nankikakiskej itlajtol, amo xiyoltlakuauakan ken okichijkej namouejkatatajuan ijkuak onechkualanijkej”.
16 ¿Akinmej okikakej pero okikualanijkej? ¿Amo nochtin akinmej okiskej Egipto uan okinyekanki Moisés?
17 Noijki, ¿akinmej okintlauelitak toTajtsin Dios 40 xiuitl? ¿Amo yejuan akinmej otlajtlakolchijkej uan oixpolikej kanin tlauaki?
18 ¿Akinmej okinmilui amo kalakiskej kanin ye moseuia? ¿Amo yejuan akinmej amo otetlakamatkej?*
19 Tikitaj amo okalakej kanin moseuia porque amo otlaneltokayaj.
